Read Maru 1 KORINTHU 14 Bible Online

1 KORINTHU 14 - Maru bible

1 KORINTHU 14

¹Airumung: naonhaung" wa jhid'de; myid bo nae" qhid' mae" qam: ke' ge,- Byo: nho: jeju jhaung qhu" jham re kao bau obyid: na ge,- Je yang: Mao"So: mungdao: re hau" kyo" ra" Byo: jhaung qhu" re qo" yu nae" qhid' mae" kao bau obyid ge,-

²Gakai: lai myan" aja: ja: jhau: ra" yaug wa- byu re jhau: ru mangad:- Mao"So re jhau: ru ngad: ra". Yao: jhau: rure khag' maba: gyo: ngad: ra". Yao: wa Byo: nho: qam: so' khyo" yang no; thao" ra" dangman" ra" khyo re jhau: na: ra".

³Mao"So: mungdao: re ta" hau" ra" yaug wa su re bao" thaug' byid' ra" dao:- qam: byid' ra" dao:- nhag' tang" ra" dao: re jhau: ra".

⁴Gakai: lai myan" aja: ja: re jhau: ra" yaug wa- yao: yao" gaung re za: bao" thaug' byid' ra". Ngadqere: lapa pa: ra" yaug wa- ai: phung: geim" re bao" thaug' byid' ra".

⁵Ngo wa naonhaung" alhab' mo; gakai: lai myan" aja: ja: qo" jhau genae" rure myid: o: ra". Ngadqere: naonhaung" lapa qo" pa genae" rure ngo je: myid: o: ra". Pe"mung:ga"re gakai: lai ra" myan" aja: ja: jhau: ra" yaug wa- Phung: geim" re bao" thaug' byid: nae" qhid' mae" yao: jhau: ra" dao: lajheim: re pheim: kyo: byid: nae" byu mana ngad: re wa- ai: lapa qo" pa: ra" yaug jhau: ru wa gakai: lai myan" jhau: ru tho' akyu" je: qi" ra".

⁶Airumung:- nga" mao:nhaung: qe we"- ngo wa naonhaung" jhao" joe" li" yang: gakai: lai: ra" myan" dao: li" jhau: kyo" ngad: re wa pe" akyu" bo nae" i? Ngo ta" ra" dao: wa Mao"So: yang qhu" byid' ra" dao:- laba lajhao dao:- Byo: yang jaung" yang: ta" ra" mungdao:- mho" shid' ra" mungdao: mabo re wa dajhid' re: akyu" mabo ngad: ra".

⁷Khalhao:- tang: ru" ra" kao mabo: ra" zai jham re qu" ge,- aijham mae" thoe boe" boe" za: mamyang: thug' li" re wa khoyaug ai: tang:- khalhao: thoe re qo" kho' nae" i?

⁸Ailao"- labo" re mad: ra" yaug re: thoe boe" boe" za: mamad ngad: re wa- gyekhe' poe vao nae" qhid' mae" khoyaug seim" nyhang" nae" i?

⁹Ai we' dakhyo: nao gakai: lai myan" dao: jhau: rumae boe" boe" za: majhau re wa- nao pe" ta" na: rure khag' khoru: gai: ba: gyo: nae" i? Ni" dao: wa pe" lajheim: mathug' ngad: ra".

¹⁰Mug: myid dao mae majho" zhaung" ra" myan" dao: myo: sho' ja: jo, ngadqere:- khoja" myan" re: lajheim: mabo: ru majo, ngad: ra".

¹¹Ngo maba: gyo" ra" myan" re jhau: ra" yaug wa- nga" qhid' mae" taung bug byu ngad mung:- ngore: yao" qhid' mae" taung bug byu ngad: li" nae"- ngad: ra".

¹²Naonhaung" wa Byo: nho: jeju jhaung qhu" re qo" khae: yu nae" gyai kao bau mo, ngad ko" ruyang ai: phung: qi" qhang: li" nae" rure qo" bao" thaug' byid' ra" jeju jhaung qhu" jham re qo" yu nae" qhid' mae" qam: je: ke' ge,-

¹³Airumung: gakai: lai myan" dao: re qo" jhau: ra" yaug wa- yao: jhau: ra" dao: lajheim: re qo" pheim: kyo: nae" jeju jhaung qhu" re qo" khae: yu nae" qhid' mae" akyu" mho' ca" ra".

