Read Maru 2 KORINTHU 9 Bible Online

2 KORINTHU 9 - Maru bible

2 KORINTHU 9

¹Yuda mung" mae" Mao"So: byu qere bao" thaug' ra" khyo re ngo naonhaung" re mugsug' tung" ke' maqo ngad: ra".

²Pe"mung:ga"re naonhaung" wa bao" thaug' byid: nae" o nug kao bau mo, ngad ko" rure ngo ba:. Amung: ngo wa naonhaung" khyo re Makedoni byu qere phug: kyo: byid: va". Akhaia mung" mae" mao:nhaung: qe wa anhag' mae" lhao" re: Alu: ke' nae" qhid nae" jin" jin" nyhang" jaung: to" avako"- ein: yao: bam re ngo ta" va". Naonhaung" byid: nug kao bau: ra" myid wa yao: bam myo: phyao: re kao bau myid lhau: zhung" to" ke' byid' ra".

³Naonhaung" khyo ngonhaung" phug: ta" ra" dao: jham akeim maboe" nae" qhid' mae" ce: mao:nhaung: qere naonhaung" jhao" nhao: ke' ru ngad: ra". Ngo ta" to: va" ru we' dakhyo:- naonhaung" bao" thaug' byid' ra" Alu: ngaui re jin" jin" seim" nyhang" to: genaeva"-

⁴Ngadqere: Makedoni byu damyo" ngo we' daga" bocao: li" mung:- naonhaung" jin" jin" makad' to: ko" rure li" myao ko" ngad: re wa- naonhaung" khoqhi" qho' thug' genae" rure za: data" shi:ge,- naonhaung" re ngonhaung" yang khoqhi" myid: lam: pye' yang: khoqhi" sho' qho' thug' nae" i?

⁵Airumung: naonhaung" dao:so: byid' to" ra" Alu: ngaui jhaung qhu" re qo" nyhang" jin" to: genae" qhid' mae" ce: mao:nhaung: qere gau: qhid' khae" yang:- naonhaung" jhao" ye: nhao: ke' ca"- ein: ngo myid: ra". Ngo joe" li" ra" au:- ai: Alu: ngaui wa jin" jin" bin: zhang: to: gau ngad: li" nae". Amung: naonhaung" wa ai: Alu: ngaui re jhan: qhug' yang: byid' ra" khyo" mangad:- naonhaung" yao: myid nug kao bau yang: byid: ko" ru ngad: ga" ru wa- de: de: za: ngad: li" nae".

⁶Myug: shi: dajhid' za: sin" ra" yaug wa- dajhid' za: qo" jham" yu: li" nae". Myug: shi: myo: sho' sin" ra" yaug wa- ashi: myo: sho' qo" jham" yu: li" nae" ngad: rure myid: beim: ge,-

⁷Airumung: yaug khao: ngo" wa- yao: yao" aung khug mae myid: phyid' to" ru we' dakhyo:- Alu: byid: qo: ra". Amyid: avho: myid we' re:- byid: nae" qo bo: ga" ra" myid we' re:- Alu: magai: byid: ngad: ra". Pe"mung:ga"re Mao"So wa ngaui bau" ra" myid we' Alu: byid' ra" yaug re jhid'de; ra".

⁸Mao"So wa ngonhaung" qo ca: gu: alhab' mae jan" sho' qo" byid: yaug ngad: ruyang naonhaung" qo ca" ra" ja: khao: ngo" qhid' mae" khyao qo" na: ru za: mangad:- gai: ra" khyo khe' khao: ngo" mae byid: nae" qhid' mae" re: laug sho' qo" li" genae".

⁹Jham: Mugsug' mae Yao: wa myaung sho" ra" mo, re mabyag maqhag' lo:- gae byid' ava". Yao" nhag' khyag' shogu: ru wa- apyad ato dang: jo; ra"- ga: ta" to" ra".

¹⁰Myug: shi: sin" ra" yaug re myug: shi: we' zo:ve byid' ra" yaug Mao"So wa- naonhaung" qo ca" ra" myug: shi: alhab' rere:- byid: mung: aire yaug: qi" li" nhao: li" nae". Naonhaung" nho: byid: nug kao bau: ra" mau" zo" mae" ashi: myo: sho' qo" jham" yu nhao: li" nae".

¹¹Naonhaung" wa ayo, khao: ngo" mae- byid: nug kao bau taung" qo" gae byid: genae" qhid' mae" Mao"So wa naonhaung" re khonhae" re:- qo" nhao: li" nae". Ailao"- ngonhaung" lo, mae" naonhaung" Alu: jhaung qhu" re lham: qo" khae: yu ko" ra" mo, myo: sho' wa- Mao"So re jeju caung:khin" byid' li" genae".

¹²Pe"mung:ga"re naonhaung" ce: mau" zo" re zaui: so" na ko" ra" ce: mau" wa- qo ca" na ko" ra" Mao"So: byu qere bao" thaug' byid' ru za: mangad:- Mao"So: jeju re caung:khin" byid' ra" thoe rere: byang" sheim: li" nhao: ra".

¹³Naonhaung" bao" thaung' byid' ra" ce: mau" zo" re qu" yang:- byu myo: sho' wa naonhaung" lhang: yu ko" ra" Khristu nho: khyo Ngaui Bau" Lau Dao: re jhaug' zaug za: phug' cao" na ko" ruyang re:- yao: bam re we' gaje yaug khao: ngo" re naonhaung" byid: nug kao bau taung" gae byid: ko" ra" mau" zo" mathao mae Mao"So: jeju re caung:khin" byid' li" genae".

¹⁴Naonhaung" wa gakai: lai mung: Mo"So: nhag' myan" ra" jeju re qo" kham zo: geyang: yao: bam wa naonhaung" re gyai jhid'de; kao taui" ra" myid we' naonhaung" re akyu" mho' byid' li" genae".

¹⁵Aphug' matho' ta" ra" yao" jeju jhaung qhu" mathao mae Mao"So re ngonhaung" caung:khin" byid: gelang:-