Read Maru 2 KORINTHU 11 Bible Online

2 KORINTHU 11 - Maru bible

2 KORINTHU 11

¹Ngo dajhid' zo: go: rure naonhaung" zang: kham byid: genae" rure ngo o: ra". Jeju khyo" zang: kham byid: gela,-

²Mao"So ngonhaung" dao mae myid qu" nug' ru we' dakhyo: naonhaung" dao mae myid qu" nug' ra". Naonhaung" wa Khristu ga" ra" yauggai dayaug we' za: lo, xo' nae" qhid' mae" ngo mho' to: byid: va" ra" zomyi: gyang" we' dau: ako".

³Eva wa lhao maui: nho: mhug' pyag' ra" pha,jhi" yang mhug' pyag' ru qhug' ru we' dakhyo:- naonhaung" re: nhag' lam: qeim: li" mung: Khristu re bin sho' jhid'de; kao taui" ru we' gyang" lho" ra" myid shapye' pye' geli" nae" rure ngo myid: ci" na:.

⁴Pe"mung:ga"re dayaug yaug naonhaung" jhao" joe" li" mung: ngonhaung" makho" kyo" qu" ra" Yesu gatau dayaug: nho: khyo li" kho" kyo: byid' rure naonhaung" ngaui ngaui bau: bau: za: zang: kham yang: khae: yu: ako". Amung: naonhaung" wa ngonhaung" mae" qo" khae: yu ko" ra" Ngaui Bau" Lau Dao: we' dajhid' re: madau: ra" ngaui Bau" Lau Dao: we' Gyang" Lho" Byo mangad' ra" byo gatau re naonhaung" khae: yu: ako".

⁵Ngo wa naonhaung" tho' kai mae" lagyo: qi: qe ga: mhang" ko" ra" mo, tho' mae dajhid' re: je: ngai yaug ngad:- ein: khyo" ngo mamyid: jho-

⁶Ngo wa dao: jhau: rumae vae" yaug- lhe: yaug mangad: sho' ngadqere:- laba lajhao khyo mae wa- ba jhao yaug ngad: ra". Ngonhaung" wa yo, khyin: khao: ngo" mae we' khyo khe' khao: ngo" mae ce: khyo re de: de: za: naonhaung" re ba nhao va".

⁷Ngo wa naonhaung" re nga: ye, nhao nae" qhid' mae" ngo yao" gaung re nyham: khyo" pye' mung:- naonhaung" re Mao"So: khyo Ngaui Bau" Lau Dao: pe" aphug' mamho' lo:- kho" kyo" lo: ra". Ceru: kad' ru wa ngo shad' ra" i?

⁸Naonhaung" phaung mae ngo mau" zaui" na: au:- gatau: phung: jham: yang ngore bao" thaug' byid' ako". Amung ngo wa naonhaung" re bao" thaug' byid: nae" qhid' mae" ai: phung: jham mae" lhad' zo" na: ra" ein: gai: ta" ra".

⁹Amung: ngo naonhaung" we' daga" na: ra" gyo: mae- ngaui qhang qo ca" ra" au:- bao" thaug' byid: genae" qhid' mae" ngo naonhaung" re phabau mapau"- Makedoni mung" mae" joe" li" ko" ra" mao:nhaung: qe wa ngo qo ca" ra" gu: alhab' re vin: li" byid' ako". Lai: lo" ra" yo, mae we' dakhyo:- joe" lo nae" ayo, mae re:- ngo wa khonhae" re: naonhaung" re qola: mavin nhao nae".

¹⁰Nga" khug mae bo: ra" Khristu nho: dangman" ru we' ngo ceru: phug: rure Akhaia mung" jao: sho' mae khag' re: qo" tam" pye' genae" mangad:- ein: ngo dao:so: byid' ra".

¹¹Ngo wa naonhaung" re majhid'de, yang: ceru: ta" ru ngad: ra" i? Ngo naonhaung re jhid'de; ra" khyo re Mao"So ba: ra".

¹²Ngonhaung" zaui: so" ru we' dakhyo:- yao: bam re: zaui: so"- ga: ai: gatau lagyo: jham phug: ta" nae" agu maqo" genae" qhid' mae" ngo wa ana" kad' na: ru we' dakhyo:- xo' yang: kad' ye" lo" nae".

¹³Yao: bam wa lagyo: aman" qe mangad:- lagyo: apyag' qe ngad: ako". Yao: bam yao" gaung re Khristu nho: lagyo: aman" qe we' dakhyo:- aqid ve, geim kad' mung:- mhug' pyag' ra" mau" zo" zaui: so: mo, ngad: ako".

¹⁴Aiwa mug' nae" khyo mabo ngad: ra"- Satan lhao" re: bo" bao: nho: mug: lagyo: we' dau sho' yao: yao" gaung re geim qo" kad' ra".

¹⁵Airumung:- yao" daui daui mo, wa- din:man" ru: daui daui mo, we' dau sho' yao: bam yao" gaung re geim kad' ko" ru wa gyai mug' nae" made, ngad: ra". Lo" thao" mae ai geim" yao:- yao: bam: lo, mau" we' man: qi" ra" aphug' re qo" khae: yu: li" genae".