¹⁴Pe"mung:ga"re ngo wa gakai: lai myan" dao: khyo" akyu" mho' ra" au:- nga" byo wa gaigai: yao: akyu" mho' ra"- ngadqere: nga" laba lajhao myid wa mabo: bo ngad: ra".

¹⁵Airulao"- ngo khoru: kad' nae" i? Nga" byo we' akyu" mho' re- nga" myid we' re: akyu" mho' nae" ngad: ra". Nga" byo we' Nghaui"caung: re- nga" myid we' re: nghaui"caung: nae" ngad: ra".

¹⁶Naonhaung" wa byo khyo" yang za: jeju caung: akyu" mho' ko" re wa- ai: phaung mae bobo: ra" yu" yu" byu dayaug wa- naonhaung" pe" ta" na ko" rure yao: maba lo:- naonhaung" jeju caung: akyu" mho' ra" dao: re Amen- ga: khoru: qo" bota" nae" i?

¹⁷Naonhaung" Mao"So re jeju caung: akyu" mho' ra" dao: wa gyai gai sho' ngadqere:- su gaje qe: qhid' mae" dajhid' re: akyu" mabo ngad: ra".

¹⁸Ngo wa gakai: lai myan" dao: myo: sho' ja: re naonhaung" tho' je yang: qo" jhau: ruyang Mao"So: jeju re caung:khin" ra".

¹⁹Ngadqere: phung: caung:pa" phaung mae gakai: lai: myan" dao: thoe taung khyo" jhau nae" tho' su gaje qere qo" mho" shid' nae" qhid' mae" qo" gai: ba: gyo" ra" mho" shid' dao: ngo" kheim: re ngo je: jhau nug: ra".

²⁰Nga" mao:nhaung: qe we"- naonhaung" wa myid: qu" ra" khyo mae zoshao we' dakhyo: daboe" ge,. Makhyang" ra" khyo mae wa zoshao qe we' dakhyo: boe" mung:- myid: qu" ra" khyo mae kam" wa- lau: de, zo:qao" qe we' dakhyo: boe" ge,-

²¹Jham: Mugsug' mae- Ngo wa nga" byu qere- gakai: lai: myan" dao: khyo" jhau nae"- Taung bug byu qe: nhad' khyo" jhau nae"- Airu: kad' re lhao" re: nga" byu qe wa- Nga" dao: re tae" gyo: genae" mangad:- ga: Asang ta" ra"- ga: tung" to" ra".

²²Aimung: gakai: lai myan" dao: qo" jhau: ra" jeju jhaung qhu" wa- malam khug: ra" mo; qhid' mae" ve, so: ngad mung:- lam khug: ra" mo; qhid' mae" mangad: ngad: ra". Mao"So: mungdao: re ta" hau" ra" jeju jhaung qhu" kam" wa- malam khug: ra" mo; qhid' mae" mangad:- lam khug: ra" mo; qhid' mae" ve, so: ngad: ra".

²³Aimung: phung: geim" mae" phung: byu qe zang" ham: na yang:- yaug khao: ngo" mae gakai: lai myan" dao: jhau: na ko" au:- yu" yu" byu qe damyo"- mangad: lao"- malam khug: ra" mo, damyo"- vao li" ko" re wa- naonhaung" alhab' re ago qe ga: mata" genae" i?

²⁴Ngadqere: yaug khao: ngo" wa- Mao"So: mungdao: kho" kyo: ko" au:- malam khug: ra" byu dayaug yaug- mangad: lao"- yu" yu" byu dayaug vao li" re- mungdao: gyo" yu: ra" mathao mae- yao: yao: qobo qo" yaug ngad: rure ba: beim" li" nae" ngad: ra". Yao: gyo" yu: gu: alhab' wa yao: re beim: nhao: li" nae".

²⁵Yao" aung khug: nhag' lam: mae nyham" to" ra" khyo alhab' myao: thug' li" nae"- aimung:- yao: wa- Mao"So wa ce: naonhaung" phaung gaung: mae dang yao: na nhaung- ga: tau" lhang: yu yang:- goe; gyo" mung: Mao"So re caung:pa" li" nae" ngad: ra".

