Read Maru ROMA 4 Bible Online

ROMA 4 - Maru bible

ROMA 4

¹Airulao" wa ngonhaung" phug' pho" ajhaung Abraham nho: khyo re khoru: ta" nae" i? Yao: thaung" qhug' lo: ra" khyo wa pe" ru: i?

²Abraham wa yao: zaui: so" lo: ra" lo, mau" mathao: yang jo: ra" ga: Mao"So: yang sun" yu: ru qhug' ngad: re wa yao: wa phug nae" khyo jo; ra". Ngadqere: Mao"So: qhid' kheim: mae mangad:-

³Jham: Mugsug' mae- Abraham wa Mao"So re lam khug: ra"- ai: yao" lam khug: ra" myid mathao: yang Mao"So wa yao: re din:man" ra" yaug- ga: khae: yu: ra"- ga: ta" to" ra".

⁴Mau" zaui" ra" byu dayaug wa aphug' qo" khae: yu: ra". Ngadqere: ai: aphug' wa jhaung qhu" khyo" mangad:- yao: qo" kham: yu ang: ra" mau" zaui: phug' ngad: ra".

⁵Ngadqere: yao" mau" zo" lo, mau" re makhug ngha lo:- yao" lam khug: ra" myid re khug ngha mung: qobo qo" ra" yaug re qobo maqo"- ga: ta" hau" ke' ra" Mao"So re lam khug: ra" yaug re wa- yao" lam khug: ra" myid mathao: yang Mao"So wa yao: re jo: ra" ga: sun" yu: ra".

⁶Byu dayaug wa lo, mau" mathao: yang mangad: lo:- Mao"So: yang din:man" ra" yaug khyo" khae: yu:ru qhug' ra" yaug wa ngaui lho" ra" khyo re yao: ta" au:- Davi wa-

⁷Tarha" shad' lhoe" rure qobo khyad' byid: qhug' ru we' yug: no qobo jham re khyad' pye' byid: qhug' ra" mo, wa ngaui lho" ako".

⁸Yao: yao" qobo re Mao"So: yang maxam" to: byid: nae" yaug wa ngaui lho" ra"- ga: ta" ra".

⁹Davi ta" ra" ce: ngaui lho" ru wa au: qid lhai: khyo re kad' ra" mo; qhid' mae" za: ngad: ra" i? Dajhid' re: mangad: ngad: ra". Ai: ngaui lho" ru wa au: qid lhai" ra" khyo makham: yu: ra" mo; qhid' mae" re: ngad: ra". Pe"mung:ga"re- Abraham wa Mao"So re lam khug: ra". Aimung: yao" lam khug: myid mathao: yang Mao"So wa yao: re din:man" ra" yaug khyo" khae: yu: ra"- ein: ngonhaung" Jham: Mugsug' re ngha yang: ta" va".

¹⁰Ceru wa khonhae" boe" ru ngad: i? Abraham wa au: qid lhai: khyo makham: yu shire ngad: i? Mangad: lao"- au: qid lhai" ra" khyo re kham: yu thao re ngad: ra" i? Au: qid lhai" ra" khyo kham: yu thao re mangad:- Au: qid lhai" ra" khyo makham: yu shimae" ngad: ra".

¹¹Abraham wa- au: qid lhai" ra" khyo re ai: thao re kham: yu: ra"- ai: au: qid lhai" ra" khyo re kham: yu: ru wa- Mao"So wa Abraham nho: lam khug: myid mathao mae ai: au: qid lhai" ra" khyo makham: yu shimae" Abraham re din:man" ra" yaug khyo" sun" yu: ra" khyo re qhu" byid' ra" ave, ngad: ra". Airumung: Abraham wa ai: au: qid lhai" ra" khyo re makham: yu gesho' ngadqere: Mao"So re lam khug: ra" myid mathao mae din:man" ra"- ga: Mao"So: yang sun" yu byid' ra" mo, alhab' nho: yao: pho" ngad: ra".

¹²Yao: wa au: qid lhai" ra" khyo re kham: yu: ra" mo; yao: pho" re: ngad: ra". Aiwa yao: bam: au: qid lhai" ra" khyo re kham: yu ko" ruyang za: mangad:- ngonhaung" phug' pho" Abraham yao: au: qid lhai" ra" khyo re makham: yu shire Mao"So re lam khug yang: kao so' daui: lo: ra" lo, mau" we' dakhyo:- yao: bam kao so' daui geyang: ngad: ra".

