Read Maru KOLOSE 3 Bible Online

KOLOSE 3 - Maru bible

KOLOSE 3

¹Naonhaung" wa Khristu we' daga" dam: daui: to" li" nhao: ru qhug' vako" ruyang Khristu wa yao" zaung tao" dao Mao"So: lo, yo shad' mae zaung: jo; ra" jo, qo mug:gaung: mung"dan: mae" zai jham re naonhaung" nhag' nghae" na ge-

²myidgaung dao mae jo; ra" zai jham re nhag' manghae: lo:- mug:gaung dao mae" zai jham re naonhaung" nhag' nghae" na ge,-

³pe"mung:ga"re naonhaung" wa shid: byaug va" mo, ngad gemung: naonhaung" kao so' wa Mao"So: khug mae Khristu we' daga" shaung: to: byid' ra".

⁴Naonhaung" nho: kao so' agyang" wa Khristu ngad mung: yao: na: thug' li" lao"- naonhaung" re: yao: we' daga" za: na: thug' li" yang: yao" phungbao re bokham: yu: li" genae".

⁵Airumung: naonhaung" wa gaung sho" nho: gintho' mau" zo" jham- mashab mayaung" ra" lo, mau"- gaung sho: shab' ru- makhyang" ra" lo, mau" kad' nae" kao bau: ru- (so' kho' ru wa solho re caung:pa" ra" akhyao daja: ngad: ra") jham ru" ra" naonhaung" khug mae mau" zaui" na: ra" gaung sho: kao bau myid o: ru jham re se' pye' ca" ako".

⁶Airu"ra" khyo jham: mathao mae yao" mho dao: re matae" gyo" ra" mo; dao mae Mao"So: nhag' yo" ru joe" li" li" nae".

⁷Qhid' phyao: naonhaung" wa airu" ra" khyo jham: yang naonhaung" kao so' daui khyo re eib: na: au: airu" ra" gaung sho: kao bau myid o: rure cao" yang: naonhaung" kao so' daui: lo: ako".

⁸Ngadqere: ana" naonhaung" wa nhag' yo: nhag' gyid' ru- su re qu" roe" pyi qho: ru- kheim: co' jhau: ru jham re naonhaung" nhad' mae" khonhae" re: dathug' nhao ge,

⁹Yao: cao: dajho" mhug' ge,- pe"mung:ga"re naonhaung" wa magai: ra" ave, we' daga" byu xug' re khyad' pye' mung: byu sag' re ve; yu: avako".

¹⁰Ce: byu sag' naonhaung" re phan" to: yaug Mao"So wa naonhaung" re je: jab byang" sho' ba jhao: li" genae" qhid' mae" yao" gaung khyao we' je: dau sho' asag' dam: byao: yu: ra".

¹¹Ai: byu sag' boe" rumae Taung bug byu qe we' Yuda byu qe au: qid lhai: khyo re kham: yu: ra" mo, we' aire makham: yu: ra" mo, Taung bug byu qe- byu jam: qe- jeim qe we' jeim mangad: ra" mo; agyo: mae pe" jho" shai" ru majo, lo:ngad: ra". Khristu wa alhab' ngad mung: alhab' mae Khristu ngad: jo; ra".

¹²Naonhaung" wa Mao"So: byu qe ngad: ako". Yao: naonhaung" re jhid'de; mung: yao" qhid' mae" khyin: san: yu: to" ra" mo, ngad: ako". Airumung: naonhaung" yao" gaung re su: qhid' mae" jhid'de; sho: bono: ru- nhag' khyag' nhag' lam: nyham: khyo" ru nau" nhae" ru we' nhag' lam: qhang: ru jham re mai bau: we' dakhyo: ve; ci ge,.

¹³Naonhaung" yao: cao: qobo jho" vhin nae" de, gelao"- dayaug we' dayaug jho" zang: kham yang: qobo jho" khyad' byid: ge,- Asang naonhaung" re qobo khyad' byid: va" ru we' dakhyo:- naonhaung" yao: cao: qobo jho" khyad' byid: ge,.

¹⁴Airumung: aijham alhab' dao mae alhab' re jab byang" sho' dadang: dalam: za: myag: dang" to" ra" jhid'de; myid re laung" ci ge,

¹⁵pe"mung:ga"re Mao"So wa gaung khyao dalam: khyo za: ai: ngaui pyo: yaug yo: rure qo" khae: yu geshao: ga:- naonhaung" re khai: yu: to" ra". Airumung: jeju caung:khin" ge,-

¹⁶magan: mago" jab byang" ra" Khristu nho: mungdao: re naonhaung" aung khug mae na: jo, nhao ge,- nyan: pha,jhi" alhab' we' yao: cao: jho" mho" shid' mung: jho" ta" kyang" na ge, caung:khin"nghaui"caung: we' gyang" lho" ra" nghaui" thoe jham re nghaui" zo" re" naonhaung" aung khug nhag' lam: mae jeju beim: so" ra" nhag' lam" yang Mao"So re caung:khin" ge,.

¹⁷Airumung: naonhaung" kad' ra" mau" zo" mangad: lao"- jhau: ra" dao: thoe ja: khao: ngo" mae Asang Yesu mang re lao: yang: kad' ge,- yao: khyo" yang Mao"So re jeju caung:khin" ge,.

¹⁸Yham sang myhi" qe we"- naonhaung" yham sang pho" qe eib: ra" qao: mae na ge,- pe"mung:ga"re airu wa Khristan qekhyo" naonhaung" kham: yu ang: ra" khyo ngad: ra".

¹⁹Yham sang pho" qe we"- naonhaung" yham sang myhi" qere jhid'de; mung: yao: bam re ayo: athin dakad' ge,-

²⁰Zo: dau qe we"- naonhaung" myhi" pho" qe: mho dao: re tae" gyo" ru wa Khristan qe: qo ngad: ra"- pe"mung:ga"re airu wa Mao"So o ngaui: ra" khyo ngad: ra".

²¹Myhi" pho" qe we"- naonhaung" zo: dau qere pyi daqho ge,- Mangad: re yao: bam nhag' lam: gyug qam: shan: li" genae".

²²Jeim qe we"- naonhaung" jeim sang qe: dao: re ja: khao: ngo" mae mho dao: gyo: ge,- yao: bam: yang ngaui genae" rure o yang: za: yao: bam qu" na myao: na: au: mho dao: gyo" ru mangad: lo:- Asang re naonhaung" gyaug phug' ra" khyo" nhag' lam: din: din: za: yao: bam: mho dao: re tae" gyo: ge,.

²³Pe" mau" zaui: gengadqere: byu: qhid' mae" zaui: byid' ra" khyo" mangad:- Asang re zaui: byid' ra" khyo" naonhaung" aung khug nhag' lam: alhab' we' qam: zaug thag zaui: so: ge,-

²⁴" Asang wa yao" byu qe: qhid' mae" zam" to" ra" mo, re jhaung qhu" khyo" naonhaung" re byid' li" nae" rure naonhaung" beim: ge,- pe"mung:ga"re Khristu wa naonhaung" caung da" byid' ra" jeim sang agyang" ngad: ra".

²⁵Makhyang" ra" mau" kad' ra" yaug wa yao: kad' ra" makhyang" ra" mau"zo" aphug' qobo dae re qhug' kham zo" li" nae". Pe"mung:ga"re Mao"So wa khag' rere: myo, nho makhyin lo: dao: kho' ra".