²⁶Nga" mao:nhaung: qe we"- naonhaung" Mao"So re caung:pa" nae" zang" ham: na gelao"- dayaug wa caung:khin" dao:- gatau dayaug wa mho" shid' dao:- dayaug wa Mao"So mae" qhu" lho byid' ra" mungdao:- gatau dayaug wa gakai: lai myan" dao: re jhau- dayaug wa ai: dao: jham: lajheim: re pheim: kyo" ra" dao: jham re jhau yang: caung:pa" genae" rure ngo ta" nug: ru ngad:- Kad' ra" khyo ja: khao: ngo" wa ai: phung: re bao" thaug' akyu" byid' ru ngad ca" ra".

²⁷Dayaug yaug gakai: lai myan" dao: jhau nae" lao" shid' yaug- mangad: lao"- sam yaug mae" malai lo:- dayaug: thao dayaug jhau mung:- gatau dayaug wa ai: myan" dao: lajheim: re pheim: kyo: vashao:-

²⁸Ngadqere: ai: phung: mae myan" dao: re qo" pheim: kyo" ra" yaug mabo ngad: re wa- lag lai" myan" dao: jhau: ra" yaug wa sae za: na mung:- yao: yao: za: jhau yang:- Mao"So we' jhau: na vashao:-

²⁹Shid' yaug mangad: lao"- sam yaug Mao"So: mungdao: ta" mung:- gaje qe wa yao: bam pe" ta" na: rure gyo" kin: na vageshao:-

³⁰Ngadqere: ai: ham phaung mae zaung: jo; ra" byu dayaug yaug Mao"So mae" mungdao: qo" khae: yu: ngad: re azhao sao qhid' jhau: na: ra" yaug wa thang vashao:-

³¹Yaug khao: ngo" wa zhao: yu: rumung:- qam: qo" genae" qhid' mae" naonhaung" alhab' mo; dayaug: thao dayaug Mao"So: mungdao: ta" kyo: ge,.

³²Mungdao: kho" kyo" ra" jeju jhaung qhu" wa- mungdao: ta" ra" yaug: nho: eib: ra" qao: mae ngad: jo, ca" ra".

³³Pe"mung:ga"re Mao"So wa ngonhaung" re abyi asin: boe" nhao nug yaug mangad:- Jho" nyang: rure we' yaug yo: rure o yaug ngad: ra". Mao"So: phung: alhab' mae phug' cao" ra" lai we' dakhyo:-

³⁴Myiqe: qe wa caung:pa" phaung mae sae za: na: jo, vageshao:- yao: bam wa dao: jhau nae" akhang" maqo" ngad: ako". Yuda byu qe: tarha" mae ta" to" ru we' dakhyo:- yao: bam wa au: she mo, magai: boe" ngad: ako".

³⁵Yao: bam daja: ja" khyo re ba nug geyang: ngad: re wa- yham mae yao: bam: yham sang pho" qere myid' yu vageshao:- pe"mung:ga"re myiqe: dayaug phung" nho: phaung mae dao: jhau: ru wa aqho' axag' ngad: ra".

³⁶Mao"So: mungdao: wa naonhaung" jhao" mae" sao qhid' thug' li" ru ngad: ra" i? Mangad: lao"- ai wa naonhaung" jhao" za: joe" li" ru ngad: ra"i?

³⁷Khag' ngadqere: yao: yao" gaung re Mao"So: lagyo: ngad:- ga: myid: jho: ra" yaug- mangad: lao"- Byo: nho: jeju jhaung qhu" re qo" yaug ngad:- ga: myid: jho: ra" yaug ngad: re wa- ngo wa ce: vhin tung" re Mao"So: amyin" khyo" tung" ke' ru ngad:- ga" rure ba beim: vashao:-

³⁸Ngadqere: yao: wa ce: mugsug' re pe" xan: masun: ngad: re wa yao: ta" rure datae" gyo: ge,-

³⁹Amung: nga" mao:nhaung: qe we"- Mao"So: mungdao: ta" hau" rure naonhaung" nhag' lam: mae kao bau obyid: na ge,. Alao"- gakai: lai myan" dao: re jhau: rure re: datam" pye' ge,-

⁴⁰Ja: khao: ngo" re nyang: vang" ru we' dau: ra" khyo" phug' cao" na ge,.