Read Maru GALATI 3 Bible Online

GALATI 3 - Maru bible

GALATI 3

¹Galati phung: byu ago qe we"- naonhaung" re khag' nho: man: dan" yang maung: to" ra" i? Pyao: zang dao mae Yesu Khristu shid kham" ra" bao qab re de: de: za: myao: jo, nae" naonhaung" myo, khung: mae te' to: byid: va".

²Mao"So: Byo re naonhaung" qo" khae: yu ko" ru wa- ai: kham" to" ra" Tarha" re phug' cao" ra" khyo" ngad ko" i? Mangad: lao"- Ngaui Bau" Lau Dao: re the' gyo" yu mung: aire lam" geyang: qo" khae: yu ko" ru ngad: i? Ce: dao: kheim: ngore ta" kyo" qu" gela,-

³Naonhaung" aiqhi" sho' go ko" i? Naonhaung" wa Mao"So: Byo khyo" yang zaui" qhid mung:- ana" wa- naonhaung yao" qam: so' khyo" yang zaui" pin" nug ko" i?

⁴Naonhaung" thaung" qhug' kham zo" lo: ra" khyo jham alhab' wa- akeim ngad va" i? Gai gai: yao: daja: ja: wa lajheim: thug' nae" za: ngad: ra".

⁵Mao"So wa naonhaung" re Byo byid: mung:- mug' pho: ve, lho mau" zo" naonhaung" phaung mae zaui" qhu" ru wa- kham" to" ra" Tarha" re naonhaung" phug' cao" geyang: ngad: ra" i? Mangad: lao"- Ngaui Bau" Lau Dao: re naonhaung" the' gyo" yu mung: lam" geyang: ngad: ra" i?

⁶Abraham thaung" qhug' kham zo" lo: ra" khyo re myid: qu" ge,- Jham: Mugsug' mae- Abraham wa Mao"So re lam khug: ra"- yao" lam khug: myid mathao mae Mao"So wa yao: re din:man" ra" yaug khyo" khae: yu: ra"- ga: ta" ra".

⁷Airumung: lam khug: myid bo: ra" mo, wa- Abraham nho: myid:zo: gyang" qe ngad: rure naonhaung" ba beim: qo: ako".

⁸Mao"So wa Taung bug byu qere lam khug: ru khyo" yang din:man" ra"- ga: sun" yu byid' li" nae" rure Jham: Mugsug' wa geim phan" phan" to" ava". Airumung: Jham: Mugsug' mae- Mao"So wa nao khyo" yang xao su byu alhab' mo, re shaman" byid' li" nae"- ga: Abraham re Lau Dao: Gai ta" hau: byid: ra".

⁹Abraham wa Mao"So re lam khug mung: shaman" byid' ru qhug' ra". Amung: lam khug: ra"mo, alhab' wa- Abraham we' dakhyo: shaman" byid' ru qhug' ako"- ga: ta" to" ra".

¹⁰Kham" to" ra" Tarha" phug' cao" rure lam yang: kao so' daui: ra" mo, wa- nhang: kheim: zao" na: ako". Pe"mung:ga"re Jham: Mugsug' mae- Kham" to" ra" Tarha" mugsug' mae tung" to" ra" Tarha" lam: khao: ngo" re maphug' cao" ra" yaug khag' ngadqere: Mao"So: nhang: kheim: zao" ra" yaug ngad: ra"- ga: ta" to" ra".

¹¹Jham: Mugsug' mae byu wa- lam khug: ru khyo" yang din:man" ra"- ga: Mao"So: yang sun" yu byid' ru qhug' ra" yaug za:- kao so' daui: na: li" nae"- ga: Jham: Mugsug' ta" to" ruyang- byu wa kham" to" ra" Tarha" re phug' cao" ra" khyo" yang din:man" ra"- ga: khag' dayaug rere: Mao"So: yang sun" yu byid' ru maqhug' ra" khyo wa de: de: za: ngad: ra".

¹²Ngadqere: Jham: Mugsug' mae- kham" to" ra" Tarha" phug' cao" ra" yaug wa kao so' daui: na: li" nae"- ga: ta" to" ruyang kham" to" ra" Tarha wa ai: lam khug: ru we' pe" majho" sin: ngad: ra".

¹³Sag' zang mae jin" se' lhao" to: qhug' ra" yaug wa- Mao"So: nhang: kheim: zao" ra" yaug ngad: ra"- ga: jham: Mugsug' mae tung" to" ru we' dakhyo:- Khristu wa ngonhaung" qhid' mae" nhang: kheim: zao" yaug boe" mung:- Kham" to" ra" Tarha" yang boe" nhao: ra" nhang: kheim: zao" nae" rumae" ngonhaung" re khyad' yu byid' ava".

¹⁴Khristu ceru: kad' ru wa Taung bug byu qe wa- Yesu Khristu khyo" yang Abraham re Mao"So: dao:so: byid' to" ra" shaman" jeju re qo" kham: yu genae" qhid' mae" ngad: ra". Ailao"- ngonhaung" wa lam khug: ra" khyo" yang Mao"So: dao:so: byid' to" ra" Byo re qo" kham: yu nae" ngad: ra".

