Read Maru EPHESU 1 Bible Online

EPHESU 1 - Maru bible

EPHESU 1

¹Mao"So: myid o: ru we' dakhyo:- Khristu Yesu nho: lagyo: ngad: ra" ngo Polu wa- Ephesu vogaung: mae" Mao"So: byu qe ngad ko" ra"- Khristu khug mae jhaug' zaug za: kao so' daui: na: ra" mo, re mugsug' tung" ke' ra".

²Ngonhaung" Pho" Mao"So we' Asang Yesu Khristu wa naonhaung" re nhag' myan" ra" jeju we' ngaui pyo: yaug yo: ru byid: vageshao:-

³Ngonhaung" Asang Yesu Khristu yao: Pho"- Mao"So re ngonhaung" jeju caung:khin" byid: gelang:- pe"mung:ga"re- Mao"So wa mug: khaung mung"dan: mae Byo we' sin" ra" shaman" jeju ja: khao: ngo" re Khristu we' dadang: dalam: za: ngad: ra" khyo" yang ngonhaung" re shaman" byid' to" ava".

⁴Ngonhaung" wa Khristu we' dadang: dalam: za: ngad: ra" khyo" yang yao" qhid' kheim: mae qo mabo mo, we' gyang" lho" ra" mo, boe" nae" qhid' mae" mug:myid maphan" shimae" lhao" re:- Mao"So wa ngonhaung" re khyin: yu: to" ava".

⁵Mao"So wa yao" jhid'de; myid mathao mae Yesu Khristu khyo" yang ngonhaung" re yao: zo: toe' nae" qhid' mae"- myid: phyid' khyin: yu: to: gau ngad; ava". Ceru wa yao: o ngaui: ru we' yao" myid: qang: to" ru ngad: ra".

⁶Yao" jhid'de; ra" yao: zo: khyo" yang ngonhaung" re aphug' mamho' lo: byid' ra". Mao"So: phungbao byang" jo; ra" nhag' myan" ra" jeju qhid' mae" ngonhaung" wa- Mao"So: jeju re caung:khin" byid: gelang:-

⁷Pe"mung:ga"re Khristu shid kham: byid' ra" khyo" yang ngonhaung" wa loe; beim: ru qhug' bam va"- Airu wa qobo khyad' pye' byid: qhug' ru ngad: ra".

⁸Ngonhaung" re ai nho" myo: laug sho' byid' ra" Mao"So: nhag' myan" ra" jeju wa- khoqhi" sho' qi" qhang: jo; ra" i? Mao"So wa yao" laba lajhao nyan: pha,jhi" alhab' we' yao: myid: qang: to" ra" mau" zo" re zaui: so" ra".

⁹Yao: wa Khristu khyo" yang zaui" pin" nae" yao: myid: phyid' to: gau ngad: ra" no; thao" ra" myid: yaung: to" ra" khyo- ngonhaung" re ba nhao: ava".

¹⁰Ayo, joe" lao" zaui" pin" nae" Mao"So myid: yaung: to" ra" khyo ceru wa Khristu re au: jhaung to: mung:- Mug:gaung we' myidgaung dao mae jo; ra" phan" to" ra" gu: alhab' re daga" za: qhan" zhang: to: nae" ru ngad: ra".

¹¹Ja: khao: ngo" wa Mao"So myid: yaung: ru we' myid' phyid' to" ru we' dakhyo:- boe" jo; ra". Mao"So wa yao: myid: qang: ru we' dakhyo:- sao qhid' mae" yao: myid: phyid' to: va" rure cao" yang:- ngonhaung" re Khristu we' dadang: dalam: za: boe" nhao mung:- Yao" byu qekhyo" Mao"So wa ngonhaung" re khyin: yu: to" ava".

¹²Airumung: Khristu re sao qhid' myid: lao" lo mo, ngad: ra" ngonhaung" wa Mao"So: phung bao re caung:khin" byid: gelang:.

