Read Maru GALATI 6 Bible Online

GALATI 6 - Maru bible

GALATI 6

¹Nga" mao:nhaung: qe we"- dayaug yaug wa qobo daja: ja: shad' na: rure naonhaung" the' myao geyang: ngad: re- Byo qam: so' bo: ra" mo, naonhaung" wa- nau" nhae" za: yao: re jo: ra" shad' khyo jhao" byid: ge, Naonhaung" yao: re: ju" phyo' ra" khyo magyo" vao lo" genae" qhid' mae" lha" na ge,-

²dayaug: qo re dayaug yao: cao: jho" bao" vin vo; byid: mung:ceru: naonhaung" wa- Khristu nho: tarha" re phug' cao" na ge,-

³byu dayaug yaug wa gaigai: yao: ga" re yao: pe" akhyag yaug mangad' rure- akhyag yaug ngad: ra" khyo" myid: jho: re- yao: wa yao: yao" gaung re mhug' pyag' ra" yaug ngad: ra".

⁴Yaug khao: ngo" wa yao: yao" lo, mau" re kin: kho' qu" qo: ra". Ai: lo, mau" gai yang: ngad: re wa- gatau dayaug: nho: lo, mau" we' dau tau" qu" maqo lo:- yao: yao" lo, mau" mae qo" phug: li" nae".

⁵Pe"mung:ga"re yaug khao: ngo" wa yao: yao" qo re vin vo; qo: ra".

⁶Khristan: mungdao: re mho" zhao: yu: ra" yaug wa- yao" mho" pho" re gai: ra" ja: alhab' yang bao" thaug' byid: qo: ra".

⁷Naonhaung" damyid: nghung: ge,- Mao"So re khag' re: maqo" mhug' ngad: ra". Byu wa yao: sin" ke' ra" ja: re yao:- ashi: jham" yu: li" nae".

⁸Gaung sho: myid o: rumae sin" ra" yaug wa- yao: ai: gaung sho: mae" shid: rure qo" jham" yu: li" nae". Byo myid o: rumae sin" ra" yaug kam" wa- ai: Byo mae" apyad ato: kao so' re qo" jham" yu: li" nae".

⁹Ngonhaung" wa gai: ra" mau" zo" zaui: so: nae" qhid' mae" mamyaung: madug gejhao"- pe"mung:ga"re airu: ngonhaung" qam: mashan- nhag' lam: magyug: yang: ngad: re wa- ayo, joe" li" lao"- ngonhaung" wa ashi: qo" jham" yu nae" ngad: ra".

¹⁰Airumung:- ngonhaung" wa agu qo" khao: ngo"- byu yaug khao: ngo" re gai: ra" mau" zo" zaui: byid: qo: ra". Je yang: wa- lam khug: ra" ngonhaung" yham khug: byu qere zaui: so: byid: gelang:

¹¹Ngoyao" lo; yang yao: khoqhi" qi" ra" tung" ce' jham we' ngo naonhaung" jhao" tung" ke' rure qu" qu" ge,-

¹²Naonhaung" re au: qid lhai: khyo re kham: yu genae" qhid' mae" qam: ke' yang: maqad maqui" deim" zag: jhan" na ko" ra" mo, wa- adao: pyae myao: ra" ja: re langa: kad' phug: qhu" nug mo, ngad: ako". Ngadqere: yao: bam wa- Khristu nho: pyao: zang khyo: mathao mae yhin" ru maqhug' genae" qhid' mae" airu: kad' ru ngad: ako".

¹³Ai: au: qid lhai: khyo re kham: yu ko" ra" mo, lhao" re:- Kham" to" ra" Tarha" re maphug' cao" ngad: ako". Naonhaung" au: qid lhai: khyo re kham: yu: rumae yao: bam qo" phug nae" qhid' mae" yao: bam wa- naonhaung" re au: qid lhai: khyo kham: yu nhao nug: ako".

¹⁴Ngadqere: ngo kam" wa- ngonhaung" Asang Yesu Khristu nho: pyao: zang khyo we' sin: yang: za: ngo phug nae" ngad: ra". Pe"mung:ga"re yao" pyao: zang khyo" yang mug: myid wa nga" qhid' mae" shid: jo, mung: ngore: mug: myid: qhid' mae" shid va".

¹⁵Byu dayaug wa au: qid lhai: khyo kham: yu: ru makham: yu: ru pe" akhyag mangad:- byusag' boe" ru za: akhyag ngad: ra".

¹⁶Yao: bam: kao so' daui: rumae ce:khyo re phug' cao" ra" mo; dao mae re:- Mao"So: byu qe alhab' mo; dao mae re:- ngaui pyo: yaug yo: ru we' nhag' khyag' shogu: ru wa- yao: bam alhab' we' daga" ngad: jo, vashao: wo"-

¹⁷Dao: pin" khyo" ta" nug: ru wa ana" mae"- khag' yang re: ngore qug: khai: mabyid: lo: vashao:- pe"mung:ga"re nga" gaung mae de; ra" dae jho: jham wa- ngo Yesu nho: jeim pho" ngad: rure sagse: qhu" byid' na: ra".

¹⁸Nga" mao:nhaung: qe we"- ngonhaung" Asang Yesu Khristu nho: nhag' myan" ra" jeju wa- naonhaung" alhab' mo, we' daga" ngad: jo, vashao: wo"- Amen.