Read Maru 2 KORINTHU 8 Bible Online

2 KORINTHU 8 - Maru bible

2 KORINTHU 8

¹Mao:nhaung: qe we"- Makedoni mung" mae" phung: jham re Mao"So byid' ra" nhag' myan" ra" jeju khyo re ngonhaung" wa naonhaung" re ba nhao nug: ra".

²Yao: bam wa khyag' qhui: ru jham: yang dae xo sho' jham" qu" ru qhug' lai: lo: ako". Ngadqere: yao: bam wa gyai myaung sho" na ngadqere: gyai ngaui bau: zo" re" Alu: ngaui maqhag' losho' ke' avako".

³Yao: bam qo" ke' ra" qhi" Alu: ke' avako". Ai: tho' lhao" re: je yang: Alu: ke' vako" ra" khyo re ngo naonhaung" re sagse: qo" kham: ra".

⁴Yao: bam Yuda mung" mae" Mao"So: byu qere bao" thaug' byid' ra" mau" zo" mae bobo nae" akhang" qo" yu nae" qhid' mae" yao: bam yao" myid khyo" yang- ngonhaung" re kyid kyid ga: mho' ako".

⁵Yao: bam wa ngonhaung" myid: to" ru tho' je yang: Alu: ke' ko" ra". Sao qhid' yao: bam yao" gaung dau: Asang re qhaug' byid' ako". Ai: thao re Mao"So myid o: ra" khyo"- yao: bam yao" gaung dau: re ngonhaung" re bao" thaug' ra" mau" mae re: qhaug' byid' ako".

⁶Aimung: ce: mau" zo" re zaui" qhid: lo: ra" Titu wa- ce: jhid'de; aung lam Alu: mau" zo" re xo' yang: naonhaung" aung lam Alu: byid' ra" mau" re bin sho' naonhaung" re bao" thaug' byid: nae" qhid' mae" ngonhaung" yao: re jhan" na: ru ngad:.

⁷Naonhaung" wa lam khug: rumae- dao: jhau: rumae- laba lajhao ba: rumae- su re bao" thaug' nae" kao bau: rumae- ngonhaung" re jhid'de; rumae gyai qo" mo, ngad: ako". Airumung:- ce: jhid'de; myid aung lam Alu: ke' ra" mau" zo" mae re:- mabyag maqhag' lo: Alu: ke' ra" mo, boe" nhao nug: ra".

⁸Amyin" byid' ra" khyo" ta" ru wa mangad:- ngadqere: ngo wa su gaje qenho: Alu: ke' ru khoqhi" kao bau: ra" khyo re ta" kyo: yang: naonhaung" jhid'de; myid khoqhi" ngad: rure ba nae" qhid' mae" ta" ru ngad: ra".

⁹Ngonhaung" wa Asang Yesu Khristu nho: nhag' myan" ra" jeju re ba: ako". Yao" myaung sho" ru khyo" yang naonhaung" re qo" nhao nae" qhid' mae" yao: wa qo" yaug ngadqere:- naonhaung" mathao mae yao: yao" gaung re myaung sho: yaug boe" na ge,-

¹⁰Nga" myid khyo" ta" gelang: ein: re- naonhaung" anhag' mae" zaui" qhid: to: ko" ra" mau" zo" re ana" zaui" pin" ko" re je: gai: ra". Naonhaung" wa ai: mau" zo" re sao qhid' zaui" qhid: ru za: mangad:- nug kao bau: ra" myid bo: ra" sao qhid' mae" phung: jham ngad: ako".

¹¹Airumung:- ai: mau" zo" re xo' yang: zaui" pin" pye' ge,- naonhaung" ai: mau" zo" re myid: yaung: ra" au: re nhag' lam: to" ko" ru we' dakhyo:- zaui" pin" nae" re: kao bau ge,- naonhaung ana" qo" to" rure cao" yang: zaui: so" ye: ge,

¹²Naonhaung"- Alu: ke' nae" myid kao bau ko" re wa- Mao"So wa naonhaung" maqo" ke' ko" rure cao" yang: mangad:- naonhaung" qo" ke' ra" qam: re cao" yang: ke' byid' ra" Alu: jhaung qhu" re khae: yu byid' li" nae".