¹³Naonhaung" re khyad' yu: ru qhug' nhao: ra" ai: Lau Dao: Gai ga" ra"- dangman" ra" mungdao: re the' gyo" yu gelao"- naonhaung" re: Mao"So: byu qe boe" lo: ako". Naonhaung" Khristu re lam khug mung:- Mao"So wa yao: dao:so: byid' to" ra" Gyang" Lho" Byo naonhaung" re byid' ra" khyo"- Asang ngad: ra" aso: ga" ra" dazid thaung" te' to" ava".

¹⁴Airu: Byo wa Mao"So yao" byu qere byid: nae" ga: dao:so: byid' to" ra" jeju jhaung qhu" re ngonhaung" qo" khae: yu nae" ngad: rure pakham: byid' ru ngad: ra". Ce: khyo Mao"So wa yao" byu qere- jab sho'- loe; beim nhao nae"- ga" rure ngonhaung" myid mae nyhad' tang byid' ra" yao" phungbao re ngonhaung" caung:khin" gelang:-

¹⁵Airumung:- naonhaung" wa Asang Yesu re lam khug: na ko" ra" khyo re we' Mao"So: byu alhab' mo, re jhid'de; na ko" ra" khyo re ngo the' gyo" ra" ba na mae"-

¹⁶naonhaung" mathao mae ngo wa Mao"So re mathang mano: jeju caung:khin" ra". Ngo wa naonhaung" re akyu" beim" mho' byid' na mung:-

¹⁷Naonhaung" wa Mao"So re ba: li" genae" qhid' mae"- pha,jhi" ba nhao: ru we' Mao"So re qhu" byid: nae" yaug ngad: ra" Gyang" Lho" Byo naonhaung" re byid: vashao:- ngonhaung" Asang Yesu Khristu nho: Mao"So- phungbao qi" qhang: jo; ra" Pho" re ngo mho' ra".

¹⁸Yao: naonhaung" re khoru" ra" myid: lao" khyo khyo khai: yu: ra" khyo yao" byu qere yao: dao:so: byid' to" ra" mug' pho: shaman" jeju jham wa- khoqhi" sho' qi" qhang: jo; ra" khyo-

¹⁹Lam khug: ra" mo, naonhaung" khug mae khoqhi" sho' qi" qhang: ra" yao" qam: so' yang yao" mau" re zaui" na: rure:- naonhaung" ba genae" qhid' mae" yao" bo" bao re myao nae" naonhaung" aung khug nhag' lam: myid re phung" byid: vashao:- ngo akyu" mho' ra". Ngonhaung" khug mae mau" zaui" na: ra" ce: qam: so' wa-

²⁰Khristu re shid: rumae" daui: li" nhao mung:- Mug: khaung: mung"dan: dao mae yao" lo, yo shad' mae zaung: jo, nhao: ra" Mao"So: qi" qhang: thao" ra" qam: so' yao: ngad: ra".

²¹Ai: mug: khaung: mung"dan: dao mae Khristu wa- mug:gaung re eib: ra" mo,- kheim: so' qo" ra" mo,- phung qam: so' bo: ra" mo, we' asang qe alhab' mo; dao mae au: jhaung khyo" eib: ra". Khristu wa ce: mug: myid pyad qae: mae we' joe" lo nae" pyad qae: mae kheim: so' qo" ra" mo; mang alhab' tho' mae je: myhao: thao" ra" mang qo" yaug ngad: ra".

²²Mao"So wa ja: cao jab alhab' re Khristu nho: khyid vo: qao: mae ke' to: byid: mung: phung" nho: qhid' mae" ja: cao jab alhab' dao mae myhao: thao" ra" Asang au: jhaung khyo" yao: re byid' to" ra".

²³Ai: Phung: wa Khristu nho: gaung khyao ngad mung:- Ja: cao jab alhab' re jab byang" nhao: ra" Khristu wa ai: gaung khyao mae jab byang" jo; ra".