Read Maru 1THESALONI 1 Bible Online

1THESALONI 1 - Maru bible

1THESALONI 1

¹Polu, Sila, we' Timothi bam wa Pho" Mao"So we' Yesu Khristu nho: byu qe ngad ko" ra" Thesaloni phung: byu qere vhin tung" tung" ke' ra". Nhag' myan" ra" jeju we' ngaui pyo: yaug yo: rure naonhaung" qo" yu vageshao: wo".

²Ngonhaung" wa naonhaung" alhab' mo; qhid' mae" khonhae" re: Mao"So re jeju caung:khin" byid: mung: ngonhaung" akyu" mho' rumae khonhae" re: naonhaung" qhid' mae" akyu" bomho' byid' ra".

³Pe"mung:ga"re naonhaung" lam khug: myid re khoru: lo, joe" zaui: so" na ko" rure ngonhaung" Pho" Mao"So: qhid' kheim: mae myid: beim" na: ra".

⁴Mao:nhaung: qe we"- Mao"So wa naonhaung" re jhid'de; mung: yao" qhid' mae" boe" genae" qhid' mae" khyin: yu: to: va" rure ngonhaung" ba: ra".

⁵Pe"mung:ga"re ngonhaung" wa Ngaui Bau" Lau Dao: Gai re nhad' dao: thoe za: mangad: lo: Gyang" Lho" Byo: qam: so' we' ai: Lau Dao: Gai wa dangman" ru ngad: rure jhaug' za: myid: lam: ru we' ngonhaung" naonhaung" jhao" vin: li" ru ngad:. Ngonhaung" wa naonhaung" we' daga" na: au: naonhaung" akyu" qhid' mae" khoru: kao so' daui: rure naonhaung" ba: ako".

⁶Naonhaung" wa ngonhaung" ave, re we' Asang: ave, re qu" yu: ako". Naonhaung" wa dayin dayo: myo: sho' qhug' kham zo: gesho' ngadqere: Gyang" Lho" Byo: yang byid' ra" ngaui bau" ra" myid we' ai: mungdao: re naonhaung" khae: yu: ako".

⁷Airumung: naonhaung" wa Makedoni mung" we' Akhaia mung" mae na ko" ra" phung: byu qe alhab' mo; qhid' mae" ave, qu" yu nae" mo, boe" lo: ako".

⁸Pe"mung:ga"re naonhaung" lo, mau" mathao mae Asang: nho: khyo mungdao: wa Makedoni mung" we' Akhaia mung" jao: sho' za: hau" nhao" lo" ru mangad: Mao"So re naonhaung" lam khug ko" ra" khyo- lau thoe re khyi" khao: ngo" khyo hau" nhao" lo" ra". Airumung: naonhaung" re pe" ta" maca" lo:ngad: ra".

⁹Ngonhaung" wa naonhaung" jhao" joe" li" au: re naonhaung" khoru: ngonhaung" re lham: khae: yu ko" ra" khyo rere: kao: so' daui: ru we' dangman" ra" Mao"So re caung da" byid: nae" qhid' mae" we' mug:gaung dao mae" yao" yao: Zo: joe" li" nae" qhid' mae" sulho jham re to" pye' mung: Mao"So shad' khyo naonhaung" khoru: phaug' lo ko" ra" khyo rere: ai: byu qe alhab' mo, ta" na: ako".

¹⁰Ai: yao: zo: wa shid: rumae" yao" yang dam: daui: to" li" nhao mung: joe" li" nae" Mao"So: nhag' yo" rumae" ngonhaung" re khyad' yu: ra" yaug Yesu ngad: ra".