Read Maru 2 KORINTHU 3 Bible Online

2 KORINTHU 3 - Maru bible

2 KORINTHU 3

¹Ceru: ta" ru wa- ngonhaung" wa ngonhaung" yao" khyo re phug: ru ngad: ra" i? Gaje qe we' dakhyo:- ngonhaung" wa naonhaung" jhao" pakham: mugsug' cili" qo: i? Mangad: lao"- naonhaung" mae" pakham: mugsug' ngonhaung" mho' yu qo: i?

²Naonhaung" wa byu alhab' mo, ba: nghe' mung: ba: gyo" yu nae" qhid' mae" ngonhaung" aung khug nhag' lam: mae tung" to" ra" ngonhaung" qo" ra" pakham: mugsug' yao: ngad: ako".

³Mugsug' ceru re Khristu yao: tung" mung:- ngonhaung" lo, khyo" vhin: ke' ru ngad: ra" khyo de: de: za: ngad: ra". Ai: tung" ce' wa mhaug' yang tung" ru mangad:- Kao so' daui: ra" Mao"So: Byo: yang tung" to" ru ngad: ra". Ai: tung" ce' wa laug pye: dao mae tung" to" ra" tung" ce' mangad:- Xao su byu: aung khug nhag' lam: mae tung" to" ra" tung" ce' ngad: ra".

⁴Ngonhaung" ceru: ta" ru wa- ngonhaung" wa Khristu khyo" yang Mao"So: khug mae lam: na mo, ngad yang:- ta" ru ngad: ra".

⁵Ngonhaung" wa ce: mau" zo" re qo" zaui: so: mo, ngad: ein:- ta" nae" khyo ngonhaung" mae pe" qam: o: mabo ngad: ra". Ngonhaung" qo" ra" qam: o: wa Mao"So byid' ru ngad: ra".

⁶Yao: wa ngonhaung" re ai: dao: thang" asag' nho: daui daui mo, boe" nae" qhid' mae" qam: o: byid' to" ra". Ai: dao: thang" asag' wa- tung" to" ra" tarha" mangad:- Byo: nho: tarha" ngad: ra". Ai: tung" to" ra" tarha" wa shid nhao: ra". Byo kam" wa kao so' byid' ra".

⁷Laug pye: dao mae kyaung: yang: tung" te' to" ra" tarha" re byid' ra" au:- Mao"So: phungbao bao: thug' li" ra"- ai: bao qhui: ru wa- Moshe nho: myo,nho mae" sham: lo" na sho' ngadqere:- Myo: sho' bao qhui: na shi" ruyang Israel byumyu" qe wa yao: re maqo" zhaug' qu" ngad: ako". Shid nhao: ra" tarha" re byid' ra" au: re lhao"- airu" ra" phungbao we' qam: so' we' ngad: re wa-

⁸Byo: nho: lo, mau" we' sin" ra" phungbao wa- khoqhi" sho' je yang: bao nae" i?

⁹Byu re dao: phyid' ra" tarha" wa phungbao we' byang" jo; ngad: re wa- khyad' yu: ra" khyo re byid' ra" lo, mau" wa- khoqhi" sho' je yang: phungbao byang" jo, nae" i?

¹⁰Ana" je: bao: thao" ra" phungbao mathao mae lai: lo" ra" yo, mae" gyai bao: ra" phungbao wa byaug: lo" byaug: ava" ein: gai: ta" ra".

¹¹Pe"mung:ga"re dazab za: kham: ra" ja: mae phungbao bao: ngad: re wa- apyad ato dang: jo; ra" ja: mae wa khoqhi" sho' je yang: phungbao bao nae" i?

¹²Ceru" ra" myid: lao" nae" rure ngonhaung" qo" yang:- ngonhaung" wa mazag mavae kad' ru ngad: ra".

¹³Ngonhaung" wa Moshe we' madau- Moshe wa yao: myo,nho sham: lo" byaug: rure Israel byu qe mathe' myao genae" qhid' mae" yao" myo,khung: re pha, jad; yang nghoe' ci: ra".

¹⁴Gaigai: yao: yao: bam: nhag' lam: go: to: qhug' ako". Ana" ba joe" sho' ai: dao: thang" axug' re nghe' gelao"- yao: bam: nhag' lam: wa ai: pha, jad: yang nghoe' to: byid' qhug' ako". Khristu we' xo' taui: lao" za:- ai: pha, jad re khyad' pye' byid' ru qhug' ra".

¹⁵Ana" ba joe" sho' lhao" re: Moshe tarha" re yao: bam nghe' khao: ngo"- ai: pha, jad wa yao: bam: nhag' lam: re nghoe' to: byid' ashi"-

¹⁶Jham: Mugsug' mae Moshe we' sin: yang: Asang shad' khyo phaug' lo lao" wa yao" pha, jad wa qhid' pye' byid' ra"- ga: tung" to" ru we' dakhyo: ai: pha, jad re qhid' pye' byid: gai: ra" ja: ngad; ra".

¹⁷Ana" cedau mae Asang ga" ru wa- Byo re ta" ru ngad: ra". Asang: Byo na: ra" jo, qo mae loe, beim khyo jo; ra".

¹⁸Airumung: ngonhaung" alhab' mo, wa- myo,khung: nghoe' re qhid' pye' mung:- Asang: nho: phungbao re tug' bao byid' ra" Byo ngad: ra". Asang mae" byid' ra" phungbao yao: ngonhaung" re je yang: qi" ra" phungbao khyo tha" lo" byaug nhao: ra".