Read Maru GALATI 5 Bible Online

GALATI 5 - Maru bible

GALATI 5

¹Khristu wa ngonhaung" re loe; beim nhao va" ruyang- ngonhaung" wa loe; beim khyo qo" bam va". Airumung: loe, beim: ra" byu qekhyo" ye; jo, mung:- naonhaung" yao" gaung re jeim dadam: boe" nhao ge,-

²Tae" gyo: ge,- naonhaung" yao" gaung mae au: qid lhai: khyo dam: kham: yu: ngad: re wa- Khristu wa naonhaung" qhid' mae" dajhid' re: pe" akyu" mabo ga" ra" khyo" ngad: ra"- ein: ngo Polu naonhaung" re ta" va".

³Yao: yao" gaung mae au: qid lhai: khyo re kham: yu: ra" yaug wa- kham" to" ra" Tarha" alhab' re phug' cao" nae" qo bo: ra" yaug ngad: rure ngo dalhang dam: paug' yang: ta" peim: byid' ra".

⁴Kham" to" ra" Tarha" re phug' cao" ra" khyo" yang din:man" ra"- ga: Mao"So: yang sun" yu byid' rure qhug' nug: ra" mo, naonhaung" wa- Khristu we' gao" byaug: avako". Naonhaung" wa Mao"So: nhag' myan" ra" jeju taung gaung shad' khyo na: ra" mo, ngad: ako".

⁵Ngonhaung" kam" wa- ngonhaung" Mao"So: Byo: nho: lam khug: rumae mau" zaui" na: ra" qam: so' khyo" yang din:man" ra"- ga: Mao"So: yang sun" yu byid' ru qhug' li" nae" rure ngonhaung" myid: lao" ru ngad: ra".

⁶Pe"mung:ga"re ngonhaung" wa Khristu we' dadang: dalam: za: doe, lao" wa- au: qid lhai: khyo kham: yu: ru- makham: yu: ru wa- pe" akhyag mangad: ngad: ra"- Akhyag wa- jhid'de; myid khyo" lo, mau" zaui" qhu" ra" lam khug: myid ngad: ra".

⁷Naonhaung" wa gyai aung doe; ra" khyo" kao so' daui: lo: avako". Ai: dangman" ra" khyo re phug' cao" rumae" naonhaung" re khag' yang tam" pye' ra" i? Yao: wa naonhaung" re khoru: ju" phyo' ngaug: yu: ra" i?

⁸Ai: ju" phyo' ru wa naonhaung" re khai: yu: ra" Mao"So khyo" yang boe" nhao: ru mangad: ngad: ra".

⁹Cin man" dabam geim" re bai" li" nhao nae" qhid' mae" man" dajhid' za: aqo: ra"- ga: ta" ko" ra" dao: khyo: we' dakhyo: ngad: ra".

¹⁰Ngadqere: ngo wa ana" ba joe" sho' naonhaung" re myid: lam: na shi". Ngonhaung" wa Asang we' dadang: dalam: za: doe; na: ruyang naonhaung" wa shai" ra" khyo gatau re khae: yu genae" mangad:- ein: ngo myid: lam: ra". Ngadqere: naonhaung" re khin jang kad' ra" yaug khag' ngadqere: yao: wa Mao"So: yang byid' ra" qobo dae re qhug' kham zo" li" nae".

¹¹Ngadqere: nga" mao:nhaung: qe we"- ngo wa au: qid lhai: khyo re kham: yu qo: ra"- ein: xo' yang: kho" kyo" na: ngad: re wa- pe"mung: ngo yhin" ru qhug' na shi" ra" i? Airu: kho" kyo" ru dang: ngad: re wa- Khristu nho: pyao: zang khyo re ngo kho" kyo" ru wa- qug: khai: pe" boe" nhao nae" mangad:-

¹²Naonhaung" re khin jang kad' ra" mo, wa- au: qid lhai: khyo re za: makham: yu lo:- yao: bam yao" gaung re zhe' pye' ko" re wa khoqhi" je: gai genae" i?

