Read Maru PHILIPI 1 Bible Online

PHILIPI 1 - Maru bible

PHILIPI 1

¹Khristu nho: jeim tao ngad: ra" Polu we' Timothi wa Philipi vogaung: mae na ko" ra" phung: zam: qe we' Phung: tau qe bobo yang: Yesu Khristu we' dadang: dalam: za: ngad: na ko" ra" Mao"So: byu qe alhab' re mugsug' tung" vhin: ke' ra".

²Ngonhaung" Pho" Mao"So we' Asang Yesu Khristu wa- nhag' myan" ra" jeju we' ngaui pyo: yaug yo: ra" jeju naonhaung" re shaman" byid: vageshao: wo".

³Naonhaung" re myid: beim: khao: ngo"- ngo wa Mao"So re jeju caung:khin" ra".

⁴Naonhaung" wa Ngaui Bau" Lau Dao: Gai mau" zo" mae qhid: ra" ba na mae" ana" ba joe" sho' bobao" thaug' byid: geyang:-

⁵Ngo wa naonhaung" alhab' mo; qhid' mae" akyu" mho' khao: ngo" ngaui bau" ru we' akyu" mho' ra".

⁶Aimung:- naonhaung" mae ce: gai shab: ra" mau" re zaui" qhid: ra" Mao"So wa- Yesu Khristu nho: ba na joe" sho' ai: mau" zo" re bin sho' zaui" li" nae"-ein: ngo myid: lam: ra".

⁷Naonhaung" wa khonhae" re: nga" nhag' lam: khug mae bo: jo; ako". Amung: ngo naonhaung" khyo re ceru: myid: lam: ru wa nga" qhid' mae" gai ang: ra" khyo ngad: ra". Pe"mung:ga"re ana" ngo thaung: laung" na: au: re we' Ngaui Bau" Lau Dao: Gai re galin: gago: ta" vha mung:- aire zhaug' tang: rumae naonhaung" wa Mao"So: yang ngore ab byid' to" ra" ce: gakai: lai ngad: ra" akho: akhang" mae naonhaung" alhab' ngo we' bovin vo; lo mo, ngad: ako".

⁸Ngo wa Yesu Khristu nho: jhid'de; kao taui: myid we' naonhaung" re myid: na: ru dang: ra" khyo nga" sagse: wa Mao"So ngad: ra".

⁹Naonhaung" wa gai: thao" ra" ja: re qo" ba: khyin: yu genae" qhid' mae" dangman" ra" laba lajhao we' ba: kho' ba: kin: ra" myid pha,jhi" jab byang" mung:- naonhaung" jhid' de, myid xo' yang: qi" qhang: ra" tho' je: qi" qhang: li" vashao:- ngo akyu" mho' ra".

¹⁰Airulao"- naonhaung" wa Khristu nho: Ba Na mae qobo vhin: rumae" we' masan masin" ru alhab' mae" naonhaung" loe; beim: li" genae".

¹¹Naonhaung" wa phungbao bao nae" we' Mao"So re caung: khin" byid: nae" qhid' mae" Yesu Khristu za: ashi: qo" zaui: nhao: ra" dangman: gai lho" ra" gao: qam: jham byang" sheim: jo; li" genae".

¹²Nga" mao:nhaung: qe we"- ngo mae boe" ra" khyo jham wa- Ngaui Bau" Lau Dao: je: byo: sin" lo" nae" khyo re gaigai: yao: bao" thaug' byid' rure ngo naonhaung" re ba nhao nug: ra".

¹³Ngo wa Khristu nho: daui daui yaug ngad yang:- thaung: mae laung" jo; rure kho: kham kho" zaung" ra" gyetab tab geim" we' cetau mae na ko" ra" mo, alhab' ba: ako".

¹⁴Airu: ngo thaung: laung" ra" mathao mae lam khug: ra" Khristan mao:nhaung: qe myo: sho' wa- Asang re lam khug: myid je yang: bo: li" mung:- yao: bam wa Mao"So: mungdao: kho" kyo" rumae re:- magyaug maci" lo:- je: vae" li" ako".

¹⁵Yao: bam mae" damyo" wa- myid nug' ra" myid we' myan" myo: nug: ra" myid: yang Khristu nho: khyo re kho" kyo" ako". Ngadqere: damyo" wa- gyang" ra" kao bau myid we' kho" kyo" ako".

¹⁶Ngo wa Ngaui Bau" Lau Dao: re gug: gam qhaung byid: nae" qhid' mae" Mao"So: yang san: to: yaug ngad: rure yao: bam ba geyang:- aibam wa jhid'de; myid we' kho" kyo" ako".

