Read Maru 1THESALONI 2 Bible Online

1THESALONI 2 - Maru bible

1THESALONI 2

¹Mao:nhaung: qe we"- naonhaung" jhao" ngo joe" li" ru wa naonhaung" yao: ba: ako".

²Ngonhaung" wa Thesaloni vogaung: khyo naonhaung" jhao" majoe" li" shire Philipi vogaung: mae yhin" ru we' maphug' makhyad' roe" ru khoru: qhug' lo: rure naonhaung" ba: ako". Airu: gye kad' ru myo: sho' qhug' ngadqere: ngonhaung" Mao"So wa Yao" Ngaui Bau" Lau Dao: naonhaung" re kho" kyo: byid: nae" qhid' mae" mazag mavae: ra" nhag' lam: ngonhaung" re byid' ra".

³Ngonhaung" wa shad' nghung" ru we' nhag' lam: kaui myid bo yang: naonhaung" re ta" peim: ta" kyang: byid' ru mangad:- ngonhaung" wa khag' dayaug rere: mhug' pyag' nae" qam: make'.

⁴Mao"So wa ngonhaung" re man: qi" ra" mo, ngad: rure ca: myao: ba: to: mung: ai: Lau Dao: Gai re kho" kyo: nae" qhid' mae" lam: to: qhug' va" ruyang Mao"So ngonhaung" re ta" nug: ru we' dakhyo: khonhae" re: ngonhaung" re ta" ra". Ngonhaung" wa byu: yang ngaui nae" rure qam: make'. Ngadqere: ngonhaung" aung khug nhag' lam: re jham" qu" yaug ngad: ra"- Mao"So: yang ngaui nae" rure za: ngonhaung" qam: ke' ra".

⁵Ngonhaung" wa khin" dao: majhau. So' kho' obyid: rure ta" nghoe' pye' ra" dao: thoe majhau: rure naonhaung" yao: nyang" ba: ako". Mao"So wa ngonhaung" sagse: ngad: ra".

⁶Ngonhaung" wa Khristu nho: lagyo: qe ngad: ra" khyo" ngonhaung" mae" akho: akhang" qo" mho' yu mo, ngad sho' ngadqere:-

⁷naonhaung" yang caung:khin" nae" rure su gaje qeyang caung:khin" genae" rure re: khag' yang caung:khin" genae" rure re: ngonhaung" qam: make'. Ngonhaung" wa naonhaung" we' daga" na: au: re- yao: zo: qere gun caung: ra" yao: myhi" we' dakhyo: nau" nhae" za: na: lo va".

⁸Pe"mung:ga"re ngonhaung" wa naonhaung" re jhid'de; ruyang Mao"So: lau dao: gai naonhaung" re ba nhao nae" ru za: mangad:- ngonhaung" kao so' re lhao" re: naonhaung" re gae byid' pye' nae" jin" jin" ngad: ra". Naonhaung" wa ngonhaung" gyai jhid'de; ra" mo, ngad: ako".

⁹Mao:nhaung: qe we"- ngonhaung" khoru: mau" zaui" lo: rure we' dug myaung" lo: rure naonhaung" gaigai: yao: myid: beim" ako". Naonhaung" khag' dayaug rere: qo mala: nhao nae" qhid' mae" ngonhaung" wa myi" re: na" re: mau" zaui: zo: mung: Mao"So: Ngaui Bau: Lau Dao: Gai re naonhaung" re kho" kyo" lo va".

¹⁰Lam khug: ra" mo, ngad: ra" naonhaung" re ngonhaung" zam" khug: lo: ra" lo, mau" wa man" ru- jo: ru we' qobo vhin khyo mabo: rure naonhaung" yao: we' Mao"So wa ngonhaung" sagse: ngad: ra".

¹¹Yao: pho" wa yao: zo: qere qu" gun caung: ru we' dakhyo: ngonhaung" wa naonhaung" yaug khao: ngo" re qu" gun caung: lo: rure naonhaung" ba: ako".

