Read Maru 1 KORINTHU 11 Bible Online

1 KORINTHU 11 - Maru bible

1 KORINTHU 11

¹Airumung: ngo wa Khristu lag re qu" yu: ru we' dakhyo:- naonhaung" wa ngore lag qu" yu ge,.

²Naonhaung wa ngore khonhae" re: myid: beim: mung:- ngo ab byid: co' ra" ai: mho" shid' khyo re phug' cao" na ko" ruyang- ngo naonhaung" re khin" ra".

³Khristu wa yauggai yaug khao: ngo" nho: au: jhaung- yham sang pho" wa yao" yham sang myhi" nho: au: jhaung- Mao"So wa Khristu nho: au: jhaung ngad:- ga" rure kam" wa ngo naonhaung" re ba: gyo: nhao nug: ra".

⁴Airumung: caung:pa" ra" yo, khyin: mae yao" au: re nghoe' ci yang: akyu" mho'- mangad: lao"- mungdao: ta" ra" yauggai wa- Khristu re qho' phyo' ra" yaug ngad: ra".

⁵Amung: caung:pa" yo, khyin: mae- yao" au: re manghoe' lo: akyu" mho'- mangad: lao"- mungdao: ta" ra" myiqe: wa- yao" yham sang pho" re qho' phyo' ra" yaug ngad: ra". Yao: wa au: daung: myhaug' ci: ra" myiqe: we' pe" mashai" ngad: ra".

⁶Myiqe: wa yao" au: re manghoe' nae" ngad: re wa- yao" xae re myhaug' pye' ca" ra". Amung: myiqe: wa yao" au: myhaug pye' ru- yao" xae phyid' pye' ru wa yao" qhid' mae" qho' ja: ngad: re wa- yao" au: re nghoe' ci qo: ra".

⁷Yauggai wa Mao"So: khyao dau sulho we' phungbao- bao tang" ngad: ruyang yao" au: re nghoe' nae" madau ngad: ra". Myiqe: kam" wa yauggai: phungbao- bao tang" ngad: ra".

⁸Pe"mung:ga"re yauggai wa myiqe: mae" phan" to" ru mangad:- Myiqe: re kam" wa yauggai mae" phan" to" ru ngad: ra".

⁹Alao"- yauggai wa myiqe" nho: mathao mae phan" to" ru mangad:- Myiqe: kam" wa yauggai: mathao mae phan" to" ru ngad: ra".

¹⁰Airumung: mug: lagyo: qe: mathao mae myiqe: wa yao" yham sang pho" eib: ra" kheim: so' qao: mae na: rure qhu" byid: nae" qhid' mae" yao" au: re nghoe" ci qo: ra".

¹¹Ngadqere: Asang mae zam" khug: na: ra" ngonhaung" kao so' daui khyo mae yauggai wa myiqe: re ngha yang: na ca" ruwe' dakhyo:- myiqe: re: yauggai re ngha yang na ca" ra".

¹²Pe"mung:ga"re myiqe: re wa yauggai mae" phan" to" ru we' dakhyo:- yauggai wa myiqe" yang khau: ru ngad: ra". Ja: khao: ngo" re boe" jo, nhao: ra" yaug kam" wa Mao"So ngad: ra".

¹³Myiqe: wa yao" au: re manghoe' cilo:- caung:pa" phaung mae Mao"So re akyu" mho' nae"- dau nae" madau nae"- ein: rure naonhaung" yao: myid: kho' yu ge,-

¹⁴Xae qhang to" ru wa yauggai: qhid' mae" myo, nho nga: lao: sham: ra" khyo ngad: rure re:-

¹⁵ngadqere: myiqe" qhid' mae" kam" wa xae qhang to" ru wa yaung" shab: ru ngad: ra" ga: azhao: mae" naonhaung" re mho" byid' to" ra". Xae qhang: ru wa myiqe: re au: nghoe' khyo" byid' to" ru ngad: ra".

¹⁶Ce: khyo we' sin: yang: ngag nug: ra" byu dayaug yaug na: ngad: re wa- ngo wa yao: re- ngonhaung" re:- Mao"So: phung: jham re:- caung:pa" rumae airu: au: nghoe' ra" thung" mae" je yang: gatau: nho: thung" majo,- ein: za: ta" nae" ngad: ra".

¹⁷Ngadqere: o mae" mho" shid' khyo jham mae naonhaung" re makhin" nae"- pe"mung:ga"re naonhaung" caung:pa" ra" phaung wa agai tho' aqeim re je: boe" nhao: na geyang: ngad: ra".

