Read Maru 2 KORINTHU 13 Bible Online

2 KORINTHU 13 - Maru bible

2 KORINTHU 13

¹Ana" ngo wa- sam lhang ein: lhang naonhaung" jhao" joe" li" nae" ngad:- Jham: Mugsug' mae ta" ru we' dakhyo:- qobo zhaug' ra" mung- pe" ja" mung mae ngadqere:- Sagse: shid' yaug we' sam yaug; nhad' mae" thug' ra" dao: thoe: yang jao dang yu ca" ra".

²Shid' lhang ein: lhang ngo naonhaung" jhao" li" co' au:- thao: lhang ngo naonhaung" jhao" dam: joe" li" re wa- khag' rere: matang" to: lo: qobo dae byid: nae"- ein: qhid' phyao: qobo shad' lhoe" ra" mo, re we' gatau alhab' mo; re ta" peim" to: gau ngad va". Ana" re: ai we' dakhyo:- ngo wa va: mae" naonhaung" re dam: paug' yang: ta" peim" ke' nae".

³Khristu wa nga" nhad' dao: thoe: khyo" yang dao: jhau: na: ra" ga" ra" naonhaung" o: ra" sagse: alhab' naonhaung" qo" li" genae"- Khristu wa naonhaung" re mho" shid' ra" au:- qam: nang: yaug mangad: ngad: ra". Ai: atha" yao: wa naonhaung" phaung mae yao" qam: so' qhu" byid' ra".

⁴Pe"mung:ga"re yao: wa qam: nang: zo" re" pyao: zang dao mae jin" se' pye' ru qhug' sho' ngadqere:- Mao"So: qam: so' khyo" yang yao: wa kao so' daui: na: ra". Ngonhaung" re: yao: we' dadang: dalam: za: ngad: jo, mung:- qam: nang" ra". Ngadqere: naonhaung" we' ngonhaung" daga" zam" khug: rumae Khristu kao so' daui: khyo mae bo: ra" Mao"So: qam: so' khug mae ngonhaung" boqhug' leim nae" ngad: ra".

⁵Naonhaung" wa lam khug: rumae kao so' daui: na mo, ngad: la, mangad: la,- naonhaung" yao" gaung re nyang" za: jham" qu" mung: ca: qu" ge,- naonhaung" khug mae Khristu na: jo; rure- naonhaung" gaigai: yao: ba ko" i? Airu: mangad: re wa- naonhaung" jham" qu" rumae alhab' seim" byaug: ra" lajheim: thug' jo; ra".

⁶Ngonhaung" wa- ai: jham" qu" rumae seim" mo, mangad' rure naonhaung" ba genae"- ein: ngo myid: lam: ra".

⁷Naonhaung" pe" mashad' genae" qhid' mae" ngonhaung" wa- Mao"So re akyu" mho' ra". Airu: akyu" mho' ru wa- ngonhaung" wa jham" qu" rumae aung doe, mo, ngad: rure qhu" byid: nae" qhid' mae" mangad:- ngonhaung" wa jham" qu" rumae seim" ra" mo, we' dau nhohab ngadqere: naonhaung" wa jo: rure qo" zaui: so: genae" qhid' mae" ngad: ra".

⁸Pe"mung:ga"re ngonhaung" wa dangman" ru we' shai" yang:- daja: re: maqo" kad'- ai: dangman" rure za: ngonhaung" qo" kad' ra".

⁹Ngonhaung" qam: nang: mung: naonhaung" qam: bo gelao"- ngonhaung" wa ngaui bau" ra". Aimung:- naonhaung" wa jab byang" mo, boe" li" genae" qhid' mae" ngonhaung" akyu" mho' ra".

¹⁰Ngo joe" li" lao"- Asang: yang ngore byid' to" ra" kheim: so' re ci yang:- gyai thin: ra" khyo" mali" mho" qo nae" qhid' mae" ngo wa- ce: mugsug' re naonhaung" we' jho" va" na shi" au: mae" tung" ke' ru ngad: ra". Asang ngore byid' to" ra" kheim: so' wa- naonhaung" re phyo' qheim" pye' nae" qhid' mae" mangad:- zao: to' ke' byid: nae" qhid' mae" ngad: ra".

¹¹Nga" mao:nhaung: qe we"- airu: va" lhe"- qao" zin" na geshao:- jab byang" mo, boe" sho' qam: ke' ge,- nga" nho: mho' ra" dao: re tae" gyo: ge,- naonhaung" yao: cao: jho" vang" ge,- ngaui pyo: yaug yo za: na ge,- jhid'de; ru we' ngaui pyo: yaug yo: ra" Mao"So wa- naonhaung" we' daga" ngad: jo; li" nae".

¹²Naonhaung" yao: cao: mao:nhaung: jhid'de; myid we' jho" au" ge, Mao"So: byu qe alhab' mo, wa- naonhaung" re au" ke' ako".

¹³Asang Yesu Khristu nho: nhag' myan" ra" jeju- Mao"So: jhid'de; myid we' Gyang" Lho" Byo: nho: zam" khug: ru wa- naonhaung" alhab' mo, we' daga" ngad: jo, vashao: wo".