¹³Mao"So wa Abraham we' yao" myid:zo: qere- mug: myid re sang nhao nae"- ga: dao:so: byid' to" ra". Airu: dao:so: byid' to" ra" au:- Abraham wa kham" to" ra" tarha" re phug' cao" yang: mangad:- yao: wa Mao"So re lam khug mung: Mao"So: yang yao: re din:man" ra" yaug khyo" sun" yu byid' ruyang ngad: ra".

¹⁴Mao"So: dao:so: wa ai: kham" to" ra" tarha" re phug' cao" ra" mo; qhid' mae" za: ngad: re wa- lam khug: ru wa aje amyid ngad mung:- Mao"So: dao:so: re: pe" phug' made, ngad: ra".

¹⁵Kham" to" ra" tarha" wa Mao"So: nhag' yo" rure boe" nhao: ra"- ngadqere: ai: kham" to" ra" tarha" majo, re wa tarha" shad' lhoe" rure: majo, ngad: ra".

¹⁶Airumung: ai: dao:so: wa Abraham nho: myid:zo: qe alhab' re aphug' mabyid: ca" lo: byid' ra" Mao"So: jeju jhaung qhu" ngad: ra" khyo re gang" tang: jo, vashao:- lam khug: rumae apan te" to" ra" khyo re qhu" byid: nae" qhid' mae" dao:so: ngad: ra". Ai: dao:so: wa kham" to" ra" Tarha" re phug' cao" ra" mo; qhid' mae" za: mangad:- Abraham we' dakhyo: Mao"So re lam khug: ra" mo; qhid' mae" re: ngad: ra".

¹⁷Pe"mung:ga"re jham: mugsug' mae- ngo wa nao re byumyu" myo: sho' mo; yao: pho" boe" nhao va"- ga: ta" to" ru we' dakhyo:- Abraham wa Byo we' sin" ra" ngonhaung" alhab' mo; yao: pho" ngad: ra". Airu: mung: ai: dao:so: wa Abraham lam khug: ra" Mao"So: qhid' kheim: mae gai: ra". Ai: Mao"So wa sushid re kao so' daui: li" nhao: ru we' azhao majo; rure jo; li" nae" qhid' mae" amyin" byid' ra" Mao"So ngad: ra".

¹⁸Abraham wa myid: lao" nae" khyo agu majo; au: lhao" re: Mao"So re lam khug mung: myid: lao" ra"- Airumung: yao: wa byumyu" myo: sho' mo; yao: pho" boe" lo: ra". Jham: Mugsug mae- ni" myid:zo: qe wa kyi ce' nho" je" li" nae"- ga: ta" to" ru we' dakhyo: ngad: ra".

¹⁹Yao" apyad dayo zin ko byang" li" na mung: yao" gaung dau: wa ashid ru" ru ngad: byaug va" rure re:- Sarah wa zo: dau maqo" khau lo" rure ba ngadqere: yao" lam khug: myid wa manang" lo" ngad: ra".

²⁰Yao: wa Mao"So re lam khug: ra" myid mato" pye' ngad: ra". Mao"So: dao:so: rere: aug' o: myid mabo ngad: ra"- yao" lam khug: myid wa yao: re qam: so' pyang" byid: mung: yao: wa Mao"So re caung:khin" byid' ra".

²¹Mao"So wa yao: dao:so: byid' to" ru we' dakhyo:- qo" kad' boe" yaug ngad: rure Abraham wa myo, cam: tang lam: ra".

²²Abraham wa airu: Mao"So re lam khug: ruyang Mao"So: yang yao: re din:man" ra"- ga: khae: yu byid' ra".

²³Mao"So wa yao: re din:man" ra" yaug khyo" khae: yu: ra"- ga" ra" dao: wa Abraham yao: dayaug reza: qang yang: tung" to" ru mangad:-

²⁴Ngonhaung" Asang Yesu re shid: rumae" dam: daui: to" li" nhao: ra" Mao"So re lam khug: ra" mathao mae Mao"So: yang din:man" ra"- ga: khae: yu qhug' ra" mo, ngonhaung" rere: qang yang: tung" to" ru ngad: ra".

²⁵Pe"mung:ga"re- Asang Yesu wa ngonhaung" qobo mathao mae shid kham: byid: nae" ab: pye' ru qhug' mung:- ngonhaung" re Mao"So: yang jo: ra"- ga: khae: yu nae" qhid' mae" yao: wa shid: rumae" dam: daui: to" li" nhao: ru qhug' ra".