Read Maru ROMA 7 Bible Online

ROMA 7 - Maru bible

ROMA 7

¹Nga" mao:nhaung: qe we"- naonhaung" wa tarha" khyo we' sin: yang: ba: to: mo, ngad ko" ruyang ana" ngo ta" kyo: nae" ra" khyo re naonhaung" nyang" za: ba: gyo" li" genae". Tarha" wa byu kao so' daui: na: ra" gu: mae za: eib: jo; ra".

²Dao: tau" tau" re- lo, xo' xo' va" ra" myiqe: dayaug wa yao" yham sang pho" daui: na: ra" gu: mae lo, xo' xo' ra" tarha" qao: mae yham sang pho" we' zham" to: qhug' ra". Ngadqere: yham sang pho" shid: byaug lao" wa- ai: lo, xo' ra" tarha" qao: mae" yham sang pho" we' zham" to: qhug' rumae" loe; beim: ra".

³Airumung: yao" yham sang pho" daui: na shi" au:- gatau: yauggai we' zam" na: ngad: re wa lao shad' ra" yaug- ga: yao: re mhang" li" genae"- ngadqere: yao" yham sang pho" shid thao re kam" wa tarha" vao su: myi: mangad' ra" myiqe: ngad mung: yauggai gatau dayaug we' dam: lo, xo' yu ngadqere: lao shad' yaug mangad: lo:ngad: ra".

⁴Mao:nhaung: qe we"- naonhaung" re: ceru we' dakhyo: ngad: ako"- Tarha" we' sin: yang: ta" gelang: ga" re naonhaung" re: shid va" mo, ngad: ako". Pe"mung:ga"re naonhaung" wa Khristu nho: gaung dau qe ngad: ako". Ngonhaung" wa Mao"So: mau" zo" mae akyu" bo: ra" mo, boe" nae" qhid' mae" ana" naonhaung" wa shid: rumae" dam: daui: to" li" ra" Khristu nho: byu qe boe" lo: ako".

⁵Pe"mung:ga"re ngonhaung" wa byu xao su gaung dau: shad' re cao" yang: kao so' daui: ra" au:- kham" to" ra" Tarha" yang nhug' byid: qhug'ra" qobo shad' lhoe" nug: ra" myid we' ngonhaung" kao so' daui: lo: bam va". Amung: ngonhaung" kad' ra" lo, mau" alhab' wa shid: rumae thao" lo" byaug va".

⁶Daba ngonhaung" re taui" lhaung" to" rumae" ngonhaung" shid: gao: va" ruyang ana" ngonhaung" wa- kham" to" ra" Tarha" mae" loe; beim: bam va". Airu: mung: ngonhaung" wa tung" to" ra" tarha" khyo axug' re macao" lo:- Gyang" Lho" Byo: nho: khyo asag' mae Mao"So re caung da" byid' na: ru ngad: ra".

⁷Airulao"- kham" to" ra" Tarha" airu yao: wa qobo ngad: ra"- ein: ngonhaung" ta" nae" i? Airu: magai: ta"- ngadqere: qobo ga" ru pe" ja: ngad: rure kham" to" ra" Tarha" wa ngore ba nhao: ra". Su gaje qe sang: ra" zai re myo, nyad o: dabyid wa,- ga: kham" to" ra" Tarha" mae mata" to: ngad: re wa myo, nyad obyid ru ga" ru pe" ja: ngad: rure ngo ba nae" mangad:-

⁸Ngadqere: qobo wa ai: kham" to" ra" Tarha" mae agu gai yu mung: nga" aung khug nhag' lam: mae kao bau obyid: ra" mau" zo" aja: aja: re boe" thug' li" nhao: ra". Tarha" majo, ngad: re wa qobo wa ashid ngad: ra".

⁹Daba wa ngoyao: re:- Tarha" re maba lo: kao so' daui: na: lo: qu" va"- ngadqere: kham" to" ra" Tarha" re ba lao" qobo wa daui: thug' li" mung: ngo wa shid: lo" ra".

¹⁰Kao so' daui nhao nae" qhid' mae" byid' ra" kham" to" ra" Tarha" wa nga" qhid' mae" wa shid: rure byid' ra".

