Read Maru 2 KORINTHU 2 Bible Online

2 KORINTHU 2 - Maru bible

2 KORINTHU 2

¹Airumung:- naonhaung" nhag' kaug' khyo mathug' nae" qhid' mae" naonhaung" jhao" madam: li" nae" ngo myid: phyid' to: va".

²Pe"mung: ga"re ngo naonhaung" re nhag' kaug' nhao: ngad: re wa- ngoyang nhag' kaug' nhao: ra" yaug mae" je yang:- ngore khag' yang bau: nhao lo nae" i?

³Ngo re ngaui bau: nhao nae" ang ko" ra" mo, khyo" yang ngore nhag' makaug' nhao genae" qhid' mae" ai: mugsug' re ngo naonhaung" jhao" tung" vhin: ke' ru ngad: ra". Pe"mung:ga"re ngo bau: lao" wa- naonhaung" alhab' mo, re: bau: genae" rure ngo khyag' ba: ra".

⁴Ngo wa gyai qi: sho' myid: qug: myid: ci" ru we' ngug byid myo: sho' gyo" yang:- naonhaung" jhao" mugsug' tung" ke' ru ngad:- ngo myid: qang: ru wa naonhaung" re nhag' kaug' nhao nae" qhid' mae" mangad:- naonhaung" alhab' mo, re ngo khoqhi" sho' jhid'de;- ga" rure naonhaung" re myid: beim: nhao nae" qhid' mae" ngad: ra".

⁵Ana" byu dayaug yaug ngore kaug' nhao: ru wa- ngore za: mangad:- naonhaung" alhab' mo, re nang" thao" daja: ja: khyo" yang kaug' nhao: ru ngad: ra". (Ngo ceru: ta" ru wa yao: re qobo la: sho' vhin nug yang: mangad:)

⁶Naonhaung" myo: lo bug: yang yao: re airu: qobo dae byid: vako" ru wa- yao" qhid' mae" ga" va" ra".

⁷Ana" kam" wa aiyaug gyai nhag' lam: gyoe, sho' makaug' byaug nae" qhid' mae" naonhaung" wa yao: re qobo khyad' pye' byid: mung:- yao: re qam: byid:- nhag' tang" byid: ge,-

⁸Airumung: naonhaung" yao: re gaigai: yao: jhid'de; rure yao: re ba nhao genae" qhid' mae"ngo naonhaung" re mho' ke' ra".

⁹Ngo naonhaung" re ai: mugsug' tung" vhin: ke' ru wa- naonhaung" wa ai: jham" qu" rure khoqhi" sho' qo" kham ko" rure re:- nga" mho dao: re phug' cao" nae" khonhae" re: jin" jin" ngad- mangad: ko" rure ngo ba nug yang: tung" ke' ru ngad: ra".

¹⁰Naonhaung" dayaug yaug re yao: shad' ra" qobo khyad' byid: yang: ngad: re ngore: yao: re qobo khyad' byid' ra". Pe"mung:ga"re dayaug yaug re ngo dang za: daja: ja: qobo khyad' byid: qo yang: ngad: re naonhaung" qhid' mae" Khristu nho: qhid' kheim: mae ngo khyad' pye' byid' ra".

¹¹Airu: kad' ru wa Satan wa ngonhaung" re maaung: pye' nae" qhid' mae" ngad: ra". Pe"mung:ga"re ngonhaung" wa satan" nho: myid: yaung: to" ra" khyo jham re ba: ra".

¹²Khristu nho: khyo Lau Dao: Gai re kho" kyo: nae" qhid' mae" Troa vogaung: khyo ngo joe" ye" lo" re- Asang wa ai: mae mau" zo" zaui: so: nae" qhid' mae" khyo kham: phung" to: byid' rure ngo myao: ra".

¹³Ngadqere: ngo wa- ngonhaung" mao:nhaung: pho" Titu re mayemyao yang:-gyai myid myo: myid: ci" pye' ra". Airumung: ngo wa- ai: vogaung: mae" mo, re au" to: co' yang: Makedoni mung" khyo xo' ye" lo" va".

¹⁴Ngadqere: Mao"So: jeju re caung:khin" ge, Pe"mung:ga"re Mao"So wa ngonhaung" re Khristu we' dadang: dalam: za: doe, nhao yang:- kyam: byu qekhyo"- Khristu nho: aung doe; poe mae- poe gaung: mae jhui" yan" lhau: ra" kyam: byu qere ru: khonhae" re: ngonhaung" re bojhui" yan" lhau: ra". Mao"So wa Khristu we' sin" ra" laba lajhao re nae pyo" ra" sheim we' dakhyo:- khyi" khao: ngo" mae nae: hau" lo" nhao nae" qhid' mae" ngonhaung" re ci yhung" ra".

¹⁵Pe"mung:ga"re ngonhaung" wa- khyad' yu: ru qhug' ra" mo; phaung mae re:- byaug: lo" ra" mo; phaung mae re:- nae: hau" lo" ra" Khristu yang qhaug' byid' ra" nae pyo" ra" sheim we' dau: ra".

¹⁶Byaug; lo" na: ra" mo; qhid' mae" ai: sheim wa- shid nhao: ra" bab sheim ngad mung:- khyad' yu: ru qhug' ra" mo; qhid' mae"- ai: sheim wa kao so' daui nhao: ra" nae pyo" ra" sheim ngad: ra".Airulao" ceru" ra" lo, mau" re khag' qo" kad' i?

¹⁷Ngonhaung" wa gaje qe myo: sho' we' dakhyo:- Mao"So: mungdao: re gau xoe" ra" xan: re we' dakhyo:- phaga: ga: aung: zo: mo, mangad:- ngonhaung" wa Mao"So: yang nhao: ke' mo, ngad yang:- Khristu nho: daui daui mo, khyo" Mao"So: qhid' kheim: mae Mungdao: re dang dangman: man: za: kho" kyo" ra" mo, ngad:.