Read Maru ROMA 9 Bible Online

ROMA 9 - Maru bible

ROMA 9

¹Ngo wa din:man" ra" dao: re jhau: na: ra". Ngo wa Khristu yang sang yaug ngad mung: mamhug'. Nga" nhag' lam: khug mae nga" byumyu"- nga" sho:- nga" sa: qe: qhid' mae" khoqhi" sho' kaug' ru we' mathang mano: dayin dayo: no: ra" khyo re- ta" au: ngo mamhug' rure Gyang" Lho" Byo: yang eib: ra" nga" aung khug myid: yang re: ngore jhaug' za: ba nhao: ra".

³Yao: bam khyad' yu: ru aqhug' genae" ngad: re wa ngo yao: wa Mao"So: nhang: kheim: re kham: yu mung: Khristu mae" kao" pye' ru qhug' nae" rure lhao" re: ngo kham: yu nug: ra".

⁴Yao: bam wa Mao"So: byu qe ngad: ako". Mao"So wa yao: bam re yao: zo: toe' yu: ru we' yao" phungbao yao: bam re qhu" byid' ra". Yao: wa yao: bam we' dao: thang" to: mung: yao: bam re Tarha" byid' ra". Yao: bam wa jo: ra" caung:pa" khyo re we' Mao"So: dao:so: jham re qo" khae: yu: ako".

⁵Yao: bam wa mang qi" ra" Hebre phug' pho" qemae" myhung: gyo" li" mo, ngad: ako". Khristu wa xao su byu khyo" yao: bam: byumyu" kaung mae bobo: ra". Alhab' re eib: na: ra" Mao"So wa khonhae" re: caung:khin" byid' ru qhug' vashao:- Amen.

⁶Mao"So: dao:so: wa akeim boe" byaug: ra" ein: ngo ta" na: ru mangad:- pe"mung:ga"re Israel byumyu" alhab' wa Mao"So: byumyu" qe mangad: ko" ngad: ra".

⁷Abraham mae" gyo" li" ra" mo, alhab' ngadqere: Mao"So: zo: dau qe mangad:- Mao"So wa Abraham re- Nao wa Isag khyo" yang nao re ngo dao:so: byid' to" ra" myid:zo: qe qo" li" nae"- ga: ta" ra".

⁸Ceru: ga" ru wa gaung sho: khyo khyo" khau: li" ko" ra" zo: dau qe wa Mao"So: zo: dau qe mangad: ko" ngad" ra". Ai: atha" Mao"So: dao:so: khyo" yang khau: li" ko" ra" zo: dau qere za:- zogyang" dau gyang" khyo" sun" yu: ra".

⁹Pe"mung:ga"re Mao"So wa- ayo, byang" lao"- ngo dam: joe" li" nae"- aimung: Sarah wa yauggai zo:khau: li" li" nae"- ga: re: dao:so: byid' to" ra".

¹⁰Cetho' mae- Rebekha nho: yauggai zo: tao wa yao: pho" dayaug za: qo" ako". Aiwa ngonhaung" nho: phug' pho" Isag ngad: ra".

¹¹Ngadqere: yauggai zo: dayaug re khyin: yu: ru wa- Mao"So: myid: yaung to" ra" khyo" za: ngad: rure qhu" byid: nae" qhid' mae" yao: wa Rebekha re- mao: mo" yaug wa yao: nhaung: yaug re caung da " byid' li" nae"- ga: ta" ra". Yao: ceru ta" ru wa- yao: shid' tao makhau shimae" yao: shid' tao agai- aqeim pe" re: maba: kad' shi: gere ta" ru ngad: ra".

¹²Airumung: Mao"So: yang khyin: yu: ru wa- yao" yang khai: yu: rumae apan to: mung: yao: bam pe" kad' va" rumae apan mato: ngad: ra".

¹³Jham: Mugsug' mae ngo wa Yaku re jhid'de; ngadqere: Eso re wa ngo nghang" ra"- ga: ta" to" ru we' dakhyo: ngad: ra".

¹⁴Airumung: Mao"So wa matarha" ngad: ra" ein: ngonhaung" ta" nae" i? Dajhid' re: magai: ta".

¹⁵Pe"mung:ga"re Mao"So wa Moshe re ngo wa ngoyao: nug: ra" yaug re jeju kad' nae"- ngoyao: nug: ra" yaug re nhag' khyag' nae"- ga: ta" ra".

¹⁶Airumung: ja: khao: ngo" wa byu myid o: ra" rumae we' byu: lo, mau" dao mae apan aqao: mato: ngad: ra". Mao"So: nhag' khyag' shogu: rumae za: apan aqao: to" ra".

¹⁷Pe"mung:ga"re Jham: Mugsug' mae Egutu kho:kham re- Nao re ngo kho:kham kad' nhao: ru wa nga" qam: so' re qhu" byid: nae" rumae ci nae" we' mug: myid geim" mae nga" mang hau" nhao" ke' nae" qhid' mae" ngad: ra"- ga: ta" ra".

