Read Maru EPHESU 5 Bible Online

EPHESU 5 - Maru bible

EPHESU 5

¹Naonhaung" wa Mao"So: jhid'de; ra" zo: dau qe ngad ko" ruyang yao: we' dau sho' qam: ke' qo: ako".

²Khristu wa ngonhaung" re jhid'de; mung:- ngonhaung" qhid' mae" yao" kao so' re Mao"So ngaui: ra" sheim nae pyo" ra" ngaui" xeim: khyo" xeim: ngaui" byid' ru we' dakhyo:- naonhaung" kao so' daui: ra" khyo mae re:- jhid'de; myid: yang khyo shid' khang" ra" khyo" kao so' daui ge,.

³Naonhaung" wa Mao"So: byu qe ngad ko" ruyang gaung sho: gintho' mau" zo" maqu" dau: ra" ave,- aja: ja: we' so' kho' obyid: ru we' sin: yang:- naonhaung" phaung gaung: mae ta" lhao" data" thug' ge,.

⁴Dao: co' dao: qeim- ako" asho: dao:- nghin" she' dao: jham re: naonhaung" majhau ang ko" ngad: ra". Mao"So: jeju re caung:khin" byid' ra" dao: za:- naonhaung" jhau ang: ako".

⁵Gaung sho" nho: gintho' mau" zaui" ra" yaug- maqu" dau: ra" ave,- so' kho' obyid: ra" yaug- khag' ngadqere: Khristu we' Mao"So: mung"dan: re khonhae" re: maqo" khae: yu nae" ru re naonhaung" nyang" za: ba: ako". (so' kho' obyid: ru wa solho re goe; pa" ru daja: ngad: ra")

⁶Dao: je dao: keim: yang naonhaung" re khag' damhug' pyag' nhao ge,. Ai: mathao mae Mao"So: mho dao: re matae" gyo" ra" mo; au: dao mae Mao"So: nhag' yo" ru joe" li" li" nae".

⁷Airumung: naonhaung" wa airu" mo, we' dajhid' re: dazam" ge,-

⁸Naonhaung" yao: re: qhid' phyao: wa mug: cad' khug mae na: lo mo, ngad: ako". Ngadqere: ana" naonhaung" wa Asang: nho: byu qe boe" lo vako" ruyang mug: bo" khug mae ngad: avako". Airumung: mug: bo" khug mae" byu qe we' dakhyo:- naonhaung" re: kao so' daui ge,.

⁹Pe"mung:ga"re mug: bo" wa- gai shab: ru aja: ja:- din:man" ru- dangman" ru- jham re myo" laug: li" nhao: ra".

¹⁰Asang o ngaui: ru pe" ja: ngad: rure qam: ke' yang: zhao: yu ge,.

¹¹Mug: cad' khug mae na ko" ra" mo, kad' ko" ra" lo,mau" jham re macao" kad' lo:- ai: lo, mau" jham re mug: bo" shad' khyo phoe' qhu" byid: ge,.

¹²(Yao: bam anyham: avho' mae kad' ko" ra" ai: lo,mau" jham re ta" nae" lhao" re:- gyai yao: aqho' axag' ngad: ra".)

¹³Ja: khao: ngo" wa bo" bao shad' khyo ci thug' qhu" byid' ru qhug' lao"- yao: bam yao" lo, mau" ave, gyang" wa- de: de: za: myao: thug' li" ra".

¹⁴Pe"mung:ga"re de: de: za: ci: qhu" to" ra" ja: pe" ngadqere:- bo" bao boe" lo: ra". Airumung: yab: jo; ra" yaug we"- To" wa,- Shid: rumae" daui: to" li" wa,- Khristu wa nao re bao byid' li" nae"- ga: ta" to" ra".

¹⁵Airumung: naonhaung" khoru: kao so' daui ko" ra" khyo re ku yang: lha" ge,- adu: adae: mung mo, re" ru: mangad:- Pha,jhi" bo: ra" mo, re" ru:- kao so' daui ge,.

¹⁶Ce: ayo, ba na jham wa makhyang" ra" ayo, ba na jham ngad: ruyang naonhaung" qo" ra" akho: akhang" khao: ngo" re akyu" bo: ra" khyo" ci ge,.

¹⁷Airumung: dago dapyan ge,- Asang naonhaung" re pe" ja: kad' nhao nug: rure qam: ke' yang: pha: qho ge,.

