Read Maru 1 KORINTHU 7 Bible Online

1 KORINTHU 7 - Maru bible

1 KORINTHU 7

¹Ana"- naonhaung" mugsug' tung" yang: myid' ke' ra" khyo jham we' sin: yang: yauggai wa myi: mayu: ru wa gai ru ngad: ra".

²Ngadqere: gaung sho" gintho' mau" yao: xo: jo; ruyang yauggai yaug khao: ngo" wa yham sang myhi" qo" ca" mung: myiqe: yaug khao: ngo" re: yham sang pho" qo" ca" ra".

³Yauggai wa yao" yham sang myhi" we' gaung sho: zam" mung:- myiqe: re: ai we' dakhyo: yao" yham sang pho" we' airu: gaung sho: zam" na qo: ra". Airumung: dayaug we' dayaug qo: rumae yao: cao: nhag' jho" dag nhao byid: qo: ra".

⁴Yham sang myhi" wa yao: yao" gaung re yao: masang ngad: ra". Yao" yham sang pho" yaug asang: ra". Ai we' dakhyo:- yham sang pho" re: yao: yao" gaung re yao: masang ngad: ra"- yao" yham sang myhi" yaug asang: ra".

⁵Naonhaung" wa akyu" mho' rumae ayo, byid: nae" qhid' mae" sao qhid' mae" jho" myid vang" to" ra" ayo, gyo: mae" lai yang: gaung sho: jho" zam" nae" yao: cao: dajho" ha ge,- ngadqere: akyu" mho' ra" yo, khyin: gan lao" wa- azhao: mae" ru: dam: jho" zam" ge,. Alao" za: naonhaung" yao" gaung re maqo" zang: geyang: Satan yang ju" phyo' rumae gyo" vao lo" nae" khyo mae" naonhaung" qo" loe, genae".

⁶Ngo naonhaung re ceru: ta" ru wa- amyin" byid' ra" khyo" ta" ru mangad:- Akhang" byid' ru za: angad:-

⁷Gai gai: yao: ga" re ngo wa- naonhaung" alhab' mo, re ngo we' dakhyo: za: boe" nhao nug: ra". Ngadqere: byu dayaug we' dayaug wa Mao"So: lo, mae" gatau tau: jeju jhaung qhu" dayaug daja: ja: qo" yu: ra".

⁸Ai: dinkhu: mate: mo, re we' cug' mo" qere ngo ta" ru wa- ngo we' dakhyo: dayaug za: qo" na: ru wa naonhaung" qhid' mae" je: gai: ako".

⁹Ngadqere: naonhaung" maqo" zang: ko" ngad: re wa lo, xo' mung: na ge,- Shab' mhin: na: rutho' mae lo, xo' ru wa je: gai: ra".

¹⁰Lo, xo' to: va" mo; qhid' mae" ngo yao" amyin" dao: mangad:- Asang: nho: amyin" dao: daja: ja: ngo qo" ra". Yham sang myhi" wa yham sang pho" we' magai: gao: ngad: ra".

¹¹(Gao" lin: na: ngad: re wa yao: yao: za: xo' na: jo, ca" ra"- Mangad: lao"- yao" yham sang pho" we' dam: jho" vang" mung: zam: na ca" ra". Yham sang pho" re: yham sang myhi" re magai: kao" pye' ngad: ra".)

¹²Gaje qere <Asang ta" ru mangad: lo:- ngoyao: khyo"> ta" ru wa- Khristan phung: byu dayaug wa malam makhug: ra" yham sang myhi" qo" mung: ai: yham sang myhi" wa yao: we' xo' mung: zam" na nug yang: ngad: re wa- yham sang pho" wa yao: re magai: kao" pye'- ga" ru ngad: ra".

¹³Amung: Khristan phung: byu myiqe: dayaug wa- malam makhug: ra" yauggai dayaug we' lo, xo' lo" mung:- ai: yham sang pho" wa yao: we' xo' yang: zam" na nug yang: ngad: re wa- yao" yham sang myhi" wa yao: re magai: kao" pye' ngad: ra".

¹⁴Pe"mung:ga"re ai: malam makhug: ra" yham sang pho" wa Khristan ngad: ra" yao" yham sang myhi" we' zam" khug: ra" khyo" yang- Mao"So khae: yu man" ra" yaug boe" lo: ra". Malam khug: ra" yham sang myhi" wa- Khristan ngad: ra" yao" yham sang pho" we' zam" khug: ra" khyo" yang Mao"So khae: yu man" ra" yaug boe" lo: ra". Ceru: mangad: re wa- yao: bam: myid:zo: qe wa Mao"So mabo: ra" mo, re" ru: boe" genae"- ngadqere: ana"- yao: bam wa Mao"So khae: yu man: mo, boe" lo: ako".