¹³Ngowa naonhaung" dao mae qola: kai: byid: yang:- su gaje qere bao" thaug' ru qo" nhao mae" qhid' mae" kad' na: ru mangad:- naonhaung" wa ana" au: magan: mago" qo" ko" ruyang ai: qo ca" ra" mo, re naonhaung" bao" thaug' byid: ang: ako". Ailao"-naonhaung" qo ca" ra" au: re yao: bam: qo" ru wa naonhaung" re bao" thaug' byid' li" genae"- ceru: kad' mung: shid' shad' geim" nyang nyang za: boe" nhao: ra".

¹⁵Jham: Mugsug' mae- myo: sho' gaug: zhang: yu yaug re: myo: sho' maqo"- dajhid' za: gaug; zhang: yu yaug re: gyai malaug lo: mamung ga:- tung" to" ru we' dakhyo: ngad: ra".

¹⁶Naonhaung" re bao" thaug' byid: nae" ngonhaung" nhag' lam: to" ru we' dakhyo:- Titu rere: nhag' lam: to" nhao: ra" Mao"So: jeju re caung:khin" ra".

¹⁷Titu wa ngonhaung" nhao: ra" dao: re khae: yu: ru za: mangad:- naonhaung" re bao" thaug' byid: nae" gyai kao bau mung:- naonhaung" jhao" ye: nae" qhid' mae" yao: yao" myid: yang myid: phyid' yaug ngad: ra".

¹⁸Ngaui Bau" Lau Dao: re kho" kyo" ra" mathao mae phung: khao: ngo" yang gyai phug' myao: byid' ru qhug' ra" mao:nhaung: pho" dayaug re Titu we' daga" naonhaung" jhao" ngonhaung" nhao: ke' ra".

¹⁹Ai: tho' mago" mao:nhaung: pho" wa- Mao"So: phungbao bao: li" nae" qhid' mae" we' ngonhaung" bao" thaug' byid: nug: ra" myid re ba nhao nae" qhid' mae" ce: jhid'de; aung lam Alu: ngaui khyui: ra" mau" zo" zaui: so" rumae ngonhaung" we' daga" gyaung: su" qin" nae" phung: jham: yang khyin: san: to" ra" yaug ngad: ra".

²⁰Mabyag maqhag' lo: qhaug' byid: ko" ra" ce: Alu: jhaung qhu" jham re zam: pyo: ra" mau" zo" mae khag' yang re: qobo vhin jung" gaui: pye' ru maqhug' nae" qhid' mae" ngonhaung" gyai lha" yang: zaui: so" na:.

²¹Ngonhaung" au: qang khyo wa- Mao"So: qhid' kheim: mae za: mangad:- Byu: qhid' kheim: mae re: jo: ra" lo, mau" re za: kad' nae" ru ngad: ra".

²²Airumung ngonhaung" wa- yao: shid' zo: we' daga" ngonhaung" mao:nhaung: pho" dayaug rere: bonhao: ke' ra". Ngonhaung" wa yao: re myo: sho' lhang jham" qu" mung:- khonhae" re: bao" thaug' mau" zo" mae gyai nhag' lam: to" yaug ngad: rure ngonhaung" ba: ra". Ana" yao: ngonhaung" re myid: lam: ru je: qi" li" va" rumung: bao" thaug' nae" myid je: kao bau: li" ra".

²³Titu nho: khyo we' sin: yang: ta" gelang: ein: re- yao: wa nga" mau" vin cao: we' naonhaung" re bao" thaug' byid' ra" mau" zo" mae ngo we' daga" mau" zaui: cao: ngad: ra". Yao: we' daga" bocao ko" ra" mao:nhaung: gatau shid' yaug wa- phung: jham: nho: gaung tha" lagyo: tao ngad mung:- Khristu nho: phungbao re bao: thug' li" nhao ko" ra" byu shid' zo: re: ngad: ako".

²⁴Naonhaung" khyo re ngonhaung" phug: ta" na: ra" khyo dang: rure- phung: jham alhab' dang za: ba: lo genae" qhid' mae" yao: bam re naonhaung" jhid'de; myid qhu" byid: ge,.