Read Maru 1 KORINTHU 3 Bible Online

1 KORINTHU 3 - Maru bible

1 KORINTHU 3

¹Nga" mao:nhaung: qe we"- Gai gai: yao: ein: re- ngo wa naonhaung" re Byo re qo" khae: yu vako" ra" mo, re ta" kyo" ru we' dakhyo:- naonhaung" re maqo" gai: ta" kyo: ngad: ra". Ngo wa naonhaung" re ce: mug: myid: we' sin" ra" byu qe we' dakhyo: re:- Khristan lam khug: rumae zoshao doe; na mo, re we' dakhyo: ta" kyo: qo: ra".

²Naonhaung" wa qao: ra" zo:ve re maqo" zo: shiko" ruyang ngo naonhaung" re zo:ve aqao mazho:- Nug' za: naonhaung" re jhaug' ra". Ana" lhao" re: naonhaung" qao: ra" zo:ve zo: nae" majin" shiko" ngad: ra".

³Pe"mung:ga"re naonhaung" wa ce: mug: myid: nho: ave, lo, mau" we' dakhyo:- kao so' daui: na: ako". Naonhaung" yao: cao: jho" myid nug' ru we'- naonhaung" yao: cao: myan" myo: jho" byo; na ko" ru ce wa- mug: myid byu: suna azhao" khyo" naonhaung" kao so' daui: na ko" rure sagse: qhu" byid' na: ru mangad: i?

⁴Naonhaung" mae" dayaug wa- ngo wa Polu thao cao" yaug ngad:- gatau dayaug wa- ngo wa Apolo thao cao" yaug ngad:- ga: ta" gelao"- naonhaung" wa mug: myid: byu qenho: ave, lo, mau" we' dakhyo: kad' na ko' ru mangad: ge i?

⁵Dang za: ta" gelang: ga" re- Polu wa khag' ngad: i? Amung: Apolo wa khag' ngad: i? Nga" shid' zo: wa naonhaung" re lam khug: lo sho' jhui" au: she byid' ra" Mao"So: daui daui okaung tao za: angad: ra". Mao"So: yang nga" shid' zo: re dayaug re daja: kho' byid' ra" mau" re zaui: so" ru shid' yaug ngad: ra".

⁶Ngo wa ai: myug: shi: re qho: yaug ngad: ra"- Apolo wa ai: agae re qid sheim: yaug: ngad: ra". Ngadqere: ai: agae re yaug: li" nhao yaug wa Mao"So ngad: ra".

⁷Myug: shi: re qho: yaug we' qid sheim" ra" yaug wa akhyag mangad: ngad: ra"- Agae yaug: thug' li" nhao ra"- Mao"So yaug lam: akhyag ngad: ra".

⁸Ai: myug: shi: re qho" ra" yaug we' qid sheim" ra" yaug: nho: myid: lao" khyo wa daja: za: ngad: ra". Yao: yao: zaui: so" ra" mau" zo" re cao" yang: Mao"So wa yaug khao: ngo" re jhaung qhu" byid' li" nae".

⁹Pe"mung:ga"re nga" shid' zo: wa Mao"So: qhid' mae" mau" zaui: byid' ra" mau" zaui: cao: ngad: ra". Amung: naonhaung" wa Mao"So: yo myid jham ngad: ako"- Naonhaung" wa Mao"So: yham re: ngad: ako".

¹⁰Mao"So: yang ngore byid' ra" jeju jhaung qhu" re ci yang:- ba jhao: ra" yham kad' yaug we' dakhyo: apan aqao: zhaug' to: va". Gatau dayaug wa ai: apan aqao: dao mae xo' zao: ra"- ngadqere: xo' zao: ra" yaug khag' ngadqere: yao: khoru: zao: rure lha" ca" ra".

¹¹Pe"mung:ga"re Mao"So wa- Yesu Khristu re Date: za: ngad: ra" apan aqao: khyo" zhaug' to: gau ngad va" ruyang apan aqao: gatau dalam: maqo" gai: zhaug' ngad: ra".

¹²Ai: apan aqao: dao mae byu daqhae: wa- qhang- mangad: lao"- ngaui- mangad: lao"- daqhae: wa phug' de; ra" laugsin" jham re ci yang: xo' zao: li" genae". Amung: gatau daqhae: wa- sag'- mangad: lao"- mhin: mangad: lao"- khovho jham we' xo' zao: li" genae".

¹³Ai: byu qe dayaug we' dayaug: nho: lo, mau" khoru: ngad: rure Khristu joe" li" ra" ba na mae myao: thug' li" nhao nae"- pe"mung:ga"re ai: ba na mae myi: wa byu yaug khao: ngo" nho: lo, mau" re qhu" byid' li" nae" ngad: ra". Ai: myi: wa yaug khao: ngo" nho: lo, mau" re jham" kin: kho' mung: yao: yao" gao: aman" re qhu" byid' li" nae".

¹⁴Ai: apan aqao: dao mae xo' zao: ra" yham vo:- myi: dae re qo" kham: ngad: re wa- yham zhaug' ra" yaug wa aphug' jhaung qhu" qo" khae: yu: li" nae".

¹⁵Byu dayaug yaug: nho: yham nga" pye' ngad: re wa- yao: wa seim" byaug: li" nae"- ngadqere: yao: yao" gaung yao: kam" wa myishae gyo: mae" phao: loe, yaug we' dakhyo:- khyad' yu: ru qhug' li" nae".

¹⁶Naonhaung" wa caung:pa" yham ngad mung:- Mao"So: Byo wa naonhaung" khug mae na: ra" khyo re naonhaung" dang za: ba gau ngad: ako".

¹⁷Airumung: Mao"So: yham re phyo' qheim" pye' ra" yaug khag' re ngadqere:- Mao"So wa yao: re phyo' qheim" pye' li" nae". Pe"mung:ga"re caung:pa" yham wa gyang" lho" ru we' naonhaung" yao" gaung wa yao" yham ngad: ako".

¹⁸Khag' re: yao: yao" gaung re damhug' pyag' ge, Naonhaung" phaung mae" dayaug yaug ce: mug: myid: nho: azhao" khyo" cao" yang: yao: wa pha,jhi" bo yaug ngad:- ga: myid jho: yu: ngad: re wa- yao: gaigai: pha,jhi" bo yaug boe" li" nae" qhid' mae" adu: adae: yaug shi" boe" qo: ra".

¹⁹Pe"mung:ga"re ce: mug: myid byu qe pha,jhi" ngad:- ga: myid: jho: ra" ja: wa Mao"So: qhid' kheim: mae wa adu: adae: ja: ngad: ra". Jham: mugsug' mae Pha,jhi" bo: ra" mo, re Mao"So: yang yao: bam: ba: jhao: rumae yao:- myi" nhao: ra"- ga: ta" ru we' dakhyo: ngad: ra".

²⁰Alao"- jham: dao: gatau dalam: mae- Pha,jhi" bo: ra" mo, myid: to" ra" ja: pe" phug' made; rure Mao"So ba: ra"- ga: ta" to" ra".

²¹Airumung: khag' ngadqere: khyoqhid' au: she byu qe qo" kad' ru we' sin: yang: daphug shao:- Gai gai: yao: ga" re naonhaung" wa ja: khao: ngo" re naonhaung" sang: ako".

²²Polu- Apolo- Petru- mug: myid ceru- kao so' daui: ru we' shid: ru- ana" qae: we' joe" lo nae" ra" qae:- alhab' re naonhaung" sang: ako".

²³Airumung: naonhaung" re sang yaug wa Khristu ngad mung:- Khristu re sang yaug wa Mao"So ngad: ra".