Read Maru PHILIPI 2 Bible Online

PHILIPI 2 - Maru bible

PHILIPI 2

¹Naonhaung" Khristu we' kao so' daui: ru wa naonhaung" re qam: bo: li" nhao mung:- yao" jhid'de; myid wa naonhaung" re nhag' tang" byid' ra". Naonhaung" wa ai: Byo we' qo" zam" khug gemung:- naonhaung" wa yao: cao: jho" nhag' khyag' shono myid bo: ako".

²Airumung:- naonhaung" myid: ru daja: za:- yao: cao: jho" jhid'de; ra" myid daja: za: we' nhag' lam: myid jho" qhan" ra" khyo" yang- ngore jab byang" sho' ngaui bau: nhao gela,- ein: ngo naonhaung" re jhan" ke' ra".

³Yao: yao" qhid' mae" za: so' kho' ra" myid- mangad: lao"- langa: kad' yang: phug nug: ra" myid we' pe" ja: re: dakad' ge,- Yao: cao: nhag' lam: jho" nyham: khyo" mung:- byin cao: qere khonhae" re: yao: yao: tho' je: ra" yaug ngad: ra" ein: myid: yu ge,.

⁴Yao: yao" qhid' mae" za: akyu" maqho lo:- yao: cao: dayaug we' dayaug: akyu" qhid' mae" qho ge,-

⁵Yesu Khristu mae bo: ra" myid wa naonhaung" mae re: bo nhao ge,.

⁶Yao: wa Mao"So: ave, akhyao khonhae" re: bo: jo, yaug ngadqere:- maqad maqui" deim" zag: ra" khyo" yao: wa Mao"So we' daqi" za: boe" nae" qhid' mae" qam: make' ngad: ra".

⁷Airu: kad' nae" atha"- yao: wa yao: yao" myid re nyham: khyo" yang: yao: qo" ra" gu: alhab' re to" pye' mung:- daui daui yaug: nho: ave, akhyao re kham: yu: ra". Yao: wa xao su byu we' dau: li" mung:- xao su byu: ave, akhyao re kham: yu: ra".

⁸Yao: wa yao: yao" gaung re nyham: khyo" pye' mung:- shid nae" rumae joe" sho' mho dao: gyo" ra". Pyao: zang dao mae shid sho' mho dao: tae" gyo" ra".

⁹Ce: mathao mae Mao"So wa- yao: re myhao: thao" ra" jo, qo joe" sho' tau: to' byid: mung:- Mang alhab' tho' qi" qhang: ra" mang a re ab byid' ra".

¹⁰Airumung:- Mug:gaung- myidgaung we' myidgaung mae na: ra" mo, alhab' wa- Khristu nho: mang a re phug' myao: goe; pa" mung:-

¹¹Yesu Khristu wa Asang ngad: ra"- ga: de: de: za: ta" hau" kyo: gemung:- Pho" Mao"So: phungbao re bao nhao: li" genae".

¹²Airu: mung:- jhid'de; ra" ba nam qe we"- ngo naonhaung" we' daga" na: au:- nga" mho dao: re naonhaung" khonhae" re: tae" gyo: ko" ru we' dakhyo:- ana" ngo naonhaung" we' va" kyo: na: au: re: nga" mho dao: re naonhaung" tae" gyo: nae" gyai akhyag: ra".

¹³Mao"So yao"myid o: ra" khyo re phug' cao" nug: ra" myid we' qo" phug' cao" nae" qam: so' Mao"So: yang khonhae" re: ke' byid' na: ruyang- naonhaung" wa khyad' yu: rure jab byang" sho' qo" kham: yu nae" qhid' mae" gyaug: nin" ra" myid we' zaui: so" na ge,-

¹⁴Ja: khao: ngo" re majho" nyhung- majho" ngag lo: zaui: so: ge,-

¹⁵airu: lao"- naonhaung" wa- makhyang: mashab: akyang qeim qobo shad' lhoe" ra" mo, na: ra" ce: mug:myid dao mae Mao"So: jab byang" ra" zo: dau qe khyo"- qobo vhin nae" made; ru we' yaung" shab: ra" mo, ngad: li" genae". Amung: naonhaung" wa yao: bam re kao so' mungdao: kho" kyo: byid: zo" re"- mug:gaung mae kyi bao: jo; ru we' dakhyo:- yao: bam: phaung gaung: mae naonhaung" bao byid: ca" ko" ra".