¹⁸Airumung: Mao"So wa yao: nug: ra" yaug re jeju kad' byid: mung:- yao: nug: ra" yaug re nhag' lam: qao nhao: ra".

¹⁹Ceru: ngad: re wa- Mao"So wa byu dayaug yaug re khoru: qobo qo" vhin nae" i? Mao"So: myid o: rure khag' thaug' tam" nae" i? ga: naonhaung" mae" dayaug yaug ngore ta" li" genae".

²⁰Nga" ba nam pho" we"- nao wa khag' ngad mung:- Mao"So re airu: dao: tau: tau" i? Zhogam: ug' wa yao: re kad' ra" yaug re nao ngore pe"mung: ceru: kad' to" i? ga: mamyid: ngad: ra".

²¹Ta" gelang: ein: re zhogam: ug' kad' ra" yaug wa myid zhai: re yao: o nug: ra" khyo" kad' nae" we'- yao: wa myid zhai: dathaung: mae" za: zhogam: ug' shid' lam: kad' mung:- dalam: re wa akhyag: rumae ci nae"- dalam re wa yu" yu" ci nae" qhid' mae" kad' nae" akhang" jo; ra".

²²Mao"So re: ai we' dakhyo: kad' to" ra". Yao" nhag' yo" rure qhu" byid: mung: yao" qam: so' re ba nhao nug: ra". Ngadqere: yao" nhag' yo" rure kham zo: mung: jeim" lo" nae" mo; dao mae yao: wa gyai nhag' lam: qhang: ru we' zang: kham byid' ra".

²³Yao: wa yao" magan: mago" ra" phungbao rere: qhu" byid: nug: ra". Aiwa- yao" phungbao re qo" yu nae" qhid' mae" yao: nyhang" jaung: to" ra" yao" nhag' khyag' shogu: rure khae: yu: ra" ngonhaung" dao mae vhe' sheim" ke' ra" phungbao ngad: ra".

²⁴Pe"mung:ga"re ngonhaung" wa yao" yang khai: yu: to" ra" mo, ngad: ra". Yao: wa Yuda byu qemae" za: mangad:- Taung bug byumyu" qemae" re: khai: yu: ra".

²⁵Mao"So wa Hosea Mugsug' mae- Nga" amyu" kaung mangad' ra" mo, re ngo wa nga" amyu" kaung qe ein: mhang" nae". Ngo majhid'de; ra" byumyu" re nga" jhid'de; ra" byumyu" ein: ngo mhang" nae".

²⁶Naonhaung" wa nga" amyu" kaung qe mangad:- ga: naonhaung" re ta" ko" ra" jo, qo mae yao:- yao: bam wa kao so' daui: ra" Mao"So: yao: zo: qe ga: mhang" ru qhug' li" genae"- ga: ta" to" ra".

²⁷Amung: Esaia wa- Israel byumyu" khyo we' sin: yang:- Israel byumyu" qe wa panglai: qid yae mae" ma coe nho" myo" laug gesho' ngadqere: yao: bam mae" damyo" za: khyad' yu: ru qhug' genae".

²⁸Pe"mung:ga"re- Asang wa myid gaung byu qe alhab' mo, re phyad za: dao: kho' nae" ngad: ra"- ga: ta" ra".

²⁹Ai: ru wa qam: so' bo: thao" ra" Asang wa ngonhaung" myid:zo: qe damyo" re matang" to: byid: ngad: re wa- ngonhaung" wa Sodom vogaung: we' Gomora vogaung: byu qe we' dakhyo: qobo dae qo" kham zo: nae" ngad: ra" ga: qhid' phyao: Esaia ta" to" ru we' dakhyo: ngad: ra".

³⁰Airumung: ngonhaung" ta" ru wa- jo: ra"- ga: Mao"So sun" yu byid' ru qhug' nae" qam: make' ko" ra" Taung bug byu qe wa lam khug: ra" khyo" yang jo: ra"- ga: Mao"So: yang sun" yu byid' ru qhug' ako".

³¹Mao"So: amyu" kaung qe wa jo: ra"- ga: Mao"So: yang sun" yu byid' ru qhug' nae" ra" tarha" re cao" gengadqere: ai: tarha" re mamyao ko" ngad: ra".

³²Pe"mung: mamyao ko" ra" i? Pe"mung:ga"re yao: bam wa lam khug: ra" myid re mangha lo: yao: bam: lo, mau" re ngha gemung: yang: ngad: ra". Airumung: yao: bam wa Jham: Mugsug ta" to" ra"- tha" lang: laug baui mae tha" lang" ako".

³³Jham: Mugsug' mae- Qu" wa, (<Ngo wa Ziun bam mae byu qe tha" lang: genae" ra" laug baui dabaui to: byid' ra". Byu qe wa ai: laug baui mae tha" lang: yang: gyang: lang" lo" li" genae". Ngadqere: yao: re lam" ra" yaug wa qam: gyug: qam: shan: ru maqhug' nae"- ga: ta" to" ra".