Read Maru EPHESU 2 Bible Online

EPHESU 2 - Maru bible

EPHESU 2

¹Qhid' phyao: naonhaung" wa Mao"So: mho dao: magyo" ru we' qobo shad' lhoe" geyang:- Byo we' sin: yang: ashid ngad: ako".

²Ai: ayo, mae naonhaung" wa myidgaung dao mae" makhyang" ra" qobo mau" zo" thao naonhaung" cao" lo: ako". Naonhaung" wa mug: le; phyo: mae" qam: so' bo: ra" ai: byo jham re eib: ra" yaug: nho: mho dao: re tae" gyo" lo: avako". Ai: byo wa ana" Mao"So: mho dao: re magyo" ra" byu qere eib zo" na: ra".

³Gaigai: yao: ganhae" wa ngonhaung" re: yao: bam we' dakhyo: ngad: lo: ra". Gaung sho: shad' khyo" ngonhaung" nho: myid kao bau: ru re cao" yang:- ngonhaung" gaung dau: we' myid nhag' lam: o ngaui kao bau: ru we' dakhyo:- kao so' daui: lo: ra"- Airumung: ngonhaung" re: azhao: mae" khyo" sun" re su gaje qe we' dakhyo:- Mao"So:nhag' yo" rure kham: yu man" ra" mo, ngad: ra".

⁴Ngadqere: Mao"So: nhag' myan" ra" jeju wa- magan: mago" ngad: ru we' ngonhaung" re jhid'de; ra" yao" jhid'de; myid gyai qi" qhang: jo, yang:-

⁵ngonhaung" mho dao: magyo: mung: byo mae ngonhaung" shid: jo; ra" au:- Mao"So wa ngonhaung" re Khristu we' daga" kao so' daui: li" nhao: ra". Naonhaung" wa Mao"So: nhag' myan" ra" jeju khyo" yang khyad' yu: ru qhug' ako".

⁶Ngonhaung" wa Khristu we' dadang: dalam: za: doe; ruyang Mao"So wa ngonhaung" re mug:khaung: mung"dan: mae yao: we' daga" eib nae" qhid' mae" Khristu we' daga" daui: to" li" nhao ava". Khristu we' daga" daui: to" li" nhao mung:- Yao: we' daga" mug: khaung: mung"dan: mae eib: na nhao: ra".

⁷Yao: ceru re kad' ru wa Khristu Yesu khyo" yang ngonhaung" re jhid'de; myid qhu" byid' rumae yao" nhag' myan" ra" jeju matho' mho losho' qi" qhang: jo; rure thao: qae" mae" mo, alhab' re qhu" byid: nae" qhid' mae" ngad: ra".

⁸Pe"mung:ga"re naonhaung" wa lam khug: ra" khyo" yang Mao"So: nhag' myan" ra" jeju khyo" khyad' yu: ru qhug' avako". Aiwa naonhaung" yao" lo, mau" yang mangad:- Mao"So: jeju jhaung qhu" ngad: ra".

⁹Naonhaung" yao: qam: ke' yang: qo" yu: ru mangad" rumung:- khag' re: magai: phug ngad: ra".

¹⁰Ngonhaung" wa yao" lo,mau" yang boe" na mo, ngad: ra"- Amung: ngonhaung" wa Khristu we' dadang: dalam: za: doe, yang: Mao"So: yang nyhang" jaung: to: gau ngad: ra"- gai shab: ra" mau" zo" re zaui: so: geshao: ga:- Mao"So wa ngonhaung" re phan" to" ra".

¹¹Qhid' phyao:- Gaung sho: shad' khyo" ga" re naonhaung" wa taung bug qe ngad ko" rure myid: beim: ge,- <Thung" li re cao" yang: au: qid lhai: khyo re kham: yu: ra" mo, wa naonhaung" re au: qid lhai: khyo makham: yu: ra" mo,- ga: mhang" ako".

