Read Maru 2 KORINTHU 5 Bible Online

2 KORINTHU 5 - Maru bible

2 KORINTHU 5

¹Pe"mung:ga"re- ce: myid gaung mae ngonhaung" na: jo; ra" yham zaung ngad: ra" ngonhaung" gaung khyao byo; qeim: lo" lao"- mug:gaung dao mae Mao"So yao: ngonhaung" na nae" qhid' mae" kad' to: byid' ra" apyad ato: yham ngonhaung" re byid' li" nae" rure ngonhaung" ba: ra".

²Ana"- ngonhaung" nokyang: kyang" na mung:- mug:gaung dao mae" ngonhaung" gaung khyao yham re qo" zhaung" ve; yu nae" qhid' mae" ngonhaung" gyai kao bau: na: ra".

³Airu: qo" zhaung" ve; yu lao"- ngonhaung" wa gaung pyad' ngad: nae" mangad:-

⁴Ngonhaung" wa ce: myid gaung mae" yham zaung mae na: jo; au:- dayin dayo: nokyang: kyang" na: ra". Airu: ngonhaung" nokyang: kyang" na: ru wa- ce: ngonhaung" myid gaung dao mae" gaung khyao re khyad' pye' nug yang: mangad:- shid ba: ru wa kao so' daui: ra" khyo akhyao khyo tha" lo" ru qhug' nae" qhid' mae" mug:gaung dao mae" gaung khyao re ngonhaung" qo" kham: yu nug yang: ngad: ra".

⁵Mao"So wa ceru: tha" lo" nae" qhid' mae" ngonhaung" re nyhang" jaung: to: byid: yaug ngad: ra". Ngonhaung" qhid' mae" yao: qaung" to" ra" ja: alhab' qhid' mae" pakham: byid' ra" khyo" yao: wa ngonhaung" re yao" Byo byid' ava".

⁶Airumung: ngonhaung" wa vae" ra" myid khonhae" re: bo: jo; ra"- ce: gaung khyao yham mae ngonhaung" ana: jo, jo, wa Asang na: jo; ra" jo, qo we' va" kyo: na: jo; rure ngonhaung" ba: ra".

⁷Pe"mung:ga"re ngonhaung" nho: kao so' daui: na: ru wa- myo; yang myao: ra" ja: re ngha: ru mangad:- lam khug: ra" myid mae ngha: ru ngad: ra".

⁸Ngonhaung" wa vae" ra" myid to, ngad: jo, mung: ce: gaung khyao yham re to: co'mung: Asang we' daga" na nae" je yang: o ngaui: ra".

⁹Ngonhaung" wa cetau mae na ngadqere:- thoetau mae na ngadqere:- Asang re ngaui nhao nae" qhid' mae" gaja: re tho' ngonhaung" je: o: ra".

¹⁰Pe"mung:ga"re ngonhaung" alhab' mo, wa- yao" yang dao: kho' ru qhug' nae" qhid' mae" Khristu qhid' kheim: mae yeye; jo, qo: ra". Lo, mau" gai: ru magai: rure cao" yang:- yao" voman: yao: man: qi" ra" khyo"- yaug khao: ngo" qo" kham: yu: bam zai ngad:-

¹¹Ngonhaung" wa Asang re gyaug: ru wa pe" ngad: ga" rure ba mung:- su gaje qere re: ta" ngaug: aung: yu nae" ngonhaung" qam: ke' ra". Mao"So wa ngonhaung" khyo re jab sho' ba: ra". Naonhaung" re: nga" khyo re naonhaung" yao" aung khug mae ba genae"- ein:- ngo myid: lam: ra".

¹²Ngo ceru: ta" ru wa- ngonhaung" yao: gai: ra" khyo re naonhaung" re dam: ta" phug: kyo" na: ru mangad:- ngonhaung" dao mae naonhaung" qo" phug nae" akhyo gai ngonhaung" naonhaung" re byid' ru ngad: ra". Airulao"- byu: nho: ave, akyang re maqu" lo:- adao shad' myo,nho re za: qu" yang: phug ko" ra" mo, re dao: qo" tau: byid: genae" ngad: ra".

¹³Gaigai: ngonhaung" go va" i? Ngonhaung" go: re wa Mao"So: qhid' mae" go: ru ngad: ra". Ngonhaung" gyang" ru ngad: re wa- naonhaung qhid' mae" ngad: ra".

¹⁴Khristu nho: jhid'de; myid wa ngonhaung" re eib: na: ra"- Byu dayaug yaug wa gaje yaug khao: ngo" qhid' mae" shid kham: byid' re ngonhaung" alhab' boshid va" ga" ra" lajheim: re khyag' za: ngonhaung" ba: ra".

¹⁵Pe"mung: alhab' mo; qhid' mae" Yesu shid kham: byid' ru wa- kao so' daui: ra" mo, wa yao: yao" akyu" qhid' mae" kao so' madaui lo:- yao: bam: qhid' mae" shid kham: mung: dam: daui: to" li" ra" Asang: akyu" qhid' mae" za: kao so' daui genae" qhid' mae" ngad: ra".

¹⁶Airumung:- ngonhaung" wa khag' rere:- xao su byu: azhao" re cao" yang: qu" lo nae" mangad:- ganhae"- Khristu re xao su byu: azhao" re cao" yang: qu" bam va". Ngadqere: airu: dam: qu" lo nae" mangad:-

¹⁷Byu dayaug yaug Khristu we' dagaung dasho: za: doe; byaug lao"- yao: wa byu sag' boe" li" ra". Axug' wa lai: lo" byaug mung:- asag' boe" lo: ra".

¹⁸Ceru alhab' wa- Mao"So: yang kad' ru ngad: ra". Mao"So wa ngonhaung" re gyevo qe ngad: rumae" yao" ba nam qe boe" sho' Khristu khyo" yang ngonhaung" re tha" lo" nhao mung:- gaje qere re: yao" ba nam qe boe" sho' kad' nae" mau" ngonhaung" re byid' ra".

¹⁹Ngonhaung" kho" kyo" ra" mungdao: wa- Mao"So wa Yesu Khristu khyo" yang byumyu" cao jab re yao" ba nam qe boe" nhao: ra"- ga" ru ngad: ra". Mao"So wa yao: bam: qobo re maxam" to: byid: ngad: ra". Yao: bam re khoru: yao" ba nam qe boe" lo nhao: ra" ga" ra" mungdao: re ngonhaung" re byid' to" ava".

²⁰Airumung:- ngonhaung wa Khristu: nho: lagyo: qe boe" yang: jhau: na: ru ngad: ra". Mao"So yao: yao:- ngonhaung" nhad' dao: thoe khyo" naonhaung" re mho' na: ra". Naonhaung" wa gyevo qe ngad: rumae" Mao"So: ba nam qe boe" lo geri:- ein: Khristu gaung tha" ngonhaung" mho' ra".

²¹Khristu wa qobo maqo" yaug ngad: ra". Ngadqere: ngonhaung" wa Khristu we' dadang: dalam: za: doe, mung: Mao"So: din:man" rumae qo" boleim nae" qhid' mae" Mao"So wa- ngonhaung" mathao mae Khristu re ngonhaung" qobo mae boleim nhao: ra".