¹⁵Ngadqere: malam makhug: ra" yham sang myhi"- mangad: lao"- yham sang pho" wa- Khristan phung: byu ngad: ra" yham sang myhi"- mangad: lao"- yham sang pho" we' gao: nug: ngad: re wa- yao: re kao" pye' ge,- Khristan: phung: byu ngad: ra" yham sang myhi"- mangad: lao"- yham sang pho" wa- ce: khyo re galin: gago: qo" kad' ra" akhang" jo; ra". Mao"So wa- yaug yo za: na nae" qhid' mae" naonhaung" re khai: yu: to: va" ra".

¹⁶Khristan phung: byu ngad: ra" yham sang myhi" nao we"- nao wa naoyao" yham sang pho" re maqo" khyad' yu nae"- ein: khoru: qo" ta" i? Khristan phung: byu ngad: ra" yham sang pho" nao we"- nao wa naoyao" yham sang myhi" re maqo" khyad' yu nae" ein:- khoru: qo" ta" i?

¹⁷Byu yaug khao: ngo" wa- Asang: yang yao: re byid' to" ra" jhaung qhu" we' dakhyo:- Mao"So yao: khai: yu: ra" au: yao: khoru: ngad: re airu: xo' yang: kao so' daui qo: ra". Ceru wa phung: alhab' re ngo mho" byid' ra" tarha" ngad: ra".

¹⁸Au: qid lhai: kham: au: mae" Mao"So khai: rure khae: yu va" yaug ngad: re wa- yao: wa ai: au: qid lhai" dae jho: jham byaug nae" qhid' mae" qam: dake'. Amung: au: qid lhai: khyo makham: yu loza: Mao"So khai: rure khae: yu va" ngad: re wa- yao: wa au: qid lhai: khyo kham: yu maqo ngad: ra".

¹⁹Pe"mung:ga"re au: qid lhai: khyo re kham: yu makham: yu: ru wa pe" akhyag mangad: ngad: ra". Mao"So: amyin" dao: jham re phug' cao" ru za: akhyag ngad: ra".

²⁰Byu yaug khao: ngo" wa Mao"So khai: rure yao: khae: yu: ra" au: re yao: ngad: na: ru we' dakhyo: na: jo, qo: ra".

²¹Mao"So nao re khai: yu: ra" au:- nao wa su: jeim ngad: i? Pe" maca"- ngadqere: ai: su: jeim mae" nao loe; beim nae" agu jo; ngad: re wa aire ci yhung: wa,-

²²Pe"mung:ga"re Asang: yang khai: yu qhug' ra" jeim wa- Asang: yang jeim mae" lhoe' ke' byid: yaug ngad: ra"- ai we' dakhyo: jeim mangad' ra" yaug Khristu yang khai: yu qhug' ra" yaug wa Khristu nho: jeim ngad: ra".

²³Mao"So wa naonhaung" re aphug' byid: yang: vai: yu: to" ra"- Airumung: byu: jeim dadoe, loge,.

²⁴Nga" mao:nhaung: qe we"- naonhaung" yaug khao: ngo" wa- Asang: yang khai: yu qhug' ra" au: re ngad: ra" ave, ayaug: we' dakhyo: Mao"So we' zam" khug yang: na: jo, qo: ra".

²⁵Ana" lo, maxo' ra" mo, we' sin: yang: naonhaung" tung" ke' ko" ra" khyo re- Asang mae" amyin" dao: maqo" to: ngadqere: Asang: nho: nhag' myan" ra" jeju khyo" yang lam ga" ra" byu dayaug ngad: ru we' dakhyo:- ngo myid: thug' ra" khyo re ta" ke' ra".

²⁶Ana" thaung" qhug' na: ra" qug' khai: qug: khai: jham re beim: yang: ta" gelang: ga" re yauggai dayaug wa ana" yao: na: ra" khyo" na: jo; re wa je: gai nae" ein:- ngo myid: ra".

²⁷Nao yham sang myhi" qo" va"yaug ngad: i? Ailao" wa yham sang myhi" re dashapye' pye'. Nao lo, maxo' shi" yaug ngad: i? Aire wa yham sang myhi" daqho lo:-

²⁸Ngadqere: nao lo, xo' ru wa pe" qobo shad' ru mangad: ngad: ra"- aimung: lo, maxo' shi" ra" myiqe: dayaug- lo, xo' ngad: re yao: pe" qobo mashad' ngad: ra". Ngadqere:- dinkhu: te: lo, xo' ra" mo, wa qug: khai: rure thaung" qhug' li" genae". Ngo wa naonhaung" re airu: mathaung" qhug' nhao nug ngad: ra".