¹²Ngonhaung" wa naonhaung" re abang mabyid qam: byid' lo: ra". Naonhaung" re nhag' tang" byid' lo: ra". Yao" mung"dan: khyo qo" vao ye: nae" akhang" we' Yao" phungbao re qo" khae: yu nae" qhid' mae" naonhaung" re khai: yu: ra" Mao"So o ngaui: ra" ave, lo, mau" we' kao so' daui genae" qhid' mae" ngonhaung" wa naonhaung" re ta" jhan: byid' lo va".

¹³Naonhaung" wa khonhae" re: Mao"So re jeju caung:khin" na: ra" khyo gatau dalam: jo; ra". Airu wa ngonhaung" li" kho" kyo" ra" Mao"So: mungdao: re xao su byu: nho: mungdao: khyo" mangad:- gaigai: yao: Mao"So: mungdao: ngad: ra" khyo" lham: gyo" yu mung:- lham: khae: yu geyang: ngad: ra". Aiwa gaigai: yao: Mao"So: mungdao: ngad: ra". Pe"mung:ga"re Mao"So wa lam khug: ra" mo, ngonhaung" phaung mae mau" zaui" na yang: ngad: ra".

¹⁴Mao:nhaung: qe we"- ngonhaung" mae bo: ra" khyo wa Yesu Khristu byu qe ngad: ra" Yuda mung" mae" Mao"So: phung: jham mae bo: ru we' dakhyo: yao: bam re:-

¹⁵Asang Yesu re we' lapa qere se' pye' mung: ngonhaung" re yhin" lo mo, ngad: ra" Yuda byu qeyang yhin" rure kham zo" lo: ako". Yao: bam wa Mao"So re khoqhi" sho' mangaui nhao mo, ngad: avako" i?

¹⁶Yao: bam wa Taung bug byu qere khyad' yu: ru qhug' nhao: ra" ai: mungdao: re Taung bug byu qere ngonhaung" kho" kyo" ra" mau" zo" re lhao" re: tam" pye' nae" qam: ke' ako". Ceru: kad' ko" ra" khyo" yao: bam wa khonhae" re: shad' lhoe" lo ko" ra" qobo jham mae" lo" thao" mae" qobo re zaui" pyang" pye' avako". Airumung: ana" lo" thao" mae Mao"So: nhag' yo" ru wa yao: bam: au: dao mae joe" jo; ava".

¹⁷Mao:nhaung: qe we"- ngonhaung" wa naonhaung" we' dazab zo: jho" gao" na: bam: au:- gaung dau: za: jho" gao" na: ru ngad: ra". Ngonhaung" aung khug nhag' lam: mae wa naonhaung" re myid: beim" na:. Ngonhaung" wa naonhaung" re gyai myid yang: naonhaung" re dam: qhug' myao nae" qhid: mae" gyai qam: ke' bam va".

¹⁸Ngonhaung" wa naonhaung" jhao" dam: joe" li" nug: ra". Ngoyao: re: naonhaung" jhao" dam: joe" li" nae" ein: myo: sho' lhang qam: ke' yang: seim" qu" va". Ngadqere: Satan wa ngonhaung" khyo re kaung: kag' pye' byid' ra".

¹⁹Ngonhaung" Asang Yesu dam: joe" li" nae" ra" au:- ngonhaung" wa dang za: yao" qhid' kheim: mae ngonhaung" nho: myid: lao" khyo- ngonhaung" nho: ngaui bau: khyo we' ngonhaung" nho: aung doe; ru we' sin: yang: phug nae" akhyo ngad: ako". Ngonhaung" re phug nhao: ra" mo,- myid: lao" nhao: ra" mo, ngaui bau: nhao: ra" mo, mae naonhaung" re: bobo: ako".

²⁰Gaigai: yao: naonhaung" wa ngonhaung" nga: ye, jao: we' ngaui bau: khyo ngad: ako".