Read Maru ROMA 8 Bible Online

ROMA 8 - Maru bible

ROMA 8

¹Yesu Khristu we' dagaung dasho: za: ngad: na: ra" mo; qhid' mae" wa dao: phyid' ru pe" majo, ngad: ra".

²Pe"mung:ga"re Yesu Khristu we' dagaung dasho: za: kao so' daui nhao: ra" Byo: nho: tarha" wa qobo: nho: tarha" mae" we' shid: ra" tarha" lo, mae" ngore lhoe' ke' byid' ra".

³Byu xao su qam: nang: yang: ai: kham" to" ra" Tarha" yang maqo" kad' byid' ra" mau" zo" re Mao"So: yang zaui: so: byid' ra". Mao"So wa qobo vin: pye' byid: nae" ngonhaung" we' dakhyo: qobo qo" ra" xao su byu qobo gaung khyao ve, vin: ra" yao" yao: zo: re nhao: ke' byid: mung: byu: gaung sho: mae qobo re dao: phyid' ra".

⁴Mao"So airu: kad' ru wa- ngonhaung" wa xao su byu: ave, khyo" mangad: lo:- Byo: nho: myid o: ra" khyo" kao so' daui: ra" mo, ngonhaung" mae kham" to" ra" Tarha" yang ta" to" ra" din:man" ra" khyo jham re jab byang" sho' boe" thug' li" nae"qhid' mae" kad' ru ngad: ra".

⁵Byu xao su gaung sho: o: ra" khyo" kao so' daui: ra" mo, wa- gaung sho: we' sin" ra" ja: re za: nhag' nghae" jo; ako". Byo o: ra" khyo" kao so' daui: ra" mo, wa- Byo we' sin" ra" ja: re za: nhag' nghae" jo; ako".

⁶Gaung sho: we' sin" ra" ja: re nhag' nghae" ra" mo, wa shid: ru khyo joe" ako". Byo we' sin" ra" ja: re nhag' nghae" ra" mo, wa kao so' daui: ru we' ngaui pyo: yaug yo: ra" khyo re qo" yu: ako".

⁷Airumung: gaung sho: we' sin" ra" ja: re nhag' nghae" ra" yaug wa Mao"So: gyevo boe" li" ra". Pe"mung:ga"re yao: wa Mao"So: tarha" re maphug' cao" ngad: ra"- gaigai: ga" re yao: wa aire maqo" phug' cao" ngad: ra".

⁸Gaung sho: o: ra" khyo re cao" ra" mo, wa Mao"So re maqo" ngaui nhao ko" ngad: ra".

⁹Ngadqere: Mao"So: Byo naonhaung" khug mae daui: na: ngad: re wa- naonhaung" wa gaung sho: o: ra" khyo" kao so' madaui lo:- Byo o: ra" khyo" kao so' daui: ako"- Khag' ngadqere: Khristu nho: Byo maqo" ra" yaug wa Khristu we' masin: ngad: ra".

¹⁰Naonhaung" khug mae Khristu na: jo; ngad: re wa- qobo: mathao mae naonhaung" gaung dau: shid: lo" ca" nae" ngadqere: Byo wa kao so' daui: na nae" ngad: ra". Pe"mung:ga"re naonhaung" wa- Mao"So: yang din:man" ra"- ga: sun" yu: ru qhug' avako".

¹¹Yesu re shid: rumae" dam: daui: to" li" nhao: ra" Mao"So: Byo naonhaung" khug mae na: ngad: re wa Khristu re shid: rumae" dam: daui: to" li" nhao: ra" Mao"So wa naonhaung" khug mae na: jo; ra" Yao" Byo khyo" yang naonhaung" shid ba: ra" gaung khyao rere: kao so' daui nhao: li" nae".

¹²Airumung:- Mao:nhaung: qe we"- ngonhaung" wa qo qo" ra" mo, ngad: ra"- ngadqere: ai wa ngonhaung" gaung sho: o: ra" khyo" kao so' daui nae" ra" qo mangad:-

¹³Pe"mung:ga"re naonhaung" wa gaung sho: o: ra" khyo" kao so' daui: ngad: re wa- naonhaung" wa shid: li" genae". Ngadqere: yao" Byo: yang naonhaung" qobo lo, mau" jham re se' pye' ko" ngad: re wa naonhaung" kao so' daui: na: li" genae".

¹⁴Mao"So: Byo: yang khyoqhid' au: she byid: qhug' ra" mo, wa Mao"So: zo: dau qe ngad: ako".