¹⁷Damyo" wa- Khristu nho: khyo re nhag' lam: din: din: za: mangad: lo:- yao: yao" qhid' mae" za: so' kho' ra" myid we' kho" kyo" ako". Yao: bam wa ngo thaung: laung" na: ra" au:- ngore qug: khai: je: laug sho' kad' nae"- ga: myid: ako".

¹⁸Airu wa akhyag mangad:- geim kad' myid we' kho" kyo" ru ngad: re ngad- nhag' lam: din: din: za: kho" kyo" ru ngad: re ngad- gai: boe" ra" khyo khe' khao: ngo" mae Khristu nho: khyo re kho" kyo" ru ngad yang: ngo ngaui bau" ra"- xo' yang: ngaui bau" na nae".

¹⁹Pe"mung:ga"re naonhaung" akyu" mho' dao: mathao: yang re:- Khristu Yesu nho: Byo: yang bao" thaug' byid' ra" khyo" yang re:- ngo loe; beim: na: rure ngo ba yang: ngad: ra".

²⁰Nga" kao bau: ru we' myid: lao" ru wa- ngo wa vin vo; ang: ra" ngoyao" qo re vin vo' rumae qho' maphau: nae" we' khonhae" re: ngad: ru we' dakhyo:- ana" re: je yang:- ngo wa kao so' daui ngadqere:- shid ngadqere:- nga" dao: thoe lo, mau" alhab' yang Khristu re phug' te' nga: yhe' byid: nae" qhid' mae" mazag mavae myid bo nae" ru ngad: ra".

²¹Ta" gelang: ga" re kao so' daui: ga" ru wa- nga" qhid' mae" wa- Khristu ngad: ra". Airumung: shid: ga"ru wa nga" qhid' mae" je: akyu" bo: li" nae".

²²Ngadqere:- ngo wa kao so' xo' daui: na: ra" khyo" yang mau" zo" je: qo" zaui: so: nae" ngad: re wa kao so' daui: ru we' shid: ru shid' ja: mae" khoja: re khyin: yu nae" rure ngo khyag' maba ngad: ra".

²³Ngo wa nhag' lam: shid' gao boe" jo; ra"- ngo wa ce: kao so' daui: na: ra" qae" mae" gao: mung: Khristu we' daga" gyai na nug: ra". Airu wa je: gai: ru ngad: ra".

²⁴Ngadqere: naonhaung" akyu" qhid' mae" ngo kao so' daui: na shinae" ru wa- je yang: akhyag: ra".

²⁵Ceru re ngo nyang" za: ba mung:- ngo xo' yang: dam: na nae" rure ngo ba:- naonhaung" qi" qhang: li" ru we' lam khug: rumae ngaui bau" rure myo" laug: li" nhao nae" qhid' mae" naonhaung" we' daga" xo' yang: ngo dam: na shinae".

²⁶Airumung: ngo naonhaung" jhao" dam: joe" li" lao"- Khristu we' naonhaung" dadang: dalam: za: doe; rumae" nga" khyo we' sin: mung:- phug nae" akhyo naonhaung" je: qo" li" genae".

²⁷Ana" akhyag: ru wa- Khristu nho: Ngaui Bau" Lau dao: we' dakhyo:- naonhaung" kao so' daui nae" ru ngad: ra". Airumung: ngo naonhaung" re li" qo" qhug' ngadqere:- maqo" li" qhug' ngadqere:- naonhaung" wa myid: qang: ru daja: mae za:- kao bau myid o: ru daja: za: we' naonhaung" tang za: ye; jo, mung:- qam: ke' yang: myid: kao bau: ra" daja: za:- ai: Ngaui Bau" Lau Dao: we' sin" ra" lam khug: ra" gyekhe' na ko" rure ngo the' gyo" ra".

²⁸Naonhaung" gyevo qere dagyaug ge,- khonhae" re: mazag mavae na ge,- ceru wa- yao: bam wa seim" nae" ngad: ru we' naonhaung" wa aung doe, nae" ngad: rure sagse: qhu" byid' ra". Pe"mung:ga"re naonhaung" re aung doe, nhao: ra" yaug wa Mao"So ngad: ra".

²⁹Pe"mung:ga"re naonhaung" wa Khristu re lam khug: ra" khyo" za: mangad:- yao" qhid' mae" khyag' qhui: ru kham zo" ra" khyo" re:- Khristu re caung da" byid: nae" qhid' mae" gakai: lai: ra" agu re qo" kham: yu: ako".

³⁰Ana" naonhaung" wa gyekhe' poe mae ngo we' daga" qo" bobo: avako". Ai: gyekhe' poe wa qhid' phyao: ngo gyekhe' na: au: naonhaung" the' myao mung:- ana" re: gyekhe' na: rure naonhaung" the' myao: ra" gyekhe' poe yao: ngad: ra".