Read Maru 2 KORINTHU 1 Bible Online

2 KORINTHU 1 - Maru bible

2 KORINTHU 1

¹Mao"So myid o: ru khyo" yang Khristu nho: lagyo: dayaug ngad: ra" ngo Polu we' ngonhaung" mao:nhaung: pho" Timothi wa- Korinthu vogaung: mae na ko" ra" Mao"So: phung: byu qere we' Akhaia mung" geim" mae" Mao"So: byu qe alhab' re Mugsug' tung" ke' ra".

²Ngonhaung" pho" Mao"So we' Asang Yesu Khristu wa nhag' myan" ra" jeju we' yaug yo: ru naonhaung" re shaman" byid: vageshao: wo"-

³Bao" thaug' khyo alhab' re byid' ra" Pho"- nhag' khyag' shogu: ra" Pho"- ngonhaung" Asang Yesu Khristu yao: Pho" ngad: ra" Pho" Mao"So: jeju re caung:khin" gelang:-

⁴Ngonhaung" yao: qo" khae: yu va" ra" Mao"So mae" joe" li" ra" bao" thaug' byid' rure ci yang: qug: khai: aja: ja: qhug' ko" ra" mo, re qo" bao" thaug' byid: nae" qhid' mae" Mao"So wa ngonhaung" qug: khai: qhug' ra" khyo alhab' mae bao" thaug' byid' ava".

⁵Ngonhaung" wa Khristu kham zo" ra" qug: khai: dayin dayo: myo: sho' re bokham zo" ru we' dakhyo:- Khristu khyo" yang Mao"So nhag' tang" byid' rure re: bokham: yu: bam va".

⁶Ngonhaung" wa ai: qug: khai: dayin dayo: re kham zo" ru ngad: re ai:ru wa naonhaung" bao" thaug' byid' ru we' khyad' yu: ra" khyo qhug' yu nae" qhid' mae" ngad: ra". Bao" thaug' byid' rure ngonhaung" qo" kham: yu: ngad: re wa- naonhaung" re: bao" thaug' byid' ru qhug' mung:- aijham ngonhaung" kham zo" ra" qug: khai: dayin dayo: nhag' lam: qhang: ru we' re: qo" zang: kham: ra" qam: so' qo" yu genae".

⁷Naonhaung" wa ngonhaung" kham zo" ra" qug: khai: dayin dayo: re bokham zo: vako" ru we' dakhyo:- ngonhaung" qo" kham: yu: ra" nhag' tang" byid' rure re: naonhaung" boqo" kham: yu vako" rure ngonhaung" ba: ra". Airumung: naonhaung" mae ngonhaung" nho: myid: lao" ru wa khonhae" re: gyag maqui: ngad: ra".

⁸Mao:nhaung: qe we"- Asia mung" mae ngonhaung" khoru" ra" qug: khai: kham zo" lo: ra" khyo ngonhaung" naonhaung" re ta" peim: kyo: nug: ra". Ngonhaung" dao mae kai" jo; ra" qo wa aiqhi" saung" la: yang: kao so' xo' daui: na nae" lhao" re: matho' the' myid ngad: ra".

⁹Ngonhaung" wa shid nae" dao: phyid' qhug' mo, ngad: ra" khyo" yao: yao" gaung re myid: jho: to: va". Ngadqere: ceru: boe" ru wa- ngonhaung" nho: qam: re malam mangha lo:- shid: ra" mo, re daui: to" li" nhao: ra" Mao"So re ngonhaung" lam ngha nae" qhid' mae" boe" ru ngad: ra".

¹⁰Yao: wa airu" ra" gyaug ci" ca" ra" shid gyan nogyan mae" ngonhaung" re khyad' yu: ava". Thao rere: Ngonhaung" re dam: khyad' yu: li" nae". Ngonhaung" wa naonhaung" qhid' mae" akyu" bao" mho' byid' ra" khyo" yang ngonhaung" re joe" lo nae" ayo, mae dam: khyad' yu nae" qhid' mae" yao: mae ngonhaung" myid: lao" na: ra".

¹¹Amung: ngonhaung" qhid' mae" myo: sho' akyu" bao" mho' byid' ra" thoe re tau: byid: mung: Mao"So wa ngonhaung" re shaman" byid: yang: ngonhaung" qo" kham: yu: ra" shaman" jeju mathao mae byu myo: sho' mo, wa Mao"So: jeju re caung:khin" byid' li" genae".