²⁹Nga" mao:nhaung: qe we"- ngo ta" nug: ru wa ceru: ngad: ra". Ayo, myo: sho' madang lo" ruyang ana" mae" thoegu: myi: qo" ra" mo, wa- myi: maqo" ra" mo, ru: na qo: ra".

³⁰Ngug: ra" mo, wa nhag' makaug' mo, ru:- Qi: ra" mo, wa mabau: mo, ru:- Zai vai: ra" mo, wa yao: bam vai: ra" zai re masang: ra" mo, ru:-

³¹Myid gaung: jo,nho" zai yo we' phaga: kad' zo: mo, wa ai: yang phaga: makad' zo: mo, re" ru:- na qo: ra". Pe"mung:ga"re ana" ru" ra" mug: myid wa ana" re" ru:- myao" sho' jo; jo, lo nae" mangad: lo:ngad: ra".

³²Ngo wa naonhaung" re myid: qug: myid: ci" rumae" loe; beim nhao nug: ra". Myi: mayu: ra" yaug wa Asang re ngaui bau: nhao nae" qhid' mae" qam: ke' na: ruyang yao: wa Asang: mau" zo" mae nhag' zaug: jo; ra"

³³Ngadqere: myi: yu: ra" yaug wa- yao" yham sang myhi" re ngaui bau: nhao nug: ruyang yao: wa myid gaung we' sin" ra" khyo mae nhag' lam: zaug: jo; ra".

³⁴Airumung: yao: wa nhag' lam: shid' gao boe" jo; ra". Lo, maxo' ra" myiqe:- mangad: lao"- zomyi: gyang" ngad yaug wa- Mao"So re yao" gaung dau: we' byo shid' ja" geim" re qhaug' byid: nug: ruyang yao: wa Asang: mau" zo" mae nhag' zaug: jo; ra". Ngadqere: lo, xo' va" ra" myiqe: wa yao" yham sang pho" re ngaui bau: nhao nug: ruyang yao: wa- myid gaung we' sin" ra" khyo jham mae nhag' lam: zaug: jo; ra".

³⁵Ngo ceru: ta" ru wa ngo naonhaung" re bao" nug yang: ta" ru ngad: ra". Ngo wa naonhaung" re zaui" zag: ci nug yang: ta" ru mangad:- ai: atha" naonhaung" re jo ang: ra" khyo" zaui: so: genae" qhid' mae" we' Asang: mau" zo" qhid' mae" naonhaung" gaung dau: alhab' bin sho' qhaug' byid: yang: caung da" byid: genae" rure ngo o yang: ta" ru ngad:

³⁶Bin: jho" mho' to: yang: lo, maxo' nae" qhid' mae" shid' zo" myid vang" to" ra" khyo we' sin: yang: yauggai yaug wa- myiqe: nau" dao mae to" ra" yao" ave, wa majo maang: ra" khyo" ngad:- ga: yao: myid: li" yang: ngad ngad- gaung sho: we' sin: mung: zang: yang: ngad ngad- lo, xo' ca"- ga: yao: myid: jho yang: ngad: re yao: myid: o: ru we' dakhyo: yao: shid' zo: wa lo, xo' vageshao:- ceru mae qobo maboe" ngad: ra".

³⁷Ngadqere: yauggai yaug wa- khag' yang re: majhan: lo: lo, maxo' nae"- ga: yao: yao" nhag' lam" yang tang za: myid: phyid' yang:- yao: yao" nhag' lam: re nyang" za: qo" zang: mung:- yao: yao" nhag' lam: mae myid: phyid' to: gau ngad: re wa yao: ai: myiqe: nau" re lo, maxo' nae" kad' ru wa gai: ru ngad: ra".

³⁸Airumung: lo, xo' ra" yauggai wa- gai: ra" khyo re kad' ra". Ngadqere: lo, maxo' ra" yaug wa je: gai: ra" khyo re kad' ra".

³⁹Myhi" zang dayaug wa yao" yham sang pho" za: adaui: na na wa- din hku: dao mae taui" to" ru qhug' ra". Ngadqere: yao" yham sang pho" shid: byaug yang: ngad: re wa- yao: nug: ra" yaug khag' jhao" ngadqere: yham gai: qo" lo" ra". Ngadqere: Khristan phung: byu yauggai we' za: lo, gai: xo' ra".

⁴⁰Ngadqere: yao: wa lo, madam: xo' lo:- airu: yao: na: jo; ngad: re wa- je: ngaui pyo" li" nae"- ceru wa ngo myid: jho: ra" khyo ngad: ra". Ngo re:- Mao"So: Byo qo" yaug ngad:- ein: myid: lam: ra".