Read Maru EPHESU 6 Bible Online

EPHESU 6 - Maru bible

EPHESU 6

¹Zo: dau qe we"- Naonhaung" nho: myhi" pho" qe: mho dao: re tae" gyo: ge,. Pe"mung:ga"re airu wa Khristan: Phung: byu qe zaui: ang: ra" mau" zo" ngad: ra".

²Nao- na: qo" na: dai mung:- ai: mung"dan: mae kao qhang sho' qo" na nae" qhid' mae" ni" myhi" we' ni" pho" tao re phug' myao: wa,-

³ga" ra" amyin" dao: wa- sao qhid' mae" dao: thang" bo: ra" amyin" dao: ngad: ra".

⁴Myhi" pho" qe we"- Naonhaung" nho: zo: dau qere nhag' dazai" yho: ge,- Ai: atha" yao: bam re Khristan: tarha" we' dakhyo:- mho" shid' mho" peim: byid: mung:- khau: qhi: ge,-

⁵Jeim qe we"- Khristu nho: mho dao: re tae" gyo" ru we' dakhyo:- gyaug: nin" zo" re" nhag' lam: dapyae za: vin mung:- naonhaung" asang qe: mho dao: re tae" gyo: ge,.

⁶Asang qe qu" na ko" au: yao: bam o ngaui nae" khyo" za: makad' lo:- Khristu nho: jeim qe ngad: ru we' dakhyo:- Mao"So o ngaui: ra" khyo" naonhaung" aung khug nhag' lam: alhab' we' caung da" byid: ge,.

⁷Byu re caung da" byid' ra" khyo" za: mangad:- Asang re caung da" byid' ra" khyo"- naonhaung" mau" zo" re bau: bau: za: vin vo; ge,-

⁸Asang wa jeim re ngadqere:- jeim mangad: yaug re ngadqere:- yaug khao: ngo" re yao: zaui: so" ra" gai: ra" mau" zo" qhid' mae" jhaung qhu" byid: nae" ngad: rure myid: beim: ge,-

⁹Asang qe we"- Naonhaung" re: ai we' dakhyo:- naonhaung" jeim qere zam" khug ge,- kyaug' nhin" ra" dao: re thang: pye' ge,- Naonhaung" we' naonhaung" jeim qe wa mug:gaung dao mae Asang dayaug za: ngad mung:- ai: Asang wa yaug khao: ngo" re mai qhi" yang: dao: kho' ra" yaug ngad: rure naonhaung" myid: beim: ge,.

¹⁰Asang we' dadang: dalam: za: doe, mung:- yao" qam: bo: thao" ra" qam: so' khyo" yang naonhaung" qam: bo: jo, genae" qhid' mae" dao: pin" khyo" ngo ta" nug: ra".

¹¹Yui: yang mhug' pyag' ra" makhyang" ra" pha,jhi" khyug' rure naonhaung" qo" thaug' kham" pye' genae" qhid' mae" Mao"So byid' ra" gyekhin alhab' re yu: ve; ci ge,.

¹²Pe"mung:ga"re naonhaung" wa xao su byu qe we' gye jho" khe' na: ru mangad:- mug:gaung mae" makhyang" ra" byo jham we' re:- zug: qe we' re: kheim: so' qo" ra" mo, we' re:- ce: mug: cad' myid gaung re eib: ra" mo, we' re:- gye jho" khe' na: ru ngad: ra".

¹³Airumung:- Mao"So: gyekhin re yu: ve, ge,- makhyang" ra" ba na joe" lo lao"- naonhaung" wa gyevo qere qo" thaug' kham" pye' li" genae". Gye bin: khe' aung: pye' thao rere:- naonhaung" wa tang za: qo" ye; jo; li" genae".

¹⁴Amung: naonhaung" phyid' dam: mae dangman" ru ga" ra" phyid' cui: re tang za: cui" ci mung:- dinman" ru ga" ra" qao nghoe' re nghoe' ci yang:-

¹⁵ngaui pyo: yaug yo: runho: Lau Dao: Gai re kho" kyo: nae" jin" jin" ngad: ra" khyid zhaung: re zhaung" ci ge,.

¹⁶Lam khug: ru ga" ra" go re khonhae" re: zaui" ci ge,- Naonhaung" wa ai: go: yang makhyang" ra" yaug ngad: ra" yui: yang bag: ke' ra" myishae de; ra" myo: jham alhab' re qo" se' pye' li" genae".

¹⁷Khyad' yu: rure khae: yu: ru ga" ra" jo,to' maug re zhaung: mung:- Byo: yang byid' ra" Mao"So: mungdao: ga" ra" shae pyang: re yu: vin: ci ge,-

¹⁸Mao"So: yang bao" thaug' byid' rure qo" kham: yu genae" qhid' mae" khonhae" re: akyu" mho' na ge,- Byo: yang khyoqhid' au: she: ru we' dakhyo:- yo, gin khao: ngo" mae akyu" mho' ge,- beim: so: lha" na mung:- qam: dashan ge,- Mao"So: byu qe alhab' qhid' mae" khonhae" re: akyu" bao" mho' byid' na ge,-

¹⁹Ngo mungdao: kho" kyo" ra" au: re- Mao"So wa ngore mungdao: byid: nae" qhid' mae" we' ngo wa Ngaui Bau" Lau Dao" nho: no; thao" ra" lajheim: re mazag mavae qo" pheim: kyo: byid: nae" qhid' mae"- nga" qhid' mae" re: akyu" bao" mho' byid: gela,.

²⁰Ngo wa ana" thaung: laung" jo, ngadqere:- ce: Ngaui Bau" Lau Dao: mathao mae ngo wa lagyo: dayaug ngad: ra". Ngo wa ai: Ngaui Bau" Lau Dao: khyo re kho" kyo: ang: ru we' dakhyo:- vae" vae" za: kho" kyo: nae" qhid' mae" akyu" bao" mho' byid: gela,.

²¹Ngo khoru: ngad: na: rure naonhaung" qo" ba: yu geshao:- ai: Asang: mau" vin rumae vin tang: kyid yaug ngad: ra" ngonhaung" jhid'de; ra" mao:nhaung: pho" Tukhiku wa- naonhaung" re nga" khyo alhab' jab jab za: li" ta" kyo" li" nae".

²²Aimung:- ngonhaung" alhab' mo; khyo re naonhaung" re ta" kyo: nae" qhid' mae" we' naonhaung" re qam: byid: nae" qhid' mae" ngo wa yao: re naonhaung" jhao" nhao: ke' ru ngad: ra".

²³Pho" Mao"So we' Asang Yesu Khristu wa Khristan: Phung: byu qe alhab' mo, re- ngaui pyo: yaug yo: ru- jhid'de; ru we' lam khug: ru shaman" byid: vashao:-

²⁴Mao"So: nhag' myan" ra" jeju wa khonhae" re: mabyo, maqeim: ra" jhid'de; myid we' Asang Yesu Khristu re jhid'de; na ko" ra" mo; dao mae jo, jo, vashao: wo".