Read Maru PHILIPI 3 Bible Online

PHILIPI 3 - Maru bible

PHILIPI 3

¹Nga" mao:nhaung: qe we"- dao: pin" khyo" ta" nae"- Asang we' dadang: dalam: doe; rumae ngaui bau: ge,- azhao ngo bin: tung" ke' va" khyo re za:- dam: paug' yang: tung" ke' nae" ngo pe" qo la: thoe magyo:- naonhaung" qhid' mae" je yang: gug: gam: ra" khyo ngad: ra".

²Makhyang" ra" lo, mau" kad' mo, rere:- ai: lakha: byu qere re:- gaung khyao re phyid' lhai: ca"- ga: qam: ke' ta" ra" mo, rere:- lha" ge,.

³Dangman" ra" au: qid lhai: khyo re kham: yu va" mo, wa- yao: bam mangad:- ngonhaung" lam: angad: ra". Pe"mung:ga"re ngonhaung" wa- Byo khyo" yang Mao"So re caung:pa" mung:- Yesu Khristu we' dadang: dalam: za: kao so' daui yang: ngaui bau" ra" mo, ngad: ra". Ngonhaung" wa- adao shad' mae" ali aso: re khug ngha: ra" mo, mangad:.

⁴Airu" ra" ja: jham re ngo khug ngha ca" yang: ngad: re wa ngo khug ngha nae" qo" ra". Adao shad' mae" ali aso: jham re qo" khug ngha:- ga: myid: ra" byu dayaug yaug na yang: ngad: re wa- ngo wa airu: myid nae" akhyo je: qo" ra".

⁵Ngo wa khau: li" thao dalaban ngad: au:- au: qid lhai: khyo kham: yu: lo yaug ngad:. Ngo wa Israel byumyu"- Benyamin kaung mae" Hebre sa: gyang" ngad: ra" myhi" pho" qemae" khau: li" ra" yaug ngad:- Kham" to" ra" Tarha" re phug' cao" ru we' sin: yang: ta" re ngo wa Pharishe dayaug ngad:.

⁶Lam khug: khyo re gyai nhag' lam: to" yaug ngad mung:- Phung: re yhin" lo yaug ngad:. Kham" to" ra" amyin" dao: jham re phug' cao" ra" khyo"- din:man" ru qhug' yu nae"- aga" re wa ngo wa pe" qobo made, yaug ngad: ra".

⁷Ngadqere: nga" qhid' mae" gau pai: ein: khyo" ngo qo" sun" yu: ra" ai: gu: alhab' re ana" wa- Khristu mathao mae aseim" khyo" ngo myid: yu: ra".

⁸Aigu: za: mangad:- nga" Asang Yesu Khristu re qo" ba qo" se" ru wa- ja: khao: ngo" tho' mae" je yang: phug' de; ru ngad mung:- ja: khao: ngo" re aseim" khyo" ngo myid: ru ngad: ra". Pe"mung:ga"re- yao" mathao mae ngo wa ja: khao: ngo" re to" pye' va"- ngo wa Khristu re qo" yu nae" qhid' mae" we' yao: we' dadang: dalam: za: jab byang" sho' qo" doe, nae" qhid' mae" ai: gu: alhab' re basad ruza: ngo myid: pye' ra".

⁹Ngo wa Kham" To" ra" Tarha" re phug' cao" ra" khyo" yang din:man" rure maqhug' kham: yu lo:ngad: ra". Ana" ngo wa ai: din:man" ru re Khristu re lam khug: ra" khyo" yang za:- qo" kham: yu: ra". Ai: din:man" rure qo" kham: yu: ru wa- Mao"So: yang byid' ra" je" ju" ngad mung:- lam khug: ra" myid mae aqao: to" ru ngad: ra".

¹⁰Ngo o: ra" khyo ajhaung wa ngoyao" gaung yao: shid: rumae" kao so' daui: ra" khyo kao so' daui nhao: ru qhug' nae" rure myid: lao" zo" re" Khristu re ba nae"- yao" shid: rumae" dam: daui: to: li" ra" qam: so' re ba: yu nae"- yao" dayin dayo: kham zo" rure bokham zo: nae" we' yao" shid kham" ru we' dakhyo:- boqo" shid kham: nae" ru jham ngad: ra".

¹²Ngo wa aung doe, va"-jab byang" va"-ein: mata" nug- ngadqere: Yesu Khristu wa- yao" qhid' mae" boe" nae" ngore aung: yu va" ruyang ai: jhaung qhu" re qo" zaui" yu sho' ngo qam: ke' na:.

¹³Nga" mao:nhaung: qe we"- ngo wa aire qo" yu va"- ein: mamyid. Ngadqere: ngo kad' ru daja: wa nga" nhaung thao" mae" rure to" myhid' pye' to: co' mung:- qhid' au: mae jo; ra" ja: re joe" myhi sho' qam: bo: thao" mae" phin: yang: qam: ke' na:.

¹⁴Airumung: ngo wa mug:gaung: mung"dan: mae kao so' qo" daui nae" qhid' mae" Yesu Khristu khyo" yang Mao"So khai: yu: ra" ai: jhaung qhu" re qo" yu sho' bin: zang shad' khyo myo,khung: qang yang: din: din: tao" ra".

¹⁵Byo we' sin: yang: zoqao" ngad va" mo, naonhaung" alhab' wa ceru" ra" myid bo qo: ra". Ngadqere: naonhaung" mae" damyo" wa shai" ra" myid bo yang: ngad: re wa- Mao"So wa ce: khyo we' sin: yang:- naonhaung" re sho' kyo" li" nae".

¹⁶Airu: ngad sho' ngadqere:- ngonhaung" wa ana" ba joe" sho' bin: cao" lo va" ra" azhao" we' dakhyo:- qhid' au: khyo xo' ye: gelang:.

¹⁷Nga" mao:nhaung: qe we"- nga" ave, re xo' yang: qu" yu ge,- Ngonhaung" qhu" byid' ra" ave, gai re cao" ra" mo, re qu" xam" yu ge,-

¹⁸ngo wa ce: khyo re qhid' phyao: myo: sho' lhang naonhaung" re ta" qu" va". Ngo wa ana" re: ngug byid we' dam: paug' ta" ra". Khristu nho: pyao: zang dao mae shid kham: rure gye kad' mung: kao so' daui: ra" mo, myo: sho' na: ako".

¹⁹Yao: bam: so wa yao: bam: gaung sho: myid o kao bau: ru ngad geyang: yao: bam wa myiqid tham: mae jeim" lo" li" genae". Yao: bam wa qho' phau: ang: ra" ja: mae phug: ako". Yao: bam wa ce: mug:myid we' sin" ra" ja: jham re za: myid: ako".

²⁰Ngonhaung" kam" wa mug: khaung: mung"dan: nho: mung" byu qe ngad mung:- mug:gaung dao mae" ngonhaung" nho: khyad' yu: Asang ngad: ra" Asang Yesu Khristu joe" li" nae" rure kao bau taung" lao" na: ru ngad: ra".

²¹Khristu wa ja: cao jab alhab' re yao: eib: ra" qao: mae qo" to" pye' ra" qam: so' khyo" yang qam: nang: mung: shid ba: ra" ngonhaung" nho: gaung khyao jham re phungbao byang" jo; ra" yao" gaung khyao we' dau sho' tha" pye' byid' li" nae".