Read Maru 1 KORINTHU 10 Bible Online

1 KORINTHU 10 - Maru bible

1 KORINTHU 10

¹Nga" mao:nhaung: qe we"- Moshe thao cao" ko" ra" ngonhaung" phug' pho" qe khoru: boe" lai: lo ko" ra" khyo re ngo naonhaung" re myid: beim: nhao nug: ra". Yao: bam wa jham thaui" yang khyoqhid' au: she gug: gam byid' ra" qao: mae su: mung:- yao: bam alhab' mo, ai: Tham: Ne khyo" pe" maqo lo: qo" lai: phyid' lo" ako".

²Yao: bam alhab' mo, wa- jham thaui: we' Tham: Ne mae Moshe nho: mho"zo: qekhyo" qid nyhab' kham: yu: ako".

³Yao: bam alhab' mo, wa byo zo:ve daja: re za: zo: mung:- byo shaug' pho: daja: re za: shaug' lo: ako".

⁴Yao: bam we' daga" su: mo, alhab' wa- byo we' sin" ra" laung: mo" baui mae" qid shaug' ako"- ai: laung: mo" baui wa Khristu yao: ngad: ava".

⁵Ngadqere: yao: bam mae" myo: lo bug re Mao"So ma- o mangaui mung:- yao: bam wa din"pyad' yo mae shid: myi" sin" lo" ako".

⁶Ana"- cejham alhab' wa yao: bam we' dakhyo:- makhyang" ra" mau" jham re kao mabau: nae" qhid' mae" we' yao: bam mae" damyo" we' dakhyo:- sulho re macaung:pa" nae" qhid' mae" ngonhaung" re ta" peim: byid' ra" ve, so: ngad: ra".

⁷Yao: bam sulho re caung:pa" ko" ru we' dakhyo:- ngonhaung" wa sulho re macaung:pa" nae" qhid' mae" re:- ngonhaung" re ta" peim: byid' ra" ve, so: ngad: ra". Byu jham wa zo: shaug' zaung: jo, mung:- shaug' yid: to" li" yang: go" pyo: mung: gaung sho: jho" zam" ako"- ga: jham: mugsug' mae tung" to" ru we' dakhyo: ngad: ra".

⁸Ngonhaung" wa yao: bam mae" damyo" re" ru: gaung sho" nho: gintho' mau" magai: cao" ngad: ra". Daba na mae za: yao: bam mae" byu shid' tug: sam taung gyang: shid: lo" byaug: ako".

⁹Ngonhaung" wa yao: bam mae" damyo"- Moshe re jham" qu" ko" ru we' dakhyo:- Asang re lag magai: yu: qu" ngad: ra"- yao: bam wa lhao maui: yang thoe" se' pye' ru qhug' ako".

¹⁰Ngonhaung" wa yao: bam mae" damyo" re" ru: magai: nyhung ngad: ra". Yao: bam wa Shid: ru: Lagyo: Pho" lo; yang se' pye' ru qhug' ako".

¹¹Yao: bam mae boe" lo: ja: ai: gu: alhab' wa gaje qe: qhid' mae" ve, so: ngad mung:- ai: gu: wa ngonhaung" re ta" peim: byid' ra" khyo" tung" to" ru ngad: ra". Pe"mung:ga"re ngonhaung" wa- lo" thao" ba na jhao" li" na: ra" ayo, mae kao so' daui: na: bam yang: ngad: ra".

¹²Tang za: ye; jo, yaug ngad:- ga:- myid: jho: ra" yaug khag' ngadqere: yao: magyang: lang" lo" nae" qhid' mae" lha" qo: ra".

¹³Naonhaung" thaung" qhug' ko" ra" jham" qu" ra" ja: wa- byu alhab' mo, thaung" qhug' qu" ra" jham" qu" ra" ja: za: angad: ra". Mao"So wa yao: yao" dao:so: re jhaug' zaug yaug ngad mung:- naonhaung" qo" kham: ra" qam: tho' je yang: yao: naonhaung" re jham" qu" ru qhug' nhao nae" mangad:- naonhaung" jham" qu" ru qhug' ra" ba na mae- yao: wa naonhaung" re qo" zang: qhao" nae" qam: o: byid' li" nae"- Airumung: ai: jham" qu" rumae"- naonhaung" loe; beim nae" pyi" phung" byid'li" nae".

¹⁴Airumung: nga" jhid'de; ra" ba nam qe we"- Sulho re caung:pa" ra" khyo re jao" pye' ge,.

¹⁵Ngo wa naonhaung" re pha,jhi" bo: ra" mo, re we' dakhyo:- ta" na: ru ngad:- ngo ta" na: ra" dao: re naonhaung" yao: gyo" kho' yu ge,-

¹⁶Ngonhaung" wa Asang: myi" xeim zo: poe keim re jeju caung:khin" yang: aimae" ngonhaung" shaug' lao"- ngonhaung" wa Khristu sa: mae zam" khug: na: ru ngad: ra". Aimung: ai: mug re phai" yang: ngonhaung" zo: lao" re:- ngonhaung" wa Khristu nho: gaung we' zam" khug: ru ngad: ra".

