Read Maru EPHESU 4 Bible Online

EPHESU 4 - Maru bible

EPHESU 4

¹Airumung: Asang re caung da" byid: yaug kyam: byu ngad: ra" ngo wa Mao"So: yang naonhaung" re khai: yu: ra" au:- Yao: mhai" to: byid' ra" azhao" re myhi: ra" kao so' daui khyo mae kao so' daui genae" qhid' mae" naonhaung" re jhan" ke' ra".

²Khonhae" re: nhag' lam: nyham: khyo" mung: nau" nhae" ru we' nhag' lam: qhang ge,- dayaug we' dayaug jho" zang: kham byid' ra" khyo" naonhaung" jhid'de; myid re jho" qhu" ge,-

³Ngaui pyo: yaug yo: ru khyo" yang naonhaung" re dadang: dalam: za: boe" nhao: ra" ai: Byo: yang byid' ra" myid jho" vang" rure nyang" za: zaui" zag: ci ge,.

⁴Naonhaung" re Mao"So khai: yu: rumae myid: lao" nae" ru daja: za: mae khai: yu: ru ngad: ru we' dakhyo:- naonhaung" gaung khyao dalam: we' Byo dayaug za: ngad: ra".

⁵Asang dayaug za:- lam khug: khyo dalam: za:- qid nyhab' dalam: za: ngad: ra".

⁶Xao su byu alhab' mo; yao: Pho" ngad: ra" Mao"So re: date: za: ngad: ra"- Yao: wa byu alhab' mo; dao mae Asang kad' na mung:- byu alhab' mo, re ci yang: mau" zaui" na: ru we' byu alhab' mo; khug mae na: jo; ra" yaug ngad: ra".

⁷Khristu byid' ra" gakai: lai: ra" jeju jhaung qhu" re dano" no" za: ngonhaung" yaug khao: ngo" qo" khae: yu: bam va".

⁸Jham: Mugsug' mae Yao: wa gyai myhao: ra" jo, qo khyo do, lo" ra" au:- Yao: we' daga" kyam: byu myo: sho' re jhui" do, lo" mung:- Yao: wa xao su byu qere jeju jhaung qhu" byid' ra"- ga: ta" to" ra".

⁹Ana" ce:- yao: do, lo" ra" ga" ru wa- pe" re ga" ru ngad: ra" i? Airu wa- yao: wa nyham: thao" ra" myid gaung pyae khyo sao qhid' joe" gyo" li" rure ta" ru ngad: ra".

¹⁰Airu: gyo" li" ra" yaug wa mug:gaung myid gaung alhab' mae yao" phungbao we' byang" nhao nae" qhid' mae" mug:gaung pyae myo: sho' khyo lai: do, lo" ra" yaug yao: ngad: ava".

¹¹Xao su byu qere jeju jhaung qhu" jham gae byid' ra" yaug re: yao: ngad: ra". Yao: wa damyo" re wa lagyo:- damyo" re lapa- damyo" re ngaui bau" lau dao: kho" kyo: mo,- damyo" re Phung: jhui: mo, we' mho" pho" qekhyo" san: to" ra".

¹²Yao: ceru: kad' ru wa Khristu nho: gaung khyao re zao: to' nae" qhid' mae" Mao"So: byu alhab' mo, re Khristan: mau" zo" jid: zo" qhid' mae" seim" nyhang" byid' ru ngad: ra".

¹³Aimung: ngonhaung" nho: lam khug: myid we' Mao"So: yao: zo: re ngonhaung" ba jhao: ra" khyo mae ngonhaung" alhab' mo, wa- dadang: dalam: za: doe, mung:- Khristu nho: qi" qhang jab byang" ra" azhao" re myhi: ra" qi" qhang: ra" zoqao" qe boe" nae" ngad: ra".

¹⁴Ailao"- ngonhaung" wa Pha,jhi" khyug' yang: su re khyonghung: nghung: nhao: ra" mhug' pyag' ra" mo; mho" shid' dao:- la hug' khoru: hug' re khoru: bang: lhung" khug mae bomyung: qin" ra" zoshao qe we' dau lo nae" mangad:-

¹⁵Ai: atha" ngonhaung" wa dangman" ra" dao: re jhid'de; myid we' jhau mo, boe" mung:- ja: khao: ngo" mae au: ngad: ra" Khristu shad' khyo qi" qhang: li" nae" ngad: ra".