¹²Ai: ayo, mae naonhaung" wa Khristu we' gao" lin: jo; ako". Naonhaung" wa Taung bug byu qe ngad mung:- Mao"So: yang khyin: yu: to" ra" byumyu" mae mabobo ko" ngad: ra". Yao" byumyu" qere Mao"So byid' to" ra" dao:so: mae zao: to" ra" dao: thang" mae naonhaung" mabobo ngad: ako"- Naonhaung" wa- ce: mug: myid dao mae myid: lao" nae" ru maqo"- Mao"So maqo" lo: na: lo: ako".

¹³Ngadqere: ana" kam" wa Khristu we' dadang: dalam: za: doe; na va" ruyang qhid' phyao: Mao"So we' gao" lin: na: lo: ra" mo, naonhaung" wa Khristu shid kham: byid' ra" khyo" yang Mao"So we' te' lo: avako".

¹⁴Pe"mung:ga"re Khristu wa Yuda byu qere we' Taung bug byu qere byumyu" damyu" za: boe" nhao mung:- ngonhaung" re ngaui pyo: yaug yo mang:dae byid' ra". Yao: wa yao" gaung re shid kham: byid: yang:- gyevo qekhyo" byumyu" jho" kho' to: byid' ra" akyo re phyo' khyo" pye' byid' ra".

¹⁵Khristu wa ai: byumyu" shid' ja: re yao: we' dadang: dalam: za: doe, nhao yang: byumyu" asag' daja: re phan" phaug' ke' nae" qhid' mae" Yuda qe: thung" li tarha" jham we' daga"- ai:nho: amyin" dao: jham we' tarha" jham re yu: pye' ava". Ceru: khyo" yang yao: wa shid' shad' geim" re ngaui pyo: yaug yo mang: dae byid' ra".

¹⁶Khristu wa pyao: zang dao mae shid: kham: byid' ra" khyo" yang yao: bam yao: cao: majho" nug: rure yu: pye' byid: yang:- ai: byumyu" shid' ja: re dadang: dalam: doe, nhao mung:- Mao"So jhao" yao: bam re jhui" vao lo: ava".

¹⁷Airumung:- Qhid' phyao: Mao"So we' gao" lin: na: lo: ra" mo, ngad ko" ra" naonhaung" Taung bug byu qere re:- Mao"So we' te' na: lo mo, ngad ko" ra" Yuda byu qere re: Khristu wa joe" li" mung: mang: dae byid' ra" Lau Dao: Gai mungdao: naonhaung" alhab' re kho" kyo: byid' ava".

¹⁸Taung bug byu qe we' Yuda byu qe ngad ko" ra" ngonhaung" alhab' mo, wa- Gyang" Lho" Byo dayaug we' za: Pho" qhid' kheim: khyo qo" vao ye" lo" bam va".

¹⁹Airumung: ana"- naonhaung" Taung bug byu qe wa taung bug lamai: we' bang" vo qe mangad: loko" ngad: ra". Mao"So: mung"dan: byumyu" mae bobo mung: Mao"So: yham byu qe ngad: avako".

²⁰Naonhaung" re:- lagyo: qe we' lapa qeyang zao: qhid: to" ra" apan aqao: dao mae xo' zao: to: mo, ngad: ako". Khristu yao: wa- ai: yham jheim mae" akhyag: thao" ra" laug baui ngad: ra".

²¹Yao: wa yham geim" re gang: tang sho' daga" za: jho" zaui" ci nhao: ra" yaug we' ai: yham re Mao"So re qhaug' byid' to" ra" gyang" lho" ra" Mao"So: yham boe" sho' qi" qhang: li" nhao yaug ngad: ra".

²²Naonhaung" re: Khristu we' dadang: dalam: doe, mung:- su gaje qe alhab' we' daga"- zao: to" rure qhug' gemung:- Mao"So wa Byo khyo" na: ra" jo, qo boe" lo: ako".