¹⁶Naonhaung" airu: kad' ko" ngad: re wa- ngo qam: ke' zaui: so" lo: ra" mau" zo" alhab' wa- aje amyid mangad' rure qhu" byid' li" nae" ngad: ruyang- Khristu joe" li" ra" Ba Na mae ngo wa naonhaung" mathao mae phug nae" akhyo qo" li" nae".

¹⁷Naonhaung" nho: lam khug: myid: yang Mao"So re qhaug' byid' ra" ngaui" xeim: dao mae nga" kao so' sa: re vhe' sheim: nae" ga: ngadqere: ngo wa ngaui bau" ra". Ngo we' daga" naonhaung" alhab' mo, rere: bobau: nhao nug: ra".

¹⁸Ai we' dakhyo: naonhaung" re: ngaui bau: ge,- amung: naonhaung" we' daga" ngo rere: ngaui bau: nhao gela,.

¹⁹Asang myid: o yang: ngad: re ngo wa naonhaung" lau thoe re the' gyo: yang:- qam: qo" yu nae" qhid' mae" mataung" myao" re Timothi re naonhaung" jhao" qo" nhao: ke' li" nae"- ein: ngo myid: lao" na:.

²⁰Timothi dayaug za: ngo we' nhag' lam: jho" zhaung: yaug ngad mung:- yao: wa gaigai: yao: naonhaung" gai nae" rure myid byid' na yaug ngad: ra".

²¹Gaje qe yaug khao: ngo" wa Khristu we' sin" ra" khyo mae mangad:- yao: yao: we' sin" ra" khyo mae za:- gaung yug sang: kho" ako".

²²Timothi wa mau" zaui: khoqhi" kyid yaug ngad: rure we' yao: we' ngo wa yao: pho" we' yao: zo: ru: Ngaui Bau" Lau Dao: pyo: ra" mau" zo" mae daga" za: khoru: zaui: so" lo: rure naonhaung" yao: ba: ako".

²³Airumung: nga" khyo we' sin: yang:- khoru: ngad nae" rure ba lao" jao"- yao: re naonhaung" jhao" ngo qo" nhao: ke' li" nae"- ein:- myid: lao" na:.

²⁴Amung:- ngoyao" gaung yao: re:- mataung" myao" re naonhaung" jhao" qo" joe" li" nae"- ein: Asang: khug mae ngo myid: lam: na:.

²⁵Nga" mau" zaui: cao:- ngo we' daga" gyekhe' lo: ra" yaug- naonhaung" lagyo: khyo" ngore caung da" byid: yaug ngad: ra" naonhaung" mao:nhaung: pho" Epaphrodi re naonhaung" jhao" nhao: ke' byid: ca" ra"- ein: ngo myid: to: va".

²⁶Yao: wa naonhaung" alhab' mo, we' gyai jho" myao nug: na: ra". Yao: no: ra" lau thoe re naonhaung" the' gyo: vako" ruyang yao: gyai myid myo" na: ra".

²⁷Dang za: yao: wa- alaug shid sho' no: pye' ava". Ngadqere: Mao"So wa- yao: re nhag' khyag' byid' ra". Mao"So wa yao: re za: nhag' khyag' byid' ru mangad:- ngo rere: nhag' khyag' mung: je: qi" ra" kaug' qhui: ru ngore maqhug' nhao ngad: ra".

²⁸Airumung: yao: re naonhaung" dam: myao gelao"- ngaui bau: genae" qhid' mae" we' nga" nho: kaug' qhui: ra" khyo re: baui" byaug vashao:- yao: re naonhaung" jhao" nhao: ke' byid: nae" nga" aung khug mae je yang: myid: kao bau: na:.

²⁹Amung: naonhaung" wa yao: re- Asang: khug mae mao:nhaung: dayaug we' dakhyo:- ngaui ngaui bau: bau: za: lham: khae: yu ge,- airu" mo, re phug' myao: ge,-

³⁰Pe"mung:ga"re yao: wa naonhaung" yao" gaung: yang maqo" bao" thaug' byid' rure ngo re qo" bao" thaug' byid: nae" qhid' mae" yao" kao so' re dan: pye' mung:- Khristu nho: mau" zo" qhid' mae" alaug laug shid sho' zaui: so" lo: ava".