Read Maru PHILIPI 4 Bible Online

PHILIPI 4 - Maru bible

PHILIPI 4

¹Airumung: nga" mao:nhaung: qe we"- ngo wa naonhaung" re gyai jhid'de; mung:- gyai myid: lhe"- Naonhaung" wa ngore gyai ngaui bau: nhao gemung:- ngo wa naonhaung" mathao mae gyai phug: ra". Amung: jhid'de; ra" mao: nhaung: qe we"- Naonhaung" wa Asang: khug mae kao so' daui: rumae tang za: ye; jo, ang: ako".

²Eodia we' Suntuki tao we"- Asang mae yao: bai: yao: nhaung: we' dakhyo: nhag' lam: jho" vang" sho' qam: ke' genae" qhid' mae" jeju khyo" ngo mho' ke' ra".

³Amung: nga" mau" vin cao: ngad: ra" nao re:- ai: myiqe: shid' tao re jho" vang" nae" khyo re bao" thaug' byid: wa,. Pe"mung:ga"re Kelemen we' Mao"So: kao so' mugsug' mae japhin: bo: ra" nga" mau" vin cao: gatau alhab' mo, we' daga" Ngaui Bau" Lau Dao: re ta" hau" ra" mau" zo" mae ngo we' daga" qam: ke' vako" ra" shid' tao ngad: ako".

⁴Asang mae dadang: dalam: za: khonhae" re: ngaui bau" na vageshao:- ngo dam: ta" ra"- ngaui bau: ge,.

⁵Yaug khao: ngo" re nau" nhae" ra" myid qhu" byid: ge,- Asang wa joe" li" na: ava".

⁶Pe"ja" khyo rere: damyid: ci" ge,- khyo khe' khao: ngo" mae khonhae" re: jeju caung:khin" zo" re" akyu" mho' mung:- naonhaung" qo ca" ra" ja: Mao"So re mho' yao ge,.

⁷Ailao"- xao su byu qe ba: gyo" ra" myid nyan: tho' je: ra" Mao"So: ngaui pyo: yaug yo: ru wa- naonhaung" aung khug nhag' lam: we' myid: ra" khyo re Khristu khug mae gug: gam byid' li" nae".

⁸Nga" mao:nhaung: qe we"- dao: pin" khyo" ta" re- gai shab: ra" ja: jham we' caung:khin" man: qi" ra" ja: jham ngad: ra" dangman" ru- phug' de; ru- jo: ru- gyang" san: ru- jhid'de; taung" ru we' phug' myao: tho' ru jham re naonhaung" aung khug mae ke' to: ge,-

⁹ngo mae" naonhaung" zhao: yu mung:- khae: yu vako" ra" nga" dao: thoe jham we' lo, mau" jham re lo, joe" kad' cao" ge,- ngonhaung" re ngaui pyo: yaug yo: ru byid' ra" Mao"So wa naonhaung" we' daga" na: jo, vashao: wo".

¹⁰Ayo, cemyhao" myao" thao re naonhaung" wa- nga" qhid' mae" khoqhi" myid: gaung yug: na: rure qhu" byid: nae" agu dalhang dam: qo" yu ko" ruyang ngo wa Asang: khug mae gyai ngaui bau" ra". Naonhaung" nga" qhid' mae" mamyid: ci" ko" ngad: ra" ein: ngo ta" ru mangad:- Naonhaung" aire qhu" byid: nae" agu maqo" ko" rure ngo ta" ru ngad: ra".

¹¹Naonhaung" ngore mageim: qu" to: ko" ra" ein:- ngo myid yang: cedao: re ta" ru mangad:- pe"mung:ga"re ngo wa ngoyao: qo" ra" gu: mae nhag' dag yang: ba: na nae" rure zhao: yu: to: va".

¹²Myaung sho" rure re: ngo ba: ra"- magan: mago" qo" rure re: ngo ba:- ngo wa- vae: gyi: ngadqere:- myaung sho: ngadqere:- khoyo, khotau mae na na nhag' ba: dag: yu nae" khyo re ngo zhao: yu: to: va".

¹³Khristu yang ngore byid' ra" qam: so' khyo" yang ngo wa- boe" jo; ra" ayaug: ja: khao: ngo" re qo" zang: qhao" nae" qam: so' qo" ra".

¹⁴Ngadqere: ngo qug: khai: qhug' au: naonhaung" ngore bao" thaug' byid: ko" ru wa- gai shab: ra" lo, mau" kad' ru ngad: ra".

¹⁵Ngadqere: Philipi bao: we"- ngo wa Makedoni mung" mae" thug' mung: Lau Dao: Gai re kho" qhid: li" ra" au:- naonhaung" Philipi Phung: dalam: za: ngore bao" thaug' byid: ko" ru we' nga" nho: seim" ru jham we' myad: ru jham mae naonhaung" za: ngo we' daga" bokhae: yu vako" rure naonhaung" yao: ba gau ngad: ako".

¹⁶Thesaloni vogaung: mae na: au:- ngo qo ca" ra" gu: re naonhaung" wa dalhang za: mangad:- bao" thaug' ru ngore vhin: ke' byid' ako".

¹⁷Ngo wa ai: jhaung qhu" jham re za: khae: yu nug yang: ta" ru mangad:- Naonhaung" vin vo; lo: ra" gai: ra" mau" zo" japhin: mae je: gai: ra" lo, mau" laung" li" ra" khyo re myao nug yang: ta" ru ngad: ra".

¹⁸Ailao"- naonhaung" ngore vhin: ke' byid' ra" Alu: jhaung qhu" jham alhab' re ngo qo" khae: yu va" khyo re cemae botung" ke' ra". Aijham wa- magan: mago" ngad: ava"- naonhaung" jhaung qhu" jham alhab' re Epaphrodi wa ngojhao" vin: joe" li" byid: mung:- ana" ngo wa qo ca" gu: alhab' qo" va". Ai: jhaung qhu" jham wa sheim nae pyo" ra" xeim:- Mao"So khae: yu nug: ru we' ngaui: ra" xeim: we' dakhyo: ngad: ra".

¹⁹Airumung: nga" Mao"So wa magan: mago" jo, nho" qo" yaug ngad: ru we' dakhyo:- Yesu Khristu khyo" yang naonhaung" qo ca" ra" gu: alhab' re byid' li" nae".

²⁰Ngonhaung" Pho"- ngad: ra" Mao"So wa apyad ato khonhae" re: phungbao bao: jo, vashao: wo". Amen.

²¹Yesu Khristu yang sang: ra" mo, ngad ko" ra" Mao"So: byu qe yaug khao: ngo" re au" ke' ra". Cemae ngo we' daga" na ko" ra" mao:nhaung: qe wa- naonhaung: re au" ke' ako".

²²Cemae"- Mao"So: byu qe alhab' wa naonhaung" re au" ke' ako"- je yang: khosin" pho" nho: kho:kham kho" mae na ko" ra" Mao"So: byu qe wa naonhaung" re au" ke' ako".

²³Asang Yesu Khristu nho: nhag' myan" ra" jeju wa naonhaung" alhab' we' daga" ngad: jo, vashao: wo".