Read Maru 2 KORINTHU 12 Bible Online

2 KORINTHU 12 - Maru bible

2 KORINTHU 12

¹Phug: ru wa akyu" mabo ngadqere:- ngo phug ca" shi" ra". Ana"- ngo wa Asang: yang qhu" byid' ra" ve, lho jham we' qhu" lho jham: nho: khyo re ta" nae".

²Lai: lo" va" ra" daxe: byid zin mae Khristan phung: byu dayaug wa- myhao: thao" ra" mug:gaung pyae gye, khyo jhui" do, lo" ru qhug' ra" khyo re ngo ba: ra". (Ceru wa gaigai: yao: boe" ru ngad: laug? Mangad: lao"- yao: wa ve, lho re the' myao: ru ngad: laug- ngo nyang" maba- Mao"So za: ba: ra".)

³Ai: yaug wa Pharadisu khyo jhui" do, lo" ru qhug' mung:- yao: wa byu: nhad' dao: thoe

⁴khyo" maqo" ta" ra" dao:- byu: nho: thoe we' maqo" ta" thug' ra" dao: thoe jham re the' gyo" rure ngo ba: ein: ra" khyo re ngo dam: paug' ta" ra". (Ceru wa gaigai: yao: boe" ru ngad: laug? Mangad: lao"- yao: wa- ve, lho re the' myao: ru ngad: laug- ngo nyang" maba- Mao"So za: ba: ra".)

⁵Airumung: byu ceyaug: khyo we' sin: yang: wa- ngo phug nae". Ngadqere: ngoyao" khyo we' sin: yang: wa- ngoyao: khoqhi" qam: nang: yaug ngad: rure qhu" byid' rumae" je yang:- pe" maphug nae".

⁶Ngo phug nug yang: ngadqere: ngo ago doe, nae" mangad:- pe"mung:ga"re ngo wa dangman" ra" dao: re ta" na: ru ngad nae"- khag' ngadqere: nga" khyo re yao: ngo kad' rumae the' myao: ru we' ngo ta" rumae the' gyo" yu: ru tho' matag: myao: to: nhao nug yang: ngo wa maphug nae".

⁷Ngadqere: ngo the' myao: ra" mug' pho: ve, lho jham myo: sho' mathao mae ngad beim: phug: ra" myid mabo: li" nae" qhid' mae" ngo wa gaung sho: dayin dayo: khai" no: ra" nodae daja: re kham zo" na: ra". Ai: nodae wa Satan" nho: lagyo: khyo" ngore be; na mung:- nga" nho: ngad beim: phug: ra" myid re tam" to: byid' ra".

⁸Ce: nodae re yu: pye' byid: nae" qhid' mae" ngo wa Mao"So re sam lhang khyo" yang: akyu" mho' qu" va".

⁹Ngadqere: Mao"So wa- nga" nhag' myan" ra" jeju wa nao qo ca" ra" gu: alhab' qhid' mae" ga" laug: ra". Nao qam: nang" ra" au: nga" qam: so' wa- qam: bo: thao" ru ngad: ra"- ga: phaug' tau" ra". Airumung: nga" au: dao mae Khristu nho: qam: so' yang gug: gam byid' rure qo" kham: yu nae" qhid' mae" nga" nho: qam: nang" rure ngo gyai ngaui bau: yang: phug: ra".

¹⁰Ngo wa Khristu nho: mathao mae- qam: nang" ru- roe" ru- dayin dayo" ru- yhin" ru- qug: khai: jham qhug' rumae nhag' shid nhag' dag: ra". Pe"mung:ga"re ngo qam: nang" ra" au:- ngo wa qam: bo: jo; ra".

¹¹Ngo wa ago we' dakhyo: kad' na: ra"- naonhaung" wa ngore ago doe, nhao: na: ako". Naonhaung" wa nga" bo: de, ang: ra" mo, ngad: ako"- pe"mung:ga"re ngo wa pe" mangad: sho' ngadqere:- naonhaung" lagyo: qi: qekhyo" jho: to" ra" mo, tho' dajhid' re: ngai nyham yaug mangad:-

¹²Ngo wa lagyo: dayaug ngad: ra" khyo re mug' pho: ve, lho jham- mug' pho: mau" zo" jham myo: sho' re naonhaung" phaung gaung: mae nhag' lam: qhang qhang za: zaui" qhu" mung:- sagse: qhu" byid' lo va".