¹⁵Nga" mao:nhaung: qe we"- xao su byu shad' khyo" ngo ta" nae"- byu shid' yaug wa khyo daja: ja: mae myid vang" mugsug' tung" to: lao" wa- khag' re: aire maqo" phyo' pye'. Mangad: lao" pe" re: magai: laung: ngad: ra".

¹⁶Ana" Mao"So wa yao" dao:so: jham re Abraham we' yao" myid:zo: qhid' mae" byid' to" ra" Jham: dao: mae myo: sho' re ta" nug: ra khyo" myid:zo: qe- ga: mata" ngad: ra". Dayaug re za: ta" nug: ra" khyo" myid:zo:- ga: ta" ra". Ai: yaug wa Khristu ngad: ra".

¹⁷Ngo ta" nug: ru wa- Mao"So wa Abraham we' dao: thang" to: mung:- ai: dao: thang" re phug' cao" nae" dao:so: byid' to" ra" zin na byid yo: sam xe zin kyo thao re qo" yu: ra" kham" to" ra" Tarha" wa dao: thang" re maqo" phyo' pye' ngad: ra". Mao"So: dao:so: rere: maqo" zai" phyo' pye' ngad: ra".

¹⁸Pe"mung:ga"re Mao"So: jeju jhaung qhu" wa ai: kham" to" ra" Tarha" mae ngha yang: ngad: re wa- ai: jeju jhaung qhu" wa- yao" dao:so: mae ngha lo nae" mangad: ngad: ra". Ngadqere: Mao"So wa- yao" dao:so: mathao mae Abraham re ai: jeju jhaung qhu" byid' ra".

¹⁹Aire- ai: kham" to" ra" Tarha" au: qang: ru wa pe" ngad: i? Ai: kham" to" ra" Tarha" wa- shad' lhoe" rure qhu" byid: nae" qhid' mae" byid' to" ru ngad: ra". Aimung:- Kham" to" ra" Tarha" wa- dao:so: re kham: yu: ra" yaug ngad: ra" Abraham nho: myid:zo: joe" li" ra" ayo, joe" sho' za: jo; jo; ra". Ai: kham" to" ra" Tarha" re mug: lagyo: qeyang agyo: mae ta" qham byid' ra" byu dayaug: lo, khyo" yang byid' to" ava".

²⁰Ngadqere: dayaug: yang dashad' mae za: zaui: so" ra" mau" mae ta" qham byid' ra" yaug maca" lo:ngad: ra"- Mao"So wa date: za: ngad: ra".

²¹Airu: ngad lao"- kham" to" ra" Tarha" wa Mao"So: dao:so: jham we' tug' shai" ra" i? Dajhid' re: mangad:- pe"mung:ga"re xao su byu qe wa- kao so' byid' ra" kham" to" ra" Tarha" re qo" khae: yu ko" ngad: re wa- yaug khao: ngo" wa ai: kham" to" ra" Tarha" re phug' cao" ra" khyo" yang din:man" ra"- ga: Mao"So: yang sun" yu byid' rure qhug' genae" ngad: ra".

²²Ngadqere: Jham: Mugsug' mae- mug: myid geim" wa qobo: nho: qam: so' yang eib: ra" qao: mae ngad: jo; ra" ga:- ta" to" ra". Airumung: Yesu Khristu re lam khug: rumae apan aqao: to" ra" dao:so: jeju jhaung qhu" wa- lam khug: ra" mo, re byid' to" ra".

²³Ai: lam khug: ra" khyo mathug' li" shi" ra" qhid' re- ce: lam khug: ra" khyo joe" li" ra" ayo, joe" sho' kham" to" ra" Tarha" wa ngonhaung" alhab' mo, re kyam: byu qekhyo" taui" lhaung" to" ra".

²⁴Ngonhaung" wa lam khug: ru khyo" yang din:man" ra"- ga: Mao"So: yang sun" yu byid' ru qhug' nae" qhid' mae" kham" to" ra" Tarha" wa- Khristu joe" li" sho' ngonhaung" re mho" jhui" lo: ava".

²⁵Ana" wa- lam khug: ra" khyo joe" li" va" rumung:- Kham" to" ra" Tarha" wa ngonhaung" re mho" shid' mho" jhui: byid: maqo lo:ngad: ra".

²⁶Naonhaung" alhab' wa- lam khug: ru khyo" yang Yesu Khristu we' dadang: dalam: za: doe, mung:- Mao"So: yao: zo: qe doe; ako".

²⁷Naonhaung" wa Khristu we' dadang: dalam: za: doe, nae" qhid' mae" qid nyhab' re kham: yu vako" ruyang ana" naonhaung" wa- Khristu nho: kao so' daui khyo re bau: we' dakhyo: ve; ci: avako".

²⁸Airumung: Yuda byu qe we' Taung bug byu qe: agyo: mae re:- jeim qe we' jeim mangad: ra" mo; agyo: mae re:- yauggai we' myiqe: qe: agyo: mae re:- pe" jho" kho' ru majo, lo:ngad: ra". Naonhaung" alhab' mo; wa- Khristu khug mae yao: we' dadang: dalam: za: ngad: avako".

²⁹Naonhaung" wa Khristu yang sang: ra" mo, ngad ko" re wa- naonhaung" wa Abraham nho: myid:zo: qe ngad geyang:- Mao"So byid' to" ra" dao:so: re qo" khae: yu: ra" mo, ngad: ako".