¹³Nga" mao:nhaung: qe we"- naonhaung" loe; beim: ru qo" yu genae" qhid' mae" naonhaung" re khai: yu: to" ru ngad: ra". Ngadqere: ce: loe; beim khyo re naonhaung" gaung sho: myid o: rure cao" yang: daci ge,- ai: atha" jhid'de; myid we' naonhaung" yao: cao: jho" caung da" byid: ge,-

¹⁴Pe"mung:ga"re naoyao" gaung re jhid'de; ru we' dakhyo:- ni" yham kyo: cao: re jhid'de; wa,- ga" ra" amyin" dao: dalam: re phug' cao" ru wa- kham" to" ra" Tarha" dao: alhab' re phug' cao" ru we' daqi" za: ngad: ra".

¹⁵Ngadqere: naonhaung" wa seyo: gug'nyhug' jham we' dakhyo:- yao: cao: jho" bin: mung: dae jho" te' na ko" ngad: re wa- lha" ge,- mangad: lao" wa- naonhaung" yao: cao: dayaug we' dayaug jho" phyo' yang: alhab' shid: dam: genae".

¹⁶Ngo ta" ru wa ceru: ngad: ra"- naonhaung" wa Byo: yang khyo shid' ra" khyo" kao so' daui ge,. Ailao"- gaung sho: myid: o: ra" khyo re naonhaung" nhag' dag genae" mangad:.

¹⁷Pe"mung: ga re gaung sho: shad' khyo" o: ru wa- Mao"So: Byo o: rure gye kad' ra". Gaung sho: shad' khyo" o: ru we' Mao"So: Byo o: ru wa- yao: cao: gyevo ngad: ako". Airumung: naonhaung" kad' nug: ra" ja: re naonhaung" maqo" kad' ko" ngad: ra".

¹⁸Byo: yang naonhaung" re khyoqhid' au: she byid' ngad: re wa- naonhaung" wa kham" to" ra" Tarha" qao: mae mana loko" ngad: ra".

¹⁹Gaung sho" nho: mau" zo" wa- de: de: za: ngad: ra"- aijham wa- gaung sho: gintho' mau" zo"- maca' majhad' ru- maqu" dau: ra" ave,-

²⁰So alho re caung:pa" ru- mandan: vha" ru- manug thug: ru- myan" myo: jho" byo; ru- myid nug' ru- nhag' jam: yo" ru- yao: yao" qhid' mae" so' kho' ru- myid majho" vang" ru- phung: jho" kho' ru-

²¹myo, no, obyid: ru- yhid yid: ru- zo: pyo: shaug' pyo" ru we' aijham we' dau: ra" lo, mau" jham ngad: ra". Qhid' phyao: ta" peim: va" ru we' dakhyo:- ana" re: ngo naonhaung" re dam: ta" peim: byid: geli". Airu: kad' mo, wa- Mao"So: mung"dan: re maqo" sang: yu: li" genae".

²²Ngadqere:- Mao"So: Byo: yang zaui: nhao: ra" ashi: wa- jhid'de; ru- ngaui bau" ru- ngaui pyo: yaug yo: ru- nhag' lam: qhang: ru- nhag' khyag' ru- gai shab; ru- vin tang: jhaug' zaug: ru.

²³Nhag' lam: nyham: ru we' yao: yao" gaung re qo" khang" ru jham ngad: ra". Ai: gu: re ngag: tam" pye' nae" pe" Tarha" re: majo, ngad: ra".

²⁴Yesu Khristu re Asang khyo" lhang: yu: ra" mo, wa- yao: bam: gaung sho: myid we' gaung sho: shad' khyo" kao bau myid o: ru jham alhab' re pyao: zang dao mae bojin" se' pye' avako".

²⁵Ai: Mao"So: Byo wa naonhaung" re kao so' byid' to" ava"- amung: yao: wa ngonhaung" nho: kao so' daui khyo rere: khang" byid: qo: ra".

²⁶Ngonhaung" wa ngad beim" ra" myid magai: bo- yao: cao: pyi magai: qho- yao: cao: magai: jho" myid nug: ngad: ra".