Read Maru 1 KORINTHU 5 Bible Online

1 KORINTHU 5 - Maru bible

1 KORINTHU 5

¹Taung bug byu qe lhao" re: makad' ra" gyo" gyaug sho' ra" gaung sho" ra" gintho' mau" zo" jham naonhaung" phaung mae xo: na ko"- ga: khyag' ta" hau" na ko" rure ngo the' gyo" ra". Yauggai dayaug yao: myhi" nhaung: we' zam" na: ra"- ga" ra" thoe re ngo the' gyo: va".

²Naonhaung" wa nga: kad' phug: na: ako"- naonhaung" wa kaug' qhui nae" she, ang mung: airu: kad' ra" yaug re naonhaung" phaung mae" phoe' thug' pye' ca" ra".

³Ngo wa gaung khyao khyo" naonhaung" we' va" kyo: na ngadqere:- nhag' lam: byo khyo" wa- naonhaung" we' daga" ngad: ra". Ngoyao: naonhaung" jhao" joe" na: ra" khyo" ai: qu" ca' qu" yao: ra" lo,mau" kad' ra" yaug re ngonhaung" Asang Yesu mang mae ngo dao: kho' va".

⁴Naonhaung" daga" zang" ham: na: au:- ngore: nhag' lam" byo khyo" naonhaung" we' daga" bobo: na: au: re- ngonhaung" Asang Yesu qam: so' we' ai: yauggai re-

⁵Yao" gaung byo; qeim: lo" shao: Satan nho: lo, khyo ab: pye' ge,- aimung: Asang: Ba Na mae yao" byo khyad' yu: ru qhug' vashao:-

⁶Naonhaung" nga: kad' phug: ru wa magai ngad: ra". Man" dajhid' za" ru wa cin man" phaui: alhab' re baung" je" li" nhao: ra"- ga" ra" dao: khyo: re naonhaung" ba: ako".

⁷Naonhaung" bin sho' gyang" shao: li" geshao:- naonhaung" wa man" axug' ngad: ra" qobo re yu: pye' ca" ako".Aimung: naonhaung" wa man" mabo: ra" cin man" phaui: asag' we' dakhyo:- boe" genae". Gai gai: yao: naonhaung" ai we' dakhyo: ngad ko" rure ngo ba: ra". Pe"mung:ga"re ana" ngonhaung" Lai co' Xeim: yao nau" ngad: ra" Yesu re xeim: bin: ngaui" to: byid: va" ruyang ngonhaung" nho: Lai co' Poe re kad' nae" jin" jin" ngad va".

⁸Airumung: ai: man" axug' ngad: ra" qobo we' makhyang: mashab: ra" lo, mau" bo: ra" mug we' mangad: lo:- man" mabo: ra" mug ngad: ra" gyang" san: ru we' dangman" ra" mug we' Lai co' Poe kad' gelang:-

⁹Gaung sho" ra" gintho' mau" qho: ra" mo, we' naonhaung" mazam" genae" qhid' mae" naonhaung" jhao" ngo vhin tung" tung" ke' va".

¹⁰Ngadqere: ngo wa ce: mug: myid dao mae" gaung sho" nho: gintho' mau" kad' ra" mo,- myo, no, so' kho' mo,- khug' mo,- sulho re caung:pa" ra" Taung bug byu qe we' dazam" ge, ein: ta" nug: ru mangad:- Airu" mo, re jao" pye' nae" ga: lao" wa- naonhaung" wa ce: mug: myid mae" bin sho' thug' lo" ca" genae" ngad: ra".

¹¹Ngo ta" nug: ru wa- yao: yao" gaung re Khristan mao:nhaung: ngad: ga: ta" mung:- gaung sho" nho: gintho' mau" qho: ra" mo,- myo, no, so' kho' ru- sulho re caung:pa" ru- su re gaui mho: ru- yhid shaug' ya" ru- khug' yaug we' dazam" ge,- ein: ru angad: ra". Airu" yaug we' wa daga" zaung yang: zo:ve lhao" re: dazo: dashaug' ge,-

¹²Phung: byu mangad' ra" mo, re dao: kho' nae" ru wa nga" mau" mangad: ngad: ra". Yao: bam re wa- Mao"So yao: dao: kho' li" li" nae"- ngadqere: naonhaung" wa- naonhaung" yao" phung: byu qere dao: kho' ang ko" ra" mangad: i? Jham: mugsug' mae ta" to" ru we' dakhyo:- ai: makhyang" ra" yaug re naonhaung" phaung mae" phoe' pye' ge,