¹²Byu: Pha,jhi" khyo" mangad: lo:- Mao"So: nhag' myan" ra" jeju qam: so' khyo" yang- ngonhaung" ce: mug: myid dao mae kao so' daui: na: au:- je yang: ngonhaung" wa naonhaung" we' zam" khug: na: rumae Mao"So: yang byid' ra" nhag' lam: phyu jao din:man" ru de: de: za: jhau: ra" ave, re cao" yang: ngonhaung" we' zam" khug: na: bam: ra" khyo re ngonhaung" aung khug mae de: de: za: phug nae" khyo jo; ra".

¹³Naonhaung" qo" ba: nghe' mung:- ba: gyo" ra" khyo re za: ngonhaung" tung" ke' ra".

¹⁴Ngadqere: ana"- naonhaung" wa ngonhaung" ta" ru dakhyae: dapho za: ba: gyo" ako". Ngadqere: ngonhaung" ta" ra" khyo jab sho' naonhaung" ba: gyo" li" genae" qhid' mae" ngo myid: lao" ra". Aimung: ngonhaung" Asang Yesu Ba Na mae ngonhaung" wa naonhaung" mathao mae qo" phug mo, ngad nae" ru we' dakhyo:- naonhaung" re: ngonhaung" mathao mae qo" phug mo, ngad: li" genae".

¹⁵Ceru re ngo gyai nhag' lam: nyo, beim: mung:- naonhaung" shid' lhang kai" yang: shaman" jeju qo" kham zo: genae" qhid' mae" sao qhid' ngo naonhaung" re li" qhug' nae" qhid mae" byin seim" pye' va".

¹⁶Pe"mung:ga"re- Makedoni mung" khyo ye" lo" zo" mae" naonhaung" re vao: qhug' co' yang:- dam: phao: lo phyao: lodam: vao mung: Yuda mung" khyo lo" ra" nga" gyaung: khyo qhid' mae" naonhaung" mae" bao" thaug' ru mho' nae"- ein: ngo myid: to"-

¹⁷Ceru: seim" to" ra" khyo wa nga" myid atug' akhyug kad' qhu" ru ngad: i? Ngo seim" to" ra" au:- ngoyao" qhid' mae" za: myid yang:- ayo, dalam: mae za: nga" dao: wa ngad:- ga: ta" mung: mangad:- ga: shid' gao ta" ru ngad: i?

¹⁸Gaigai: Mao"So wa dangman" ra" dao: re jhau yaug ngad: ru we' dakhyo:- ngo naonhaung" re byid' ra" dao:so: re: ngad:- mangad: ga" ra" dao: shid' gao mangad:-

¹⁹Pe"mung:ga"re naonhaung" phaung mae ngo yao: we' Sila- Timothi kho" kyo" ra" Mao"So: yao: zo: Yesu Khristu wa- ngad: ru we' mangad' ru ga: dalhang: dae ta" yaug mangad:- yao: wa Mao"So: ngad:- ga" ra" yaug ngad: ra".

²⁰Pe"mung:ga"re Yao: wa- Mao"So: dao:so: alhab' nho: ngad:- ga" ra" atha" ngad: ra". Airu: mung: Mao"So: phungbao bao: thug' li" nae" qhid' mae" Yesu Khristu re khug ngha yang:- Amen ein: ta" na: ru ngad: ra".

²¹Ngonhaung" we' naonhaung" re daga" Khristu we' dadang: dalam: za: kao so' daui nhao: ra" yaug wa- Mao"So yao: yao: ngad: ra".

²²Ngonhaung" re gakai: lai khyin: san: yu mung:- yao" byu qekhyo" dazid thaung" te' to" ra" yaug we' ngonhaung" qhid' mae" yao: zam" to: byid' ra" shaman" jeju alhab' qhid' mae" ama, kham: khyo"- ngonhaung" nhag' lam: khug mae Gyang" Lho" Byo ke' to: byid: yaug re: Mao"So yao: ngad: ra".

²³Ngo Korinthu vogaung: khyo mali" nae" myid: phyid' ru wa- naonhaung" qhid' mae" ku yang: ngad: rure Mao"So nga" sagse: ngad: ra". Yao: wa nga" nhag' lam: re ba byid' ra".

²⁴Ngonhaung" wa naonhaung" pe" re lam khug ca"- ein: ra" khyo re amyin" byid: nae" qam: ke' na: ru mangad:- naonhaung" wa lam khug: rumae tang tang za: ye; jo, mo, ngad ko" rure ngonhaung" ba: ra". Amung: ngonhaung" wa naonhaung" yao" ngaui bau: khyo qhid' mae" naonhaung" we' daga" mau" zaui" na: ru angad:.