¹³Ngo wa naonhaung" re ngaui qhang we' sin" ra" bao" thaug' khyo re qo mala: nhao: rumae" je yang:- gatau: Phung: jham: o mae khyo" yang: naonhaung" re zam" khug: lo: ra" i? Ceru: naonhaung" dao mae matarha" ra" khyo" kad' rure jeju khyo" ngore qobo khyad' byid: gela,.

¹⁴Ana" ngo wa sam lhang ein: lhang naonhaung" jhao" li" qhug' nae" jin" jin" ngad va". Naonhaung" re ngo pe" re: qo mabyid: nae". Ngo wa naonhaung" ngaui qhang re o yang: mangad:- naonhaung" re o yang: ngad: ra". Myid:zo: qe wa myhi" pho" qe: qhid' mae" ngaui qhang qaung" to: byid: nae" maang ngad: ra". Myhi" pho" qe kam" wa yao: bam: myid:zo: qe: qhid' mae"- ngaui qhang qaung" to: byid: ang: ako".

¹⁵Ngo wa naonhaung" re bao" thaug' nae" qhid' mae" ngo qo" ra" ja: alhab' re we' ngoyao" gaung dau: qam: o: alhab' rere: ngaui bau: za: ci yhung" pye' nae". Ngo naonhaung" re gyai jhid'de; re- naonhaung" ngore nang" ra" khyo" jhid'de; genae" i?

¹⁶Airumung: ngo wa naonhaung" re qo mala: nhao lo" ra" khyo re naonhaung" khae: yu genae" za: ngad:. Ngadqere: dayaug yaug wa- ngore nhag' lam: sham" yaug- naonhaung" re mhug' pyag' zo: yaug ngad: ra"- ga: ta" li" nae".

¹⁷Aire khoru: mhug' pyag' lo: ra" i? Naonhaung" jhao" ngo nhao: ke' ra" lagyo: qe khoyaug: lo, khyo" naonhaung" anyaug re khyug' zo" ra" i?

¹⁸Ngo wa Titu re naonhaung" jhao" ye: nae" qhid' mae" xo sho' mho' mung: Khristan mao:nhaung: dayaug rere: yao: we' daga" ngo nhao: ke' ra". Titu wa naonhaung" anyaug re khyug' zo" lo: ra" ein:- ta" genae" i? Yao: we' ngo wa nhag' lam: lo, mau" daja: za: we' mau" zaui: so" na: ru mangad: i?

¹⁹Ngonhaung" wa naonhaung" qhid' kheim: mae dayao: dayang ngonhaung" yao" gaung re ta" qid' na: ru ngad: ako" ga:- naonhaung" jho: re jho genae". Airu: mangad:- ngonhaung" wa Mao"So: qhid' kheim: mae Khristu ngonhaung" re ta" nhao nug: ru we' dakhyo:- ta" na: ru ngad:- Jhid'de; ra" ba nam qe we"- ngonhaung" zaui: so" lo: ra" gu: ja: khao: ngo" wa naonhaung" re bao" thaug' byid: nae" qhid' mae" angad:.

²⁰Ngo naonhaung" jhao" joe" li" lao"- ngo o ngaui: ru we' shai" yang: naonhaung" re li" myao nae" ru we'- naonhaung" o ngaui: ru we' shai" yang: ngore naonhaung" the' myao genae" rure ngo gyai myid: ci" na: lhe". Ngo wa- jho" myan" myo" ru- myid nug' ru- nhag' yo" ru- yao: yao" akyu" qho: ru- maphug' makhyad' kad' ru- gaui mho: ru- ngad beim" ru- mo, thaui: mo, yaug boe" ru jham re myao nae" rure myid: ci" na: ra".

²¹Thao dalhang naonhaung" jhao" dam: li" re- nga" Mao"So wa naonhaung" qhid' kheim: mae ngore qho' nhao nae" laug. Amung: lai: lo" ra" ayo, mae qobo shad' lhoe" ra" mo, myo: sho' wa ana" joe" sho' yao: bam: myid matha" lo:- gaung sho: jho" zam" ra" mau" zo"- gintho' zaung: ra" mau" zo" we' qhae ka ka: ra" qobo mae nab: shid: jo; ra" mo; qhid' mae" ngo ngug byid gyo" nae" we' myid: gyaug myid: ci" na:.