¹⁸Sao qhid' maqhid khyo"- naonhaung" phung: ham phaung jham mae majho" vang" ra" aqug: akhai: bo: rure ngo the' gyo" ra".

¹⁹(naonhaung" mae" jo: ra" mo, khag' ngad ko" ru de: de: za: myao: thug' li" nae" qhid' mae" ai: phung: jho" kho' ru wa naonhaung" phaung mae boe" thug' li" ca" ra".)

²⁰Naonhaung" daga" zang" ham: phaung: na ko" au:- Asang: nho: myi" xeim zo: poe re zo: nae" qhid' mae" phaung: na ko" ru mangad: ko" ngad: ra".

²¹Pe"mung:ga"re naonhaung" zo" ra" ayo, mae- yaug khao: ngo" nug yaug nug: khyo" yao: yao" myi" xeim re zo: mung:- vae: moe; mo, wa moe;- shaug' yid mo, wa shaug' yid mung: na: ako".

²²Naonhaung" airu: zo: shaug' nae" qhid' mae" yao: yao" yham maqo" ko" i? Mangad: lao"- Mao"So: phung: re maphug' makhyad' kad' mung:- myaung sho" ra" mo, re qho' phyo' nug ko" i? Cekhyo we' sin: yang: ngo naonhaung" re pe" ru: ta" li" nae" rure myid: lao" ko" i? Ngo naonhaung" re khin" nae" i? Gaigai: yao: ngo makhin".

²³Pe"mung:ga"re ngo naonhaung" re ab byid' ru wa- Asang mae" ngo khae: yu: ra" mho" shid' khyo ngad: ra". Asang Yesu wa ab: pye' ru qhug' ra" myi re mug yu: yu mung:-

²⁴Mao"So re jeju bin: caung: lao"- khyoe' phai" yang:- ce wa naonhaung" qhid' mae" byid' pye' ra" nga" gaung ngad: ra". Ngo re myid: beim: nae" qhid' mae" ceru kad' ge,- ga: ta" ra".

²⁵Ai we' dakhyo: myi" xeim bin: zo: thao re yao: wa keim re yu: yu mung:- ce: keim wa- nga" sa" yang dazid thaung" te' to" ra" Mao"So: dao: thang" asag' ngad: ra"- naonhaung" ai: re shaug' khao: ngo" ngore myid: beim: nae" qhid' mae" ceru: kad' ge,- ga: ta" ra".

²⁶Naonhaung" ce: mug re zo: mung:- ce: keim mae" shaug' khao: ngo" Asang: nho: shid kham: byid' ra" khyo re yao: dam: joe" li" ra" yo, joe" sho' naonhaung" ta" hau: byid' ako".

²⁷Airumung: khag' ngadqere: maman: maqi" lo:- Asang: mug re zo: mung:- Asang: keim mae" sabyi qang: re shaug' ngad: re wa- yao: wa Asang: nho: gaung re we' sa: re shad' lhoe" ra" yaug ngad: ra".

²⁸Airumung: yaug khao: ngo" wa yao: yao" gaung re shi" sao qhid' ca: qu" yang: mug re zo: mung: ai: sabyi'qang: re shaug' vageshao:-

²⁹Pe"mung:ga"re mug re zo: mung: sabyi qang: re shaug' ra" au: Asang: gaung lajheim: re maba: kho' lo:- zo: shaug' ra" yaug wa- yao: yao" gaung re dao: kho' ra" khyo" zo: shaug' ra" yaug ngad: ra".

³⁰Airumung: naonhaung" mae" myo: sho' wa qam: nang" ru we' no phyo: qhug' mung:- myo: sho' mo, wa shid: byaug: ako".

³¹Ngonhaung" wa yao: yao" gaung re shi" sao qhid' ca: qu" ngad: re wa- Mao"So: yang dao: kho' ru maqhug' genae" ngad: ra".

³²Ngadqere: dao: kho' qhug' ru we' Asang: yang qobo dae byid' ru qhug' ru wa myid gaung: byu qe we' daga" ngonhaung" dao: phyid' ru maqhug' nae" qhid' mae" ngad: ra".

³³Airumung:- nga" mao:nhaung: qe we"- naonhaung" wa Asang: nho: Myi" Xeim zo: nae" qhid' mae" ham: phaung gelao"- naonhaung" yao: cao: jho" lao" ge,-

³⁴Naonhaung" ham: phaung: na gelao"- Mao"So: dao: kho' ru naonhaung" maqhug' genae" qhid' mae" vae: moe' ra" yaug wa yao: yao" yham mae zo" yu vashao:- gatau: khyo jham we' sin: yang: wa ngo joe" li" lao" za: li" sho' nae".