Read Maru 2 KORINTHU 6 Bible Online

2 KORINTHU 6 - Maru bible

2 KORINTHU 6

¹Airumung:- ngonhaung" wa Mao"So: mau" vin vo; na zo" re" Mao"So: nhag' myan" ra" jeju re qo" khae: yu va" mo, naonhaung" re- aire aje amyid dakad' pye' ge,- ein: naonhaung" re gyai mho' ke' ra".

²Pe"mung:ga"re Ngo nao re nhag' khyag' myid qhu" byid: nae" ayo, joe" au:- ni" mho' yao thoe re tae" gyo: byid: va"- ngo wa nao re khyad' yu nae" ayo, joe" au: rere:- nao re bao" thaug' byid: va" ga: Mao"So ta" ra". Tae" gyo: ge, Mao"So: nhag' khyag' ra" jeju re khae: yu nae" ayo, wa- ana" yao: ngad: ra". Ana" ba wa- khyad' yu: ru gai: qhug' ra" ba na ngad: ra". ga: Mao"So ta" rure gyo: ge,

³Ngonhaung" mau" zo" re khag' re: qobo qho genae" rure ngonhaung" ma-o mung:- khag' nho: qhid' au: mae re: kaung: kag' ru ngonhaung" mato: byid:.

⁴Airu: kad' nae" atha"- sho: jhin: ru- aqug: akhai: qhug' ru- qug: khai: qhug' ru jham re nhag' lam: qhang qhang za: zang: qhao" ra" khyo" yang ja: khao: ngo" mae ngonhaung" wa Mao"So: daui daui mo, ngad: rure qhu" byid' na: ra".

⁵Ngonhaung" wa- be; ru- thaung: lhaung" ru- qhug' mung:- mo, thaui: mo, yaug kad' ru qhug' lo va". Ngonhaung" wa matu" maka" mau" zaui: ca" ru we'- mayab macam:- mazo: mashaug' na: lo: ra".

⁶Gyang" san: ru- laba lajhao ba: ru- nhag' lam: qhang: ru- nhag' khyag' ru khyo" yang re: Gyang" Lho" Byo khyo" yang re:- ngonhaung" nho: dangman" ra" jhid'de; myid khyo" yang re:- ngonhaung" kho" kyo" ra" dangman" ra" mungdao: khyo" yang re:-

⁷Mao"So: qam: so' khyo" yang re:- ngonhaung" wa Mao"So: daui daui mo, ngad: rure qhu" byid' lo va". Ngonhaung" wa gyekhe' rumae re:- ngonhaung" yao" gaung re gug: gam: rumae re:- din:man" ru wa ngonhaung" nho: shae lhae ngad: ra".

⁸Ngonhaung" wa phug' te' nga: yhe' rure:- maphug' makhyad' kad' rure re: qhug' ra". Gaui mho: rure re: caung:khin" rure re: qhug' ra"- ngonhaung" re mhug' hab' qekhyo" jho gengadqere:- ngonhaung" wa dangman" ra" dao: re jhau: ra".

⁹Khag' yang maba mabeim: mo, ru" ru ngadqere: alhab' yang ba: ra" mo, ngad: ra". Shid: lo" na mo, ru: ngadqere:- naonhaung" myao: ru we' dakhyo:- kao so' daui: na mo, ngad: ra". Qobo dae byid' rure kham zo: sho' ngadqere:- se' pye' ru maqhug'-

¹⁰Kaug' ru qhug' sho'ngadqere- khonhae" re: ngaui bau" na: ra". Ngonhaung" wa myaung sho: nhohab ngadqere:- byu myo: sho' re qo" nhao mo, ngad: ra". Pe" maqo" nhohab ngadqere:- ja: khao: ngo" re sang mo, ngad: ra".

¹¹Korinthu vogaung: mae" jhid'de; ra" ba nam qe we"- ngonhaung" wa de: de: za: naonhaung" re ta" kyo: va". Naonhaung" qhid' mae" ngonhaung" aung khug nhag' lam: lae lae za: phung" to: byid: va".

¹²Ngonhaung" aung khug nhag' lam:re naonhaung" qhid' mae" pyid' pye' ru mangad:- naonhaung" lam: kam" wa- ngonhaung" qhid' mae" pyid' pye' avako".

¹³Ana"- ngo wa naonhaung" re nga" zo: dau qere we' dakhyo:- ta" geli". Naonhaung" qhid' mae" ngonhaung" qhu" byid' ra" jhid'de; myid aire yao: naonhaung" re qhu" byid: gela,- naonhaung" aung khug nhag' lam: re lae lae phung" to: ge,.

¹⁴Malam khug: ra" mo, we' qham yang: yao: bam we' dakhyo: za: ngad: ra" khyo" mau" dazam" zaui: ge,- pe"mung:ga"re airu: mau" magai: zaui: ngad: ra". Jo: ru we' shad' ru wa khoru: byin zam" gai: boe" nae" i? Mug: bo" we' mug: cad' khoru: qo" gai: zam" na nae" i?

¹⁵Khristu we' Satan khoru: myid gai: jho" vang" nae" i? Lam khug: ra" yaug wa malam khug: ra" yaug we' dakhyo: za: dau: ra" khyo pe" jo; ra" i?

¹⁶Mao"So: yham wa so sulho jham we' khoru: qo" jho" nge, nae" i? Pe"mung:ga"re ngonhaung" wa kao so' daui: na: ra" Mao"So: yham ngad: ra". Mao"So wa- Ngo wa- nga" byu qe: phaung mae nga" yham kad' mung:- Yao: bam we' daga" na: jo, nae"- Ngo wa yao: bam: Mao"So boe" mung:- Yao: bam wa nga" byumyu" qe ngad: li" genae"- ga: ta" ru we' dakhyo: ngad: ra".

¹⁷Airumung: Mao"So wa- naonhaung" yao: bam: phaung mae" thug' lo" ca"- Yao: bam we' naonhaung" gao" pye' ge:- Masan masin" ra" ja: pe" re: dakad' ge,- Ailao" ngo naonhaung" re khae: yu nae".

¹⁸Ngo wa naonhaung" yao: Pho" ngad nae"- Amung: naonhaung" wa nga" yauggai zo: myiqe: zo: qe ngad: li" genae"- ga: Qam: bo: thao" ra" Mao"So ta" ra"- ga: ta" ra".