¹⁸Yhid dashaug' yid ge,- Aiwa naonhaung" re byo; qeim: lo" nhao: li" nae". Ai: atha" Gyang" Lho" Byo we' byang" jo, ge,-

¹⁹caung:khin" dao:- nghaui" caung: dao:- caung:pa" ru we' sin" ra" nghaui" caung: dao jham we' naonhaung" yao: cao:- jho" jhau mung:- naonhaung" aung khug nhag' lam: mae Asang re jeju caung:khin" zo" re"nghaui"caung: dao: we' caung:khin" dao: khyo" nghaui" caung: khin" na ge,.

²⁰Naonhaung" wa Yesu Khristu mang a re lao: yang:- ja: khao: ngo" qhid' mae" khonhae" re: Pho" Mao"So re jeju caung:khin" ge,.

²¹Naonhaung" wa Khristu re phug' myao: mo, ngad ko" ruyang- dayaug myid o: rure dayaug myid jho" cao" byid: ge,.

²²Yham sang myhi" qe we"- Asang eib khang" ru re kham: yu ko" ru we' dakhyo:- naonhaung" yham sang pho" qe: eib khang" rure kham: yu ge,.

²³Pe"mung:ga"re Khristu wa ai: Phung: dao mae kheim: so' qo" yaug ngad: ru we' dakhyo: yham sang pho" wa yham sang myhi" dao mae kheim: so' qo" yaug ngad: ra". Khristu yao: yao: wa- yao" gaung khyao ngad: ra" ai: Phung" nho: khyad' yu: ra" Asang ngad: ra".

²⁴Airumung: Phung: wa Khristu eib khang" ru kham: yu: ru we' dakhyo:- yham sang myhi" qere: yao: bam: yham sang pho" qeyang eib khang" rure bin sho' kham: yu ca" ra".

²⁵Yham sang pho" qe we"- Khristu wa ai: Phung: re jhid'de; mung: ai: Phung" qhid' mae" yao" kao so' re byid' pye' ru we' dakhyo:- naonhaung" yham sang myhi" qere jhid'de; ge,.

²⁶Khristu yao" kao so' re byid' pye' ru wa ai: Phung: re qid mae bin: cid' san: pye' lao"- yao" mungdao" yang Mao"So re qhaug' byid: mung:-

²⁷ai: Phung: wa gyang" san: ru we' pe" maqo: ru- abe, alhau: pe" khu madung- anyhaung ajhoe' mabo- majab byang" ru pe" mabo lo:- yaung" lho" ru we' Khristu yao: re qhaug' byid: nae" qhid' mae" ngad: ra".

²⁸Yauggai qe wa yao: bam yao" gaung re yao: bam jhid'de; ru we' dakhyo- yao: bam: yham sang myhi" qere jhid'de; qo: ako". Yham sang myhi" re jhid'de; ra" yaug wa- yao: yao" gaung re jhid'de; ra" yaug ngad: ra".

²⁹(Khag' re: yao: yao" gaung re nghang" ra" yaug mana ngad: ra". Nghang: nae" atha"- Khristu wa ai: Phung: re zo:ve: yang khau mung: gun caung: ru we' dakhyo:- aiyaug wa yao" gaung re zo:ve: yang khau mung: gun caung: ra".

³⁰Pe"mung:ga"re ngonhaung" wa Khristu nho: gaung khyao mae" gaung dau jham ngad: ra".)

³¹Jham: Mugsug' mae ce: khyo mathao mae yauggai wa yao: pho" we' yao: myhi" re to: co' yang:- yao: yao" yham sang myhi" we' yezam" khug mung: yao: shid' zo: wa- dagaung dasho: za: boe" byaug: li" genae"- ga: ta" ra".

³²Ce: Jham: dao: mae gyai no; thao" ra" dang man" ra" khyo re qhu" byid' ru ngad mung:- Khristu we' Phung: re qang yang:- ta" ru ngad: ra" khyo" ngo ba: gyo" ra".

³³Ngadqere: naonhaung" yaug khao: ngo" rere: qang yang: ta" ru ngad: ra". Yham sang pho" yaug khao: ngo" wa- yao" yham sang myhi" re yao: yao" gaung re we' dakhyo:- jhid'de; ca" ra". Amung: yham sang myhi" yaug khao: ngo" wa yao: yao" yham sang pho" re phug' myao: ca" ra".