Read Maru 2 KORINTHU 7 Bible Online

2 KORINTHU 7 - Maru bible

2 KORINTHU 7

¹Ngo jhid'de; ra" ba nam qe we"- ce: dao:so: jham alhab' wa- ngonhaung" qhid' mae" ngad: ra". Airumung: ngonhaung" yao" gaung dau: re we' Byo re masan masin" boe" nhao: ra" maca' majhad' ja: khao: ngo" re kyang" san: pye' mung:- Mao"So re gyaug phug' ra" khyo"- gyang" lho" thao" ra" khyo mae su" na gelang:-

²Naonhaung" aung khug nhag' lam: mae ngonhaung" re khae: yu gela,- ngonhaung" wa khag' rere: mashad' qu"- khag' rere: byo; qeim sho' ngonhaung" makad' qu"- khag' mae" re: matarha" ra" khyo" ngonhaung" gau pai: macab' zo" qu".

³Naonhaung" re dao: phyid' nae" qhid' mae" ngo ce ta" ru mangad:- pe"mung:ga"re- qhid' phyao: ngo ta" va" ru we' dakhyo:- ngonhaung" wa khonhae" re:- naonhaung" we' shid ngadqere: daga"- daui ngadqere: daga" ngad sho'naonhaung" re gyai jhid'de; yang: ngad:.

⁴Ngo wa naonhaung" re gyai lam: ra". Amung: naonhaung" mathao mae ngo gyai phug: na:- ngo wa qug: khai: aja: ja: qhug' sho' ngadqere: qam: byang" jo, mung:- matho' ta" losho' ngaui bau" na: ra".

⁵Ngonhaung" wa Makedoni mung" khyo joe" ye: thao re lhao" re:- ngonhaung" dugno: yo, maqo" ngad: ra". Khyi" khao: ngo" mae qug: khai: sho: jhin: ru- su gaje qe we' myan" myo: jho" byo; ru- aung khug nhag' lam: mae gyaug ci" ru jham we' thaung" qhug' ra".

⁶Ngadqere: nhag' lam: thao" mo, re qam: byid' na: ra" Mao"So wa- Titu re ngonhaung" jhao" joe" li" nhao: ra" khyo" ngonhaung" re qam: qo" nhao: ra".

⁷Yao: joe" li" ruyang za: ngonhaung" re qam: qo" nhao: ru mangad:- naonhaung" khoru: yao: re qam: byid' ke' ko" ra" lau thoe rere: the' gyo: yang:- ngonhaung" re qam: qo" nhao: ra". Naonhaung" ngore khoru: myao nug ko" ra" khyo- naonhaung" khoru: myid qo" tha" ko" ru- naonhaung" khoqhi" ngore qhaung: yu nug ko" ra" khyo jham re Titu wa ngonhaung" re lota" kyo: mung:- ana" ngo wa je yang: ngaui bau" ra".

⁸Ai: nga" mugsug' yang naonhaung" re nhag' kaug' nhao sho' ngadqere:- ngo wa ai: mugsug' re tung" yang: nhag' makaug' ngad: ra". Ai: mugsug' yang naonhaung" re dazab zo: nhag' kaug' nhao: rure ngo myao: au:- ngo nhag' kaug' ngadqere:-

⁹Ana" wa- ngo ngaui bau: va"- ai:ru wa naonhaung" re ngo nhag' kaug' nhao: ruyang mangad:- naonhaung" nhag' kaug' ru wa naonhaung" nhag' lam: re tha" pye' nhao: ruyang ngo ngaui bau" ru ngad: ra". Ai: nhag' kaug' rure Mao"So: yang ci: ra"- ngonhaung" wa naonhaung" re pe" re: mano nhao ngad: ra".

¹⁰Pe"mung:ga"re Mao"So: yang ci: ra" nhag' kaug' ru wa khyad' yu: rure qo" yu nhao: ra" myid tha" rure boe" nhao: ra". Airumung: aimae nhag' kaug' ru majo, ngad: ra". Ngadqere: xao su byu: myid khyo" za: nhag' kaug' ru wa- shid nhao: ra".

¹¹Ce: naonhaung" nhag' kaug' rure Mao"So khoru: ci yhung" rure qu" ge,- ai: ruyang naonhaung" re nhag' lam: to" nhao: ru- naonhaung" qobo maqo" rure qhu" byid: nae" khoqhi" kao bau: na: ra" khyo- nhag' jam: yo" ru- nhag' lam: lha" na: ru- kham zo" ra" myid aja: ja: thaung" qhug' ru lam khug: myid kao bau nhao: ru wa qobo qo" yaug re qobo dae byid: nae" jin" jin" ngad nhao: ra" khyo jham naonhaung" re boe" nhao: ra". Ja: khao: ngo" mae naonhaung" qobo maqo"- ga" ra" khyo re naonhaung" yao" gaung yao: qhu" byid' avako".

¹²Ai: mugsug' re ngo airu: tung" ke' sho' ngadqere:- shad' ra" mau" kad' yaug: mathao: yang re: mangad:- shad' ra" mau" re kham zo" ra" yaug: mathao mae re: mangad: ngad: ra"- ai: atha" naonhaung" wa ngonhaung" re khoqhi" jhid'de; kao bau: na ko" rure qhid' kheim: mae naonhaung" yao: de: de: nyang" za: myao nae" qhid' mae" myid yang: tung" ke' ru angad: ra".

¹³Ceru: mung: ngonhaung" qam: qo" bam va". Ngonhaung" wa qam: qo" ru za: mangad:- naonhaung" alhab' mo, Titu re khoru: bau: nhao gemung:- ai:ru: mathao mae yao: khoqhi" ngaui bau" ra" khyo- ngonhaung" ba: yu yang: ngonhaung" re: khoqhi" sho' ngaui bau" na: bam: i?

¹⁴Ngo wa Titu re naonhaung" khyo phug: kyo: va". Naonhaung" re: ai: mathao mae ngore qho' maphyo' ko" ngad: ra". Ngonhaung" wa khonhae" re: naonhaung" re dang: ra" dao: za: jhau: lo: ra". Ai we' dakhyo:- ngonhaung" yang Titu re naonhaung" khyo phug: kyo" to" ru we' dakhyo: dang: rure sagse: qhu" byid' avako".

¹⁵Naonhaung" alhab' yao" dao: re tae" gyo: genae" jin" jin" ngad: na ko" rure re:- naonhaung" wa khoqhi" gyaug: nin" ru we' yao: re lham: tug: khae: yu ko" rure re:- yao: myid: beim: yang: naonhaung" re jhid'de; ra" yao" jhid'de; myid je yang: qi" qhang: li" ra".

¹⁶Ngo wa naonhaung" re jab byang" sho' qo" lam va" ruyang gyai ngaui bau" ra".