¹⁵Pe"mung:ga"re Mao"So: yang naonhaung" re byid' to" ra" Byo wa naonhaung" re jeim boe" nhao: ru mangad:- Gyaug: ra" myid rere: maboe" nhao ngad: ra". Ai: atha" Ai: Byo wa ngonhaung" re Mao"So: yao: zo: qe boe" nhao yang:- ai: Byo: nho: qam: so' khyo" yang ngonhaung" wa Mao"So re- Pho" we"- nga" Pho" we"- ga: qo" yao: ra" akhang" re qo" yu ra".

¹⁶Ngonhaung" wa Mao"So: zo: dau qe ngad: rure sagse: kham byid: nae" qhid' mae" Mao"So: Byo yao: re: ngonhaung" byo we' daga" qhan: yang: sagse: kham byid' ra".

¹⁷Ngonhaung" wa Mao"So yao" zo: dau qe ngad: ruyang yao" byu qe: qhid' mae" jaung: to" ra" shaman" jeju re ngonhaung" qo" sang: yu: li" nae". Khristu qhid' mae" Mao"So jaung: to: byid' ra" phungbao rere: yao: we' daga" ngonhaung" qo" sang: yu: li" nae". Pe"mung:ga"re ngonhaung" wa Khristu nho: dayin dayo: kham zo" rumae bobo: ngad: re wa yao" phungbao mae re: ngonhaung" qo" bokham: yu: li" nae".

¹⁸Ana"- ce: pyad mae ngonhaung" dayin dayo: kham zo" ru wa thao phyao: ngonhaung" re qhu" byid: nae" ra" phungbao we' dajhid' re: maqo" tho' gai: tau"- ein: ngo myid: ra".

¹⁹Phan" to" ra" gu: alhab' wa- Mao"So: zo: dau qe de: de: qhu" byid' thug' li" nae" rure mamyan: makhyad' kao bau yang: lao" na: bam: ako".

²⁰Pe"mung:ga"re phan" to" ra" gu: alhab' wa akeim boe" nae" qhid' mae" dao: phyid' ra". Airu: boe" ru wa phan" to" ra" gu alhab' nho: myid o: ra" khyo" boe" ru mangad:- Mao"So: myid o: ra" khyo" boe" nhao: ru ngad: ra".

²¹Ngadqere: phan" to" ru wa daba na re byo; qeim: lo" ra" khyo mae" loe; beim: ru qhug' mung: Mao"So: zo: dau qere: phungbao bo: ra" loe; beim khyo re qo" bokham: yu: li" nae"- ga" rure myid: lao" nae" jo; ra".

²²Pe"mung:ga"re phan" to" ra" gu: alhab' wa ana" ba joe" sho' zo:khau no we' dakhyo:- no mung: nokyang: kyang" na: rure ngonhaung" ba: ra".

²³Ngadqere: phan" to" ra" gu: za: nokyang: kyang" na: ru mangad:- Mao"So: sao qhid' jeju jhaung qhu" ngad: ra" Byo re qo" kham: yu: ra" mo, ngonhaung" re:- Mao"So: yao: zo: toe' yu: ru qhug' nae" we' ngonhaung" gaung geim" khyad' yu: ru qhug' nae" rure lao" mung: nokyang: kyang" na: bam: ra".

²⁴Pe"mung:ga"re ngonhaung" wa myid: lao" ra" khyo" yang khyad' yu: ru qhug' ra"- ngadqere: ngonhaung" myid: lao" rure ngonhaung" qo" myao: ngad: re wa ngonhaung" myid: lao" ru wa gaigai: myid: lao" ru mangad:- pe"mung:ga"re qo" myao: ra" ja: re khoyaug myid: lao" ra" i?

²⁵Ngonhaung" wa maqo" myao: ra" ja: re myid: lao" na: ngad: re wa- ngonhaung" wa aire nhag' lam: qhang qhang za: lao" na: ra".

²⁶Ai we' dakhyo: Byo re: qam: nang" ra" ngonhaung" re bao" thaug' byid: nae" qhid' mae" joe" li" ra". Ngonhaung" wa akyu" khoru: mho' ca" rure maba- nhad' dao: thoe: yang maqo" ta" thug' ra" nokyang: kyang: thoe we' ai: Byo yao: ngonhaung" qhid' mae" Mao"So re bao" mho' byid' ra".