¹¹Qobo wa agu qho: yu mung: ai: kham" to" ra" Tarha" khyo" yang ngore mhug' pyag' mung: yang: ngore se' pye' ra".

¹²Airu: mung: kham" to" ra" Tarha" yao: yao: wa gyang" lho" ra". Ai: amyin" dao: re: gyang" lho" ru we' dangman: mung: gai: ra".

¹³Airu: ngad: re wa- gai: ra" tarha" wa ngore shid nhao: ra" i? Mashid nhao ngad: ra"- ngore shid nhao: ru wa qobo ngad: ra". Qobo wa azhao: mae" yao: yao" ave, re qhu" shid' byid: nae" qhid' mae" gai: rure ci mung: ngore shid nhao: ru ngad: ra". Airumung: kham" to" ra" tarha" wa qobo wa matho' ka" losho' ngad: ra" magai: rure qhu" byid' ra".

¹⁴Kham" to" ra" Tarha" wa Byo we' sin" ra" khyo ngad: rure ngonhaung" ba: ra"- ngadqere: ngo wa qobo: nho: jeim shid ba: ra" byu dayaug ngad: ra".

¹⁵Ngoyao: kad' ra" lo, mau" re ngoyao: maba: gyo:- pe"mung:ga"re ngo kad' nug: ra" lo, mau" re ngo makad'- ngo nghang" ra" lo, mau" re za: kad' na yang: ngad: ra".

¹⁶Ngo wa ngoyao: manug: kad' ra" lo, mau" re kad' na: ruyang ce: lo, mau" wa kham" to" ra" Tarha" wa jo: ra"- ga" rure ngo bomyid vang" byid' ru ngad: ra".

¹⁷Airumung: ce: lo, mau" re kad' ra" yaug wa gaigai: yao: wa ngo mangad:- nga" khug mae bo: ra" qobo yaug kad' ru ngad: ra".

¹⁸Nga" gaung sho: nhag' lam: khug mae gai: ra" ru mabo: rure ngo ba:- pe"mung:ga"re nga" khug mae gai: ra" ja: kad' nae" kao bau myid bo: jo, ngadqere:maqo" zaui: ngad: ra".

¹⁹Ngo wa gai: ra" lo, mau" re kad' nug ngadqere: ngo makad' lo:- ngo manug: kad' ra" makhyang" ra" lo, mau" re za: ngo kad' ra".

²⁰Ngo manug: kad' ra" lo, mau" re ngo kad' re wa- ce: lajheim: wa ai: lo, mau" re kad' ra" yaug wa ngo mangad:- nga" nhag' lam: khug mae bo: ra" qobo yaug kad' ru ngad: ra".

²¹Airumung:- ngo kad' ra" mau" mae tarha" daja: re ngo the' myao: ra". Ai: tarha" wa gai: ra" mau" re ngo zaui: nug: ra" au:- magai: rure za: qo" khyin: yu: ra".

²²Nga" aung khug nhag' lam: wa Mao"So: tarha" re ngaui bau: ngaui yao za: khae: yu: ra".

²³Ngadqere: nga" gaung dau: khug mae nga" myid: yang ngaui: ra" tarha" re gye kad' na: ra" mange; ra" tarha" dalam: bo: jo; rure ngo the' myao: ra". Ai: tarha" wa nga" khug mae mau" zaui: mung: ngore qobo tarha" nho: kyam: byu kad' nhao: ra".

²⁴Dayin dayo: khyag' qhui: ra" ngoru" yaug we"- ngore shid: ru khyo jhui" ye" lo" naeva" ce: gaung khyao mae" ngore khag' yang khyad' yu naeva" laug i?

²⁵Ngonhaung" Asang Yesu Khristu khyo" yang ngore khyad' yu: ra" Mao"So: jeju wa qi" qhang: jo, vashao: wo"- Airumung: ngo boe" na: ra" khyo re ta" gelang: ein: re- ngo wa nga" myid khyo" yang za: Mao"So: tarha" re qo" caung da" byid: mung:- nga" nho: byu: gaung sho: shad' khyo" wa qobo: nho: tarha" re caung da" byid' ra".