¹⁶Khristu yao" yang eib khang" ra" qao: mae majho" dau: ra" gaung dau jham wa yao: yao: vin vo; ang: ra" mau" re vin vo; gelao"- gaung khyao geim" qi" qhang: li" mung:- jhid' de, myid: yang gang" tang: li" nhao: ra".

¹⁷Airumung: naonhaung" wa Mao"So re maba mo, we' dakhyo:- xo' yang: kao so' madaui genae" qhid' mae" ngo wa Asang: mang re lao: yang: naonhaung" re ta" peim: byid' ra". Yao: bam myid: ra" khyo jham wa akeim ngad mung:- yao: bam: myid nyan: re: cad' jo; ako".

¹⁸Yao: bam wa maba mabeim: nhag' cad' noyaug ngad mung: nhag' lam: qao ko" ruyang- Mao"So byid' ra" kao so' daui khyo mae mabo: bo ko" ngad: ra".

¹⁹Yao: bam wa qho' gyaug myid dajhid' re: mabo logeyang:- Yao: bam: gaung re gaung sho: shab' mhin: rumae au: am: mung:- masan masin" ra" mau" zo" aja: ja: re lo, lae vha zaui" ako".

²⁰Airu wa Khristu we' sin: yang: naonhaung" zhao: yu: ra" khyodang mangad: ngad: ra".

²¹Naonhaung" wa Khristu nho: khyo re gaigai: yao: the' gyo" qu" mung:- yao" mho"zo: qe khyo" Yesu nho: dangman" ra" khyo re naonhaung" mho" zhao: yu: avako".

²²Airumung:- qhid' phyao: naonhaung" kad' min" lo ko" ra" ave, xug' jham re yu: pye' ge,. Mhug' pyag' ba: ra" gaung sho: obyid kao bau: ruyang phyo' qheim" pye' ba: ra" kao so' daui khyo axug' re shapye' pye' ge,-

²³Naonhaung" aung khug nhag' lam: we' myid wa alhab' asag' kad' pye' qo: ra".

²⁴Mao"So: ve, lho we' dau: ra" khyo" phan" ru qhug' mung: kao so' daui: ra" khyo mae dang man" rure qhu" byid' ra" dangman" ru we' gyang" lho" ra" ve,khyao asag' re naonhaung" zhaung" ve; yu ca" ra".

²⁵Airumung:- damhug' loge,- Ngonhaung" alhab' mo, wa- Khristu nho: gaung khyao mae" gaung dau jham ngad: ruyang yaug khao: ngo" wa lam khug: ra" yao" mao:nhaung: pho" re dang: ra" dao: za: ta" na ca" ra".

²⁶Naonhaung" nhag' yo: gengadqere:- qobo dakad' ge,- ba gyam sho' nhag' dayo: ge,-

²⁷Satan re jo, qo daqhui" ge,.

²⁸Khug' zo" qu" ra" yaug wa khug' zo" ra" mau" zo" re thang: pye' mung:- myaung sho" ra" mo, re qo" bao" thaug' byid: nae" qhid' mae" we' yao: yao" gaung re kao so' khau nae" qhid' mae" din: din: man: man: za: yao" lo; yang mau" zaui: vashao:.

²⁹Su re nhag' no nhao: ra" dao: qeim dajhau ge,- su re akyu" byid' ra" dao:- qo ca" ru mae bao" thaug' tau: to' byid' ra" dao: jham re za: jhau ge,. Ailao" za:- naonhaung" dao: re gyo" yu: ra" mo; qhid' mae" akyu" bo: li" nae".

³⁰Amung:- Mao"So: Gyang" Lho" Byo re dakaug' nhao ge,- pe"mung:ga"re ai: Byo wa- naonhaung" re Mao"So sang: ra"- ga" ra" aso: dazid ngad mung:- lo" thao" ba na joe" li" lao"- Mao"So wa naonhaung" re loe; beim nhao nae"- ga" ra" pakham: aso: re: ngad: ra".

³¹Airumung:- nhag' no: jo; ru- nhag' yo" ru- nhag' lam: lang" ru- zag: shad' ru- su re roe" ru- su re nghang" ra" ja:- alhab' re shapye' pye' ge,.

³²Amung:- naonhaung" yao: cao: jho" jhid'- jho" nhag' khyag' na ge,- Mao"So wa Khristu khyo" yang naonhaung" qobo re khyad' byid: va" ru we' dakhyo:- naonhaung" yao: cao: re: dayaug we' dayaug: qobo re jho" khyad' byid: ge,.