²⁷Ngonhaung" nhag' lam: re myao: kyao" ra" Mao"So wa Byo: nho: myid rere: ba: ra". Pe"mung:ga"re Byo wa Mao"So myid o: ru we' dakhyo:- yao" byu qe: qhid' mae" Mao"So re mho' yao byid' ra".

²⁸Mao"So wa yao: yao: re jhid'de; ra" yao" myid: yaung: to" ra" khyo re cao" yang: khai: yu: ru qhug' ra" ngonhaung" we' daga" ja: khao: ngo" mae gai: ra" khyo" boe" sho' bokad' na: rure ngonhaung" ba: ra".

²⁹Yao: Zo: wa mao:nhaung: qe myo: sho' phaung mae mao: mo" boe" nae" qhid' mae" Mao"So wa yao: khyin: yu: to: va" ra" mo, re yao: Zo: we' dakhyo: dau: ru boe" li" nae" gatau khyin: san: yu: to" ava".

³⁰Airumung: Mao"So wa yao: gatau khyin: san: yu: to: va" ra" mo, re khai: yu: ra". Airu: khai: yu: ra" mo, rere: Mao"So wa yao: bam re din:man" ra"- ga: sun" yu byid' ra". Amung: yao" phungbao rere: yao: bam re bomyho" kham zo: nhao: ra".

³¹Cegu: alhab' re qu" yang: ngonhaung" pe" ta" nae" i? Mao"So wa ngonhaung" shad' mae na yang: ngad: re wa ngonhaung" re gye khag' qo" kad' nae" i? Mao"So wa gai: gai: yao: ngonhaung" re gye kad' nae" mangad:

³²Mao"So wa yao" yao: Zo: re lhao" re: o: mabyid lo:- ngonhaung" alhab' mo; qhid' mae" yao: re ab byid' pye' ava". Ngonhaung" qhid' mae" yao: Zo: re lhao" re: ab byid' pye' ra" yaug wa- ja: khao: ngo" rere: mabyag lo: ngonhaung" re byid' li" nae" mangad: i?

³³Mao"So khyin: yu: to" ra" mo, re qobo khag' qo" zhaug' nae" i? Yao: bam qobo maqo" rure Mao"So yao: ta" hau" pye' ava".

³⁴Airumung:- yao: bam re khoyaug dao: qo" phyid' nae" i? Khristu Yesu wa ngonhaung" re dao: phyid' nae" mangad:. Shid kham: byid: mung: shid: rumae" daui: to" li" ra" Yesu Khristu wa Mao"So: lo, yo shad' mae zaung: jo, yang: ngonhaung" qhid' mae" Mao"So re mho' yao byid' na: ra".

³⁵Airumung: Khristu nho: jhid'de; myid mae" ngonhaung" re khag' qo" kao" pye' byid: nae" i? Qug: khai: qhug' ru- myid: qug: myid: ci" qhug' ru- yhin" qhug' ru- moe, shab' qhug' ru- myaung sho" ru we' se' pye' qhug' ru jham wa Khristu nho: jhid'de; myid mae" ngonhaung" re qo" kao" pye' nae" i?

³⁶Jham: Mugsug' mae- Ni" mathao mae ngonhaung" wa ba khao: ba ngo" mae shid gyan nogyan we' jho" qhug' na: ra"- Se' pye' nae" jaung: to" ra" yao jham re we' dakhyo:- ngonhaung" re kad' to" ako"- ga: tung" to" ru we' dakhyo: ngad: ra".

³⁷Ngonhaung" re maqo" kao" pye' nae"- ngonhaung" re jhid'de; ra" Khristu khyo" yang ai: gu: alhab' re ngonhaung" wa nyang" za: aung doe; pye' va" ru ngad:-

³⁸Pe"mung:ga"re- yao" jhid'de; myid mae" pe" ja" yang re: ngonhaung" re maqo" kao" pye' ngad: ra". Shid: ru ngadqere:- daui: ru ngadqere:- mug: lagyo: jham ngadqere:- Mug:gaung kheim: so' qo" mo, ngadqere:- ana" pyad ngadqere:- joe" lo nae" pyad ngadqere:-

³⁹mug:gaung tho' pyae ngadqere:- myid gaung o: pyae ngadqere:- phan" to" ra" gu: alhab' pe" ja" yang ngadqere:- ngonhaung" re ngonhaung" Asang Yesu Khristu khyo" yang qhu" byid' ra" Mao"So: jhid'de; myid mae" maqo" kao" pye' byid' rure ngo jhaug' za: ba: ra".