¹⁶Khag' re: ngore ago dajho gela,- ein: ngo dam: paug' ta" ra". Ngadqere: naonhaung" ngore ago jho geyang: ngad lao" re:- ngo dajhid' dathao qo" phug nae" qhid' mae" nang" thao" ago dayaug khyo" ngore khae: yu shi: gela,-

¹⁷Ngo ana" phug: ta" na: ru wa- Asang ta" nhao: ra" khyo" mangad: lo:- ago dayaug we' dakhyo: ngo phug: ta" na: ru ngad: ra".

¹⁸Byu myo: sho' mo, wa xao su byu qenho: qam: so' lo, mau" re cao" yang: phug ko" ruyang ngore: airu: phug nae".

¹⁹Naonhaung" wa gyai pha,jhi" ba mo, ngad gemung: ago qere ngaui ngaui bau: bau: za: zang: kham byid' ako".

²⁰Naonhaung" wa- naonhaung" re amyin" byid: yam" zo" ra" yaug naonhaung" amag re khyug' zo" ra" yaug- naonhaung" re kung" zo" ra" yaug- naonhaung" re qu" nyham: ra" yaug- naonhaung" myo,khung: re pyo' yaug- re naonhaung" zang: kham byid' ako".

²¹Qho' ru we' naonhaung" re ta" geli". Ngonhaung" wa aijham re kad' nae" gyai mavae" ra" gyaug hab' qe ngad: ra". Ngadqere: dayaug yaug daja: ja" khyo we' sin: mung: vae" phug: ngad: re wa- ngore: airu: vae" phug nae" ngad: ra". Ngo wa ceru re ago dayaug we' dakhyo: ta" na: ru ngad: ra".

²²Yao: bam wa Hebre vo qe ngad: ako" i? Ngo re: ai we' dakhyo: ngad:- yao: bam Israel byu qe ngad: ako" i? Ngo re: ai we' dakhyo: ngad:- yao: bam wa Abraham: nho: myid:zo: qe ngad: ako" i? Ngo re: ai we' dakhyo: ngad: ra".

²³Yao: bam wa Khristu nho: daui daui mo, ngad: ako" i? Ago yaug ru: ngo ta" na: ra". Ngadqere: ngo wa yao: bam tho' je: gai: ra" daui daui yaug ngad: ra". Ngo wa mau" je yang: zaui" lo yaug ngad: ra". Ngo wa je: myo: sho' lhang thaung: taung" lhaung" ru qhug' lo yaug ngad: ra"- ngo wa be; rure je: myo: sho' lhang qhug' lo yaug ngad: ra". Je: myo: sho' lhang alaug laug shid: ru qhug' lo yaug ngad: ra".

²⁴Ngo wa Yuda byu qeyang sam xe: gug dae dae mung: be; rure ngo" lhang qhug' lo: ra" yaug ngad: ra".

²⁵Roma byu qeyang sam lhang taui" be; ru qhug' lo: ra". Amung: laug baui: yang pye' ru dalhang qhug' lo: ra". Ngo wa qid sang pho qeim: rumae sam lhang bobo: lo mung:- qid tham: dao mae shid' xe: byid yo, qug myung: lhau: ru dalhang qhug' lo: ra".

²⁶Nga" gyaung: khyo myo: sho' mae qid gyui gyui yang: qhug' ra" shid gyan nogyan- damya, qhug' ra" shid gyan nogyan- nga" mao:nhaung: Israel byumyu" qe: lo, mae qhug' ra" shid gyan nogyan- Taung bug byu qe: lo, mae qhug' ra" shid gyan nogyan- vomo" jham mae qhug' ra" shid gyan nogyan- seyo segae: mae qhug' ra" shid gyan nogyan- panglai: qid tham: dao mae qhug' ra" shid gyan nogyan- ba nam apyag' qeyang kad' ra" shid gyan nogyan jham re ngo qhug' lai: lo: ra".

²⁷Mau" zo" re dug myaung: taung" zaui" lo va". Dazab makyo yab maqhug' zo" ru- vae: moe; qid shab' ru thaung" qhug' lo: ra"- Dazab makyo zo:ve gyi: sho' maqo" zo:- khug ngha nae" jo, qo majo,- mai bau: gug: sho' maqhug' ve; lo ngad: ra".

²⁸Khag' mata" thug' ru qug: khai: khyag' qhui: ra" gatau myo: sho' ja: tho' mago"- ngo wa ba khao: ngo" Phung: jham alhab' qhid' mae" sang: kho: myid: ci" ruyang nhai" bam" to" ru qhug' na: ra".

²⁹Dayaug yaug qam: nang: yang: ngad: re- ngo re: qam: nang" ra"- dayaug yaug qobo: yang ju" phyo' rure- ngo wa gyai gaung yug myid: ci" byid' ra".

³⁰Ngo phug ca" ngad: re wa- ngoyao" gaung yao: qam: khonho" nang" ra" khyo re ceim" shid' yang: ngo phug nae".

³¹Ngo mamhug' rure Asang Yesu nho: Pho" ngad: ra" Mao"So ba: ra". Yao" mang wa- apyad ato mae ngaui lho" vashao: wo".

³²Ngo Damasku vogaung: mae na: au:- kho:kham Areta nho: mung" zug: pho" wa- ngore taung: nae" qhid' mae" vomo" kham: dung: mae gyezo: qere zaung" nhao: to" ra".

³³Ngadqere: ngore gyan khug mae ke' mung:- vang bao: zo: kham: khyo"- shoe' khyo" ke' byid: geyang: ngo wa- ai: mung" zug: pho" lo, mae" loe; beim: lo va".