Read Maru ROMA 5 Bible Online

ROMA 5 - Maru bible

ROMA 5

¹Ana"- ngonhaung" wa lam khug: ra" myid khyo" yang jo: ra"- ga: Mao"So: yang sun" yu: ru qhug' mung:- ngonhaung" Asang Yesu Khristu khyo" yang Mao"So we' ngonhaung" agyo: mae yaug yo: ru qhug' yu: ra".

²Ana" ngonhaung" daui: na: ra" Mao"So: jeju re kham zo" ra" kao so' mae yao: ngonhaung" re lam khug: ru khyo" yang jhui" lo: ra". Airumung: Mao"So: phungbao re qo" bokhae: yu nae"- myid: lao" yang: ngonhaung" ngaui bau: ngaui yao phug: na: ra".

³Ngonhaung" wa qug: khai" rumae re: ta" phug: na:- pe"mung:ga"re qug: khai" ru wa zang: qhao" rure- boe" nhao: ra".

⁴Zang: qhao" ru wa Mao"So: yang myid bovang" byid' rure boe" nhao: ra". Asang Mao"So: yang myid bovang" byid' ru wa myid: lao" rure boe" nhao: rure- ngonhaung" ba: ra".

⁵Ai: myid: lao" ru wa ngonhaung" re qam: shan nhao nae" mangad:- pe"mung:ga"re ngonhaung" re byid' ra" jhaung qhu"- Gyang" Lho" Byo khyo" yang Mao"So wa yao" jhid'de; myid ngonhaung" nhag' lam: khug mae vhe' zaui byid' to" ra".

⁶Ngonhaung" khug ngha qo majo, shi" au:- Khristu wa Mao"So: yang dang: to" ra" yo, khyin: mae makhyang: mashab; ra" mo; qhid' mae" shid kham: byid' ra".

⁷Din:man" ra" byu dayaug: qhid' mae" byu dayaug yaug shid kham: byid: nae" wa qug' ra" mau" ngad: ra". Byugai dayaug: qhid' mae" vae" shid kham: byid: nae" byu kam" wa- dayaug yaug bo maba-

⁸Ngadqere: ngonhaung" wa qobo gaung qe ngad: jo; bam shi" au:- Khristu wa ngonhaung" qhid' mae" shid kham: byid' ru wa Mao"So ngonhaung" re khoqhi" jhid'de; ra" khyo ngonhaung" re qhu" byid' ava".

⁹Ana" ngonhaung" wa Khristu shid kham: byid' ra" khyo" yang jo: ra"- ga: Mao"So: yang sun" yu: ru qhug' mo, ngad mung: Mao"So: nhag' yo" rumae" Khristu mathao mae khyad' yu: ru je yang: qhug' nae" ngad: ra".

¹⁰Ngonhaung" wa Mao"So: gyevo qe ngad: bam ngadqere: Mao"So: yao: zo: shid kham: byid' ra" khyo" yang ngonhaung" re yao" ba nam kad' yu: ra". Ana" ngonhaung" wa Mao"So: ba nam qe ngad va" ruyang kao so' daui: na: ra" Khristu kao so' mathao mae ngonhaung" wa khyad' yu: ru je yang: qhug' nae" ngad: ra".

¹¹Ana" ngonhaung" re Mao"So: ba nam boe" nhao: ra" Asang Yesu Khristu khyo" yang Mao"So kad' va" ra" mau" zo" mathao mae ngonhaung" ngaui bau" na:.

¹²Qobo wa byu dayaug khyo" yang mug:myid khyo vao li" mung: yao" qobo mathao mae shid: ru boe" li" ra". Airumung: byu alhab' mo, wa qobo shad' lhoe" ko" ruyang shid: ru wa xao su byu alhab' mo; dao mae byo: lo" ra".

¹³Kham" to" ra" Tarha" majo, shimae"- qobo wa mug: myid dao mae jo; ra". Ngadqere: ai: kham" to" ra" Tarha" majo; ra" yo, mae qobo jham re xam" to" ra" khyo majo, ngad: ra".

¹⁴Ngadqere: shid: ru wa Adam nho: pyad mae" Moshe nho: pyad mae joe" sho' xao su byu alhab' mo; dao mae eib; to" ra". Mao"So: amyin" dao: re mho dao: magyo" ra" khyo"- Adam: shad' lhoe" ra" qobo ru" rure mashad' lhoe" ko" ra" mo; dao mae lhao" re:- shid: ru wa eib: jo; ra". Adam: wa joe" li" nae" ra" yaug: ve, lho ngad: ra".

¹⁵Ngadqere: ai shid' yaug wa majho" dau ngad: ako"- pe"mung:ga"re Mao"So: jeju jhaung qhu" wa Adam nho: qobo we' madau ngad: ra". Byu dayaug qobo shad' lhoe" ra" mathao: yang byu myo: sho' mo, shid: ru qhug' ko" ru wa dang: ra". Ngadqere: Mao"So: nhag' myan" ru we' Yesu Khristu ga" ra" byu dayaug: nho: nhag' myan" ra" khyo" yang byu myo: sho' mo, re byid' ra" Mao"So: jeju jhaung qhu" wa je yang: qi" qhang: ra".

¹⁶Mao"So byid' ra" jeju jhaung qhu" we' byu dayaug shad' lhoe" ra" qobo dae wa majho" dau ngad: ra". Qobo daja: thao re qobo qo" ra"- ga: dao: kho' ru joe" ra". Ngadqere: qobo myo: sho' thao mae qobo maqo" ga: ta" pyo: ra" maman: maqi" ra" khyo" khae: yu: ra" jeju jhaung qhu" thug' li" ra".

¹⁷Byu dayaug shad' lhoe" ra" qobo mathao mae shid: ru wa ai: byu dayaug: mathao mae byu alhab' mo, re eib: na: ru wa dang: ra". Ngadqere:- Yesu Khristu ga" ra" byu dayaug khyo" yang kad' thug' ke' ra" akyu" wa khoqhi" sho' je: qi:nae" i? Mao"So: magan: mago" ra" nhag' myan" ru jeju re qo" khae: yu: ra" mo, we' Mao"So: yang jo: ra"- ga: sun" yu qhug' ra" mo, wa Khristu khyo" yang qam: bo bo za: kao so' daui: li" genae".

¹⁸Airumung:- byu dayaug qobo shad' lhoe" ruyang byu alhab' mo, dao: kho' ru qhug' ruwe' dakhyo: byu dayaug din:man" ra" mau" zo" zaui: so" ruyang byu alhab' mo, re loe; beim nhao mung:- yao: bam re kao so' byid' ra".

¹⁹Byu dayaug mho dao: magyo" ra" mathao mae byu alhab' mo, qobo shad' lhoe" ra" mo, ga: sun" pye' ru we' dakhyo:- byu dayaug mho dao: gyo" ruyang byu alhab' mo, re din" man" ra"- ga: Mao"So: yang sun" yu byid' ru qhug' li" genae".

²⁰Shad' lhoe" ra" qobo myo" laug: li" nae" qhid' mae" Mao"So wa kham" to" ra" Tarha" re byid' to" ra". Ngadqere: shad' lhoe" ra" qobo myo" laug: li" lao"- Mao"So: nhag' myan" ra" jeju re: jeyang: myo" laug: li" ra".

²¹Airumung: qobo wa shid: ra" qam: so' yang eib: na: ru we' dakhyo:- Mao"So: nhag' myan" ra" jeju re: din:man" ru we' eib khang" na mung:- ngonhaung" nho: Asang Yesu Khristu khyo" yang ngonhaung" re apyad ato: kao so' re qo" yu nhao: ra".