Read Maru 1 KORINTHU 16 Bible Online

1 KORINTHU 16 - Maru bible

1 KORINTHU 16

¹Ana"- Yuda mung" mae na ko" ra" Mao"So: byu qere bao" thaug' nae" qhid' mae" Alu: ngaui khyui nae" ru we' sin: yang: Galati mung" mae" phung: jham re ngo pyang: to: co' ru we' dakhyo:- naonhaung" re: kad' ge,-

²Ngo joe" li" ra" au: re Alu: ngaui khyui: zhang" yu maqo nae" qhid' mae"- Laban ba- ba khao: ngo" mae naonhaung" yaug khao: ngo" wa- yao: yao" vao ngaui myo" ru- nang" rure cao" yang: Alu: ngaui qaung" to: lao: ge,-

³Ngo joe" li" lao"- bang" se" mugsug' tung" yang: naonhaung" san: to" ra" mo, re naonhaung" byid' ra" Alu: ngaui jhaung qhu" jham re Yerusalem khyo dai" nhao: ke' nae".

⁴Ngo yao: ye" lo" nae" qhid' mae" ang yang: ngad: re wa- yao: bam ngo we' daga" qo" ye" lo" li" genae".

⁵Ngo wa Makedoni mung" khyo" naonhaung" jhao" joe" li" nae". Pe"mung:ga"re ngo Makedoni mung" khaung: khyo" kho' lai: ye" lo" ca" ra".

⁶Ngo wa naonhaung" we' dayo, daban: ko qo" na maba. Gyo, yo, geim" ngad: re ngad nae". Ai: thao re ngo dam: xo' ye" lo" nug: ra" jo, qo khyo ye" lo" ra" gyaung: khyo qhid' mae" naonhaung" ngore qo" bao" thaug' ke' li" genae".

⁷Ngo wa- naonhaung" we' su" lai: lo" zo" dazab zo: za: jho" qhug' nae" manug. Mao"So qad: ngad: re ngo naonhaung" we' daga" dayo, daban: ko qo" na nae" rure ngo myid: lao" ra".

⁸Ana" wa ngo- ce: Ephesu vogaung: mae Pentikoti poe joe" lo sho' thang: na nae".

⁹Ce: vogaung: mae ngore gye kad' ra" mo, myo: sho' na yang: re:- mau" zo" zaui: so: nae" qhid' mae" gaigai: yao: gyai qi" ra" agu gai jo; ra".

¹⁰Timothi naonhaung" jhao" joe" li" yang: ngad: re lalam lanyoe: lham: tug: yu ge,- pe"mung:ga"re yao: re: ngo we' dakhyo:- Asang: mau" zo" re vin vo; yaug ngad: ra".

¹¹Yao: re khag' re: daqu" ngai ge,- yao: ngojhao" yaug yo za: dam: qo" tug' joe" lo nae" qhid' mae" naonhaung" wa yao" gyaung: khyo re bao" thaug' byid: ge,- pe"mung:ga"re yao: wa- mao:nhaung: qe we' dam: tug' joe" lo nae" rure ngo myid: lao" na: ra".

¹²Ana"- mao:nhaung: pho" Apolo khyo we' sin: yang:- ngo wa yao: re gatau: mao:nhaung: qe we' daga" naonhaung" jhao" li" qhug' nae" qhid' mae" re: khyao ta" jhan: va". Ngadqere:- ana" au: ye: maang shi:- ga: yao: myid: ra". Thao re agu ang lao" yao: li" li" nae".

¹³Lha" yang: na ge,- lam khug: myid mae tang za: ye; jo, ge,. Mazag mavae myid bo ge,. Qam: bo ge,.

¹⁴Naonhaung" nho: mau"zo" alhab're jhid'de; myid we'zaui: so: ge,-

¹⁵Naonhaung" wa Stephan: we' yao" yham byu qere ba: ako". Yao: bam wa Akhaia mung" mae" sao qhid' phaug' lo: ra" Khristan phung: byu qe ngad mung:- Mao"So: byu qere caung da" ra" mau" zo" re zaui: so: nae" qhid' mae" yao: bam yao" gaung re qhaug' byid' to" ra" mo, ngad: ako".

¹⁶Nga" mao:nhaung: qe we"- naonhaung" wa airu" ra" byu qe- jhui" au: she: ra" qao: mae re:- yao: bam we' daga" mau" bovin vo; ra" mo; qao: mae re: na mung: yao: bam: ceim" shid' ra" khyo mae phug' cao" genae" qhid' mae" ngo naonhaung" re mho' ke' ra".

¹⁷Ngo wa Stephan- Fotunatu- Akhaiku bam joe" lo gemung: ngaui bau" ra". Yao: bam wa naonhaung" maqo" kad' ra" ja: kad' byid' ako".

¹⁸Yao: bam wa naonhaung" re bau: nhao: ru we' dakhyo:- ngo rere: bau: nhao: ako". Airu" mo, wa phug' te' byid: nae" man: qi" ra" mo, ngad: ako".

¹⁹Asia mung" khaung: mae" phung: jham naonhaung" re au" ke' ako"- Akula we' Priskila tao we' yao: shid' tao: yham mae caung:pa" ham: phaung: na ko" ra" phung: byu qere:- Khristan jhid'de; myid we' au" ke' ako".

²⁰Cetau mae na ko" ra" mao:nhaung: qe alhab' mo, re: au" ke' ako". Naonhaung" yao: cao: gyang" lho" ra" bobaug baug: ra" lai we' jho" au" ge,-

²¹Ngo Polu wa- ngoyao" lo; yang yao: Polu mae" au" dao: ein: tung" ke' ra".

²²Asang re majhid'de; ra" yaug khag' ngadqere:- yao" au: dao mae nhang: kheim: zao" vashao:- Marana tha- Ngonhaung" Asang we" joe" li" ri:-

²³Asang Yesu nho: nhag' myan" ra" jeju wa- naonhaung" we' daga" ngad: jo, vashao:-

²⁴Nga" jhid'de; myid wa- Yesu Khristu khug mae naonhaung" alhab' we' daga" ngad: jo, vashao: wo". Amen.