Read Maru EPHESU 3 Bible Online

EPHESU 3 - Maru bible

EPHESU 3

¹Ceru: yang naonhaung" Taung bug byu qe: mathao mae Yesu Khristu nho: kyam: byu ngad: ra" ngo Polu wa Mao"So re akyu" mho' ra".

²Mao"So wa yao" nhag' myan" ra" jeju khyo" yang naonhaung" qhid' mae" ngore ce: mau" byid' to" ra" khyo re naonhaung" the' gyo: gau ngad: ako".

³Mao"So wa yao" no; thao" ra" myid: yaung: to" ra" khyo ngore de: de: za: qhu" shid' byid' ra". <Ce: khyo we' sin: yang: ngo wa lang" ra" khyo" mugsug' tung" ke' va".

⁴Ngo tung" ke' rure naonhaung" nghe' ko" ngad: re wa- naonhaung" wa Khristu nho: no; thao" ra" myid: yaung: to" ra" khyo re ngo ba: gyo" ra" yaug ngad: rure naonhaung" qo" ba: yu: li" genae".>

⁵Qhid' phyao: lai: lo: ra" ayo, gu: mae ce: no; thao" ra" myid: yaung: to" rure xao su byu qere maqhu" byid: ngad: ra". Ngadqere:- Ana"- Mao"So wa ai: khyo re- yao" gyang" lho" ra" lagyo: qe we' lapa qere Byo khyo" yang qhu" byid' ava".

⁶Ai: no; thao" ra" myid: yaung: to" ru wa Ngaui Bau" Lau Dao: khyo" yang Taung bug byu qe wa Mao"So: shaman" jeju jham re Yuda byu qe we' daga" qo" kham: yu: ako". Yao: bam wa gaung khyao dalam: mae" gaung dau jham za: ngad mung:- Yesu Khristu khyo" yang Mao"So byid' to" ra" dao:so: rere: qo" kham: yu vako" ra"- ga" ru ngad: ra".

⁷Mao"So: qam: so' mau" zaui" ra" khyo" ngore byid' ra" Mao"So gakai: lai mung: ra" jeju jhaung qhu" wa ngore Lau Dao: Gai: nho: daui daui yaug boe" lo nhao: ra".

⁸Ngo wa Mao"So: byu qe alhab' mo, tho' je yang: ngai: thao" ra" yaug ngad: ra". Ngadqere: Mao"So wa Khristu nho: magan: mago" qo" ra" khyo we' sin" ra" Lau Dao: Gai Taung bug byu qere yekho" kyo: nae" we'-

⁹Mao"So: no; thao" ra" myid: yaung: to" ru wa khoru: boe" thug' li" nae" rure mo, byu qere qhu" byid: nae" qhid' mae" ce: gakai: lai ngore byid' ra". Ja: cao jab alhab' re phan" yaug Mao"So wa- yao" no; thao" ra" myid: yaung: to" rure qhid' phyao: lai: lo: ra" qae" mae" nyham" to: byid' ra".

¹⁰Yao: airu: kad' ru wa mug:khaung dao mae eib: ra" mug: lagyo: qe we' kheim: so' qo" ra" mo, wa Mao"So: pha,jhi" laba lajhao akhyo aja: ja: re ai: phung" nho: daui lab: ra" khyo" yang ba: yu genae" qhid' mae" ngad: ra".

¹¹Mao"So wa yao" apyad ato: myid: qang: to" ru we' dakhyo:- ce:rure ngonhaung" Asang Yesu Khristu khyo" yang zaui" boe" ru ngad: ra".

¹²Ngonhaung" wa Khristu we' dadang: dalam: za: doe, mung:- Yao: re ngonhaung" lam khug: ra" khyo" yang Mao"So: qhid' kheim: khyo vae" vae" lam lam za: qo" vao ye" ra".

¹³Airumung: naonhaung" qhid' mae" ngo kham zo" ra" qug: khai: mathao mae naonhaung" nhag' lam: mabyo, genae" qhid' mae" ngo mho' ke' ra". Airu: kham zo" ru wa- naonhaung" alhab' mo; qhid' mae" ngad: ra".

¹⁴Ce: khyo mathao mae mug:gaung dao mae we' myid gaung dao mae" ug' khug' dinkhu: alhab' qo" khae: yu: ra" dangman" ra" mang byid' ra".

¹⁵Pho" Mao"So: qhid' kheim: mae ngo pad' thaug' thaug' mung: akyu" mho' ra".

¹⁶Ngo wa yao" phungbao mae" naonhaung" aung khug nhag' lam: qam: bo: li" nae" qhid' mae" yao" Byo khyo" yang naonhaung" re qam: so' byid: vashao:- Ngo Mao"So re akyu" mho' ra".

¹⁷Alao"-naonhaung" lam khug: ru khyo" yang Khristu wa naonhaung" aung khug nhag' lam: khug mae yao" na jo, qo toe' vashao:- ngo akyu" mho' ra".

¹⁸Naonhaung" wa Khristu nho:jhid'de; myid qhang phyao:- lae phyao:- myhao phyao:- no, phyao:- khoqhi" qi" qhang: jo; rure Mao"So: byu qe alhab' mo, we' daga" ba: gyo" ra" qam: so' qo" yu genae" qhid' mae" jhid'de; ra" myid mae naonhaung" apan aqao:- agyi: taui" na geshao:- ngo akyu" mho' ra".

¹⁹Ngad va"- Khristu nho: jhid'de; myid re jab byang" sho' magai: ba: gyo: ngadqere:- yao" jhid' de, myid re naonhaung" ba: li" mung:- Mao"So: jab byang" ra" ave, we' dakhyo: yao:- naonhaung" jab byang" li" geshao:- akyu" mho' ra".

²⁰Ngonhaung" khug mae mau" zaui" na: ra" yao" nho: qam: so' khyo" yang ngonhaung" mho' yao: ra" ja: we' myid: ra" ja: tho' re je yang: qo" zaui" boe" ra" Mao"So wa-

²¹Ai: Phung: mae we' Yesu Khristu mae apyad ato phungbao qi" qhang: jo, vashao: wo"- Amen.