¹⁷Mug wa dakhai" za: ngad mung:- ngonhaung" alhab' mo, wa myo: sho' ngadqere: ai: mug dakhai" mae za: zam" khug: na: ruyang- ngonhaung" wa dagaung dasho: za: ngad: ra".

¹⁸Israel byumyu" qere myid: qu" ge,- Ngaui" byid' ra" xeim: sho: zo" ra" mo, wa- ai: phan dao mae Mao"So re ngaui" byid' rumae bobo: ako".

¹⁹Airumung:- sulho- mangad: lao" sulho re kug' byid' ra" zo:ve wa akhyag ngad: ein: ngo ta" nug: ra" i?

²⁰Airu: mangad:- ngo ta" na: ru wa Mao"So re malam khug: ra" mo; phan mae kug' byid' ra" xeim: jham wa yui jham re kug' byid' ra" xeim: jham ngad mung:- Mao"So re ngaui" byid' ra" xeim: jham mangad: ein: rure ngo ta" nug: ru ngad: ra". Ngo naonhaung" re yui jham we' zam" khug: ra" mo, maboe" nhao nug-

²¹Naonhaung" wa Asang: nho: sabyi keim we' yui: nho: keim re daga" za: magai: shaug' ngad: ako"- amung: naonhaung" wa Asang: nho: zojaung: mae we' yui: zojaung: mae daga" za: magai: zo: ngad: ra".

²²Ngonhaung" wa Asang re myid nug: nhao nae" i? Ngonhaung" wa Asang tho' je: qam: bo mo, ngad: ein: myid nae" i?

²³Byu: tarha" dao: wa- ngonhaung" pe" ja: re: gai: kad'- ga: ta" ako". Aiwa dang: ra". Ngadqere: ja: khao: ngo" wa gai: ru mangad: ngad: ra". Ngonhaung" wa pe" ja: re: gai: kad' ra" akhang" qo" ngadqere:- ja: khao: ngo" wa ngonhaung" re akyu" mabyid: ngad: ra".

²⁴Khag' ngadqere: yao: yao" akyu" re za: daqho ge,- Su gaje: qhid' mae" kam" wa qho ge,

²⁵Gai jao: mae aung" to" ra" pe" ja" sho: re ngadqere: naonhaung" galin: gago: gai: zo" ako". Naonhaung" nho: aung khug nhag' lam: aug' o: yang: aire damyid: daca ge,

²⁶Pe"mung:ga"re jham: mugsug' mae- Myid gaung we' aimae" ja: khao: ngo" wa ai: Asang: nho: ngad: ra" ga: ta" to" ra".

²⁷Malam khug: ra" byu dayaug yaug: yang naonhaung" re zo: poe khai mung: naonhaung" ye: nae" myid: phyid' gelao" wa- ye: ge,. Naonhaung" qhid' kheim: mae da" byid' ra" gu: alhab' re zo: ge,- naonhaung" myid aug' o: yang: dao: myid: pe" damyid: daca ge,-

²⁸Ngadqere: dayaug yaug wa- Ce: sho: wa sulho re kug' byid' ra" sho: ngad: ra"- ga: ta" lao" wa- airu: ta" kyo: byid' ra" yaug: mathao mae we' aung khug nhag' lam: aug' o: myid mazai" qheim" byid: shao:- ai: sho: re dazo: ge,.

²⁹Airu wa naonhaung" aug' o: myid re ta" ru mangad:. Gatau dayaug: nho: aug' o: myid re ta" ru ngad: ra". Naonhaung" mae" dayaug yaug wa- aire nga" galin: gago: akhang" re gatau dayaug: nho: aug' o: myid: yang pe"mung: kham" pye' ang nae" i? ga: myid: ba: ra".

³⁰Ngo wa nga" zo:ve qhid' mae" Mao"So: jeju re caung:khin" yang: zo" ra". Pe"mung: yang: ngo jeju caung:khin" ra" zo:ve we' sin: yang: ngore gaui mho nae" de; i? ga: myid' li" nae".

³¹Gai va"- naonhaung" wa zo: ngadqere:- shaug' ngadqere:- pe" kad' ngadqere: Mao"So: phungbao qhid' mae" kad' ge,-

³²Yuda byu qere ngadqere:- Taung Bug Byu qere ngadqere:- Mao"So: phung: re ngadqere:- aqug: akhai: maboe" nhao lo: kao so' daui ge,-

³³Ngo kad' ru we' dakhyo: cao" kad' ge,- ai ru: ngo wa byu jham khyad' yu: ru qhug' genae" qhid' mae" ngo kad' ra" mau" zo" alhab' mae nga" akyu" re mamyid lo:- alhab' mo; akyu" re myid yang: yaug khao: ngo" re ngaui nhao va".