Read Maru ROMA 6 Bible Online

ROMA 6 - Maru bible

ROMA 6

¹Airulao"- ngonhaung" pe" ru: ta" nae" i? Mao"So: nhag' myan" ra" jeju myo" laug: li" nae" qhid' mae" ngonhaung" wa qobo khug mae xo' yang: kao so' daui nae" i?

²Gaigai: airu: mangad:- Qobo we' shid: gao: va" mo, ngonhaung" wa qobo khug mae khoru: mung: kao so' qo" gai: daui nae" i?

³Pe"mung:ga"re ngonhaung" wa Yesu Khristu we' dagaung dasho: za: doe, nae" qhid' mae" qid nyhab' kham: yu: ra" au:- yao: we' daga" boshid kham va" rure naonhaung" gaigai: yao: ba: ako".

⁴Airumung: Yesu wa yao: Pho" phungbao qam: so' khyo" yang shid: rumae" dam: daui: to" li" nhao: ru qhug' ru we' dakhyo:- ngonhaung" re: kao so' daui khyo asag' re kao so' qo" daui: na nae" qhid' mae"- ngonhaung" qid nyhab' kham: yu: ra" khyo" Yesu yao" shid kham" rumae bobo mung: yao: we' daga" nyhab' pye' ru qhug' bam va".

⁵Pe"mung:ga"re ngonhaung" wa yao: we' daga" yao" shid: rumae yao: we' boshid va" ru we' dakhyo:- yao: re daui: to" li" nhao: ru qhug' rumae ngonhaung" re: yao: we' daga" daui: to" li" nhao: ru qhug' nae" ngad: ra".

⁶Amung: qobo kad' nae" kao bau: ra" myid qam: so' re se' pye' mung: ngonhaung" wa qobo: nho: jeim maboe" na lo nae" qhid' mae" ngonhaung" nho: qobo gaung byuxug' wa Khristu we' daga" pyao: zang dao mae bose' pye' ru qhug' va" rure ngonhaung" ba: ra". Airumung: ngonhaung" wa qobo: nho: jeim magai: boe" na lo:ngad: ra".

⁷Pe"mung:ga"re byu dayaug yaug wa shid: au:- yao: wa qobo: qam: so' lo, mae" lhoe' ke' byid' ru qhug' ra".

⁸Ngonhaung" wa Yesu we' daga" shid kham: va" ruyang ngonhaung" re: yao: we' daga" kao so' daui: li" nae" ein: myid: lam: ra".

⁹Pe"mung:ga"re Khristu wa shid: rumae" dam: daui: to" li" nhao: ru qhug' va" rumung:- thao phyao: khonhae" re: madam: shid lo nae". Shid: ru wa yao: re maqo" eib lo nae" rure ngonhaung" ba:.

¹⁰Airumung: yao: shid kham: va" ruyang qobo wa yao" dao mae maqo" eib: na lo:ngad: ra". Ana"- yao: wa Mao"So we' zam" khug yang: kao so' daui: na: ra".

¹¹Ai we' dakhyo: qobo we' sin: yang: ta" gelang: ga" re- naonhaung" yao" gaung re shid va" khyo" myid: jho: yu ca" ako". Ngadqere: Yesu Khristu khyo" yang Mao"So we' zam" khug: daui: na: ein: myid: jho: na ge,.

¹²Airumung: naonhaung" wa naonhaung" yao" gaung sho: obyid: ra" khyo re cao" ye: sho'- qobo wa naonhaung" shid ba: ra" gaung dau re ana" mae" daeib nhao loge,-

¹³Naonhaung" yao" gaung dau khodau rere: makhyang" ra" khyo mae dadaui nhao ge,. Naonhaung" wa shid: rumae" dam: daui: to" li" va" mo, ngad: ru we' dakhyo:- naonhaung" gaung geim" re Mao"So re qhaug' byid: mung: din:man" ra" khyo re ci nae" qhid' mae" naonhaung" yao" gaung dau re Mao"So re ab byid: ge,-

¹⁴Qobo re naonhaung" Asang dakad' nhao ge,- pe"mung:ga"re naonhaung" wa kham" to" ra" Tarha" qao: mae na mo, mangad:- Mao"So: nhag' myan" ra" jeju qao: mae na: ra" mo, ngad: ako".

¹⁵Airulao" wa- ngonhaung" wa kham" to" ra" Tarha" qao: mae mana lomung:- Mao"So: nhag' myan" ra" jeju qao: mae na mo, ngad va" ruyang qobo kad' nae" i? Airu: dajhid' re: mangad:-

¹⁶Dayaug yaug jhao" mho dao: gyo: nae"- ga: naonhaung" yao" gaung re jeim khyo" yesang nhao: pye' lao"- naonhaung" wa naonhaung" mho dao: gyo: byid' ra" yaug; nho: jeim qe ngad ko" rure gaigai: yao: naonhaung" ba: ako".

¹⁷Pe"mung:ga"re daba naonhaung" wa qobo: nho: jeim qe boe" qu" vako" ra"- ngadqere: ana" wa- mho" shid' rumae naonhaung" kham: yu: ra" dangman" ra" khyo re naonhaung" aung khug nhag' lam: alhab' we' phug' cao" vako" ruyang Mao"So: jeju re caung:khin" byid' ra".

¹⁸Naonhaung" wa qobo: nho: jeim boe" na: rumae" lhoe' ke' byid' ru qhug' mung: din:man" ru nho: jeim qe boe" lo: avako".

¹⁹(Naonhaung" wa gaung sho: shad' mae azhao: mae" yao: laba lajhao mae qam: nang: mo, ngad ko" ruyang ba: gyo: laui: ra" dao: jham re ngo ci: ru ngad: ra".) Ganhae" naonhaung" wa- naonhaung gaung dau: alhab' re makhyang" ra" lo,mau" qhid' mae" masan masin" ru we' makhyang: mashab: ru: nho: jeim qe kad' nhao: lo: avako". Ai we' dakhyo:- ana"- naonhaung" gaung dau: alhab' re gyang" lho" ra" lo, mau" jham: qhid' mae" din:man" ra" khyo: nho: jeim qe kad' nhao ca" ko" ra".

²⁰Naonhaung" wa qobo: nho: jeim qe doe; na shiko" au:- din:man" rumae" loe; jo; ako".

²¹Ana" naonhaung" myid: qho' na ko" ra" naonhaung" kad' qu" vako" ra" mau" zo" jham mae" pe" ja" akyu" qo" kham: yu vako" i? Ai: mau" zo" jham: nho: athao wa shid: ru ngad: ra".

²²Ngadqere: naonhaung" wa ana"- qobo: lo, mae" lhoe' ke' byid' ru qhug' mung:- Mao"So: jeim qe boe" lo: avako". Naonhaung" qo" kham: yu: ra" akyu" wa- Mao"So: qhid' mae" yao: yao" gaung dau: geim" re qhaug' byid' ru we' apyad ato: kao so' qo" yu: ru ngad: ra".

²³Pe"mung:ga"re qobo: nho: aphug' wa shid: ru ngad: ra". Mao"So: nhag' myan" ra" jeju jhaung qhu" kam" wa ngonhaung" Asang Khristu Yesu we' dagaung dasho: boe" rumae apyad ato: kao so' ngad: ra".