Read Maru 1THESALONI 4 Bible Online

1THESALONI 4 - Maru bible

1THESALONI 4

¹Alao" ngonhaung" mao:nhaung: qe we"- Mao"So re o ngaui nhao nae" qhid' mae" ngonhaung" khoru: kao so' daui ang: ra" khyo re ngonhaung" mae" naonhaung" zhao: yu: avako". Gaigai: yao: ga" re naonhaung" airu: kao so' daui: lo: avako". Ai: tho' je: ra" khyo" kao so' daui genae" qhid' mae" ana" ngonhaung" wa Asang Yesu mang mae naonhaung" re jhan" ke' ra".

²Pe"mung:ga"re Asang Yesu nho: kheim: so' khyo" yang ngonhaung" wa naonhaung" re mho" shid' ra" khyo jham re naonhaung" ba: ako".

³Mao"So wa naonhaung" re gyang"lho" mo, boe" genae" rure we' gaung sho: shab' ra" gintho' mau" zo"mae" jab byang" sho' loe; beim mo, boe" genae" qhid' mae" o ngaui: ra".

⁴Yauggai yaug khao: ngo" wa gyang" lho" ru we' phug' de, nga: ye; ra" khyo" yao" yham sang myhi" we' khoru: zam" na nae" rure ba qo: ra".

⁵Mao"So re maba macaung:pa" ko" ra" mo, we' dakhyo: gaung sho: shab' ra" myid re cao" yang: magai: daui ngad: ra".

⁶Airumung: cekhyo mae byu khag' ngadqere: yao" Khristan mao:nhaung: pho" re qobo magai: shad'- mangad: lao"- yao" qam: nyaug re magai: khyug' zo: ngad: ra". Asang wa ceru: kad' mo, re qobo dae byid: nae" ngad: ra" khyo ngonhaung" wa naonhaung" re qao qao za: ta" peim: byid: va". Ngonhaung" wa ce: khyo re qhid' phyao: mae" naonhaung" re ta" to: gau ngad: ra".

⁷Mao"So wa gaung sho: shab' ra" gintho' mau" zo" mae kao so' daui nae" qhid' mae" ngonhaung" re khai: yu: ru mangad:. Gyang" lho" rumae kao so' daui nae" qhid' mae" khai: yu: ru ngad: ra".

⁸Airumung: ce: mho" shid' ra" khyo re ngag: pye' ra" yaug khag' ngadqere: byu re ngag: pye' ru mangad:- yao" Gyang" Lho" Byo ngonhaung" re byid: yaug ngad: ra" Mao"So re ngag: pye' ra" yaug ngad: ra".

⁹Naonhaung" nho: lam khug: ra" mao:nhaung: qere jhid'de; nae" khyo we' sin: yang: naonhaung" re tung" ke' maca" ngad: ra". Naonhaung" yao: cao: khoru: jho" jhid'de; ca" ra" khyo Mao"So: yang mho" shid' byid' rure naonhaung" yao: zhao: yu: to" avako".

¹⁰Naonhaung" wa ai we' dakhyo: yao:- Makedoni mung" geim" mae na ko" ra" mao:nhaung: qe alhab' mo, re jhid'de; avako". Airumung: mao:nhaung: qe we"- ai: tho' je: gai sho' kad' genae" qhid' mae" ngonhaung" naonhaung" re mho' ke' ra".

¹¹Qhid' phyao: ngonhaung" naonhaung" re ta" lo: ru we' dakhyo:- naonhaung" kao bau myid qang: ru wa yaug yo: ra" khyo" kao so' daui nae" we' su: khyo re mabokaung: kag' lo: naonhaung" vae: dug: naonhaung" yao: qo" khau nae" qhid' mae" kao bau myid: qang ge,-

¹²Cekhyo" yang naonhaung" wa malam khug: ra" mo; yang phug' myao: byid' rure qo" khae: yu: li" genae". Ailao" naonhaung" wa naonhaung" qo ca" ra" gu: qhid' mae" khag' rere: khug ngha ca" genae" mangad:.

¹³Mao:nhaung: qe we"- Myid: lao" khyo maqo" ra" mo, we' dakhyo:- naonhaung" makaug' genae" qhid' mae" ngonhaung" wa shid: byaug va" mo; khyo we' sin: yang: dangman" ra" khyo naonhaung" re ba nhao nug: ra".

¹⁴Yesu wa shid mung: dam: daui: to" li" rure ngonhaung" lam" ra". Airumung: Mao"So wa- Yesu re lam mung: shid: byaug: ra" mo, rere: Yesu we' daga" dam: tug' jhui" yu: li" nae" ga" rure ngonhaung" lam" ra".

¹⁵Ana" ngonhaung" naonhaung" re mho" shid' na: ru wa Asang: nho: mho" shid' dao: ngad: ra". Asang joe" li" ba na mae kao so' daui: na mo, ngonhaung" wa ai: shid: lo" byaug ko" ra" mo; qhid' khyo ze: ye: genae" mangad:-

¹⁶Amyin" byid' ra" hug' thoe- mug: lagyo" nho: thoe- Mao"So: labo" mad thoe thug' li"li" nae". Alao" Asang yao:- mug:gaung mae" gyo" li" li" nae"- Khristu re lam" mung: shid: lo" ko" ra" mo, wa sao qhid' dam: daui: to" li" genae".

¹⁷Ai: thao ai: ayo, mae kao so' daui: na: ra" mo, ngonhaung" wa mug: le; phyo: mae Asang we' jho" qhug' nae" qhid' mae" yao: bam we' daga" jham thaui: mae to' yu: ru qhug' nae" ngad:. Airumung ngonhaung" wa Asang we' daga" khonhae" re: qo" na: jo; li" nae".

¹⁸Airumung: ce: dao: jham: yang naonhaung" yao: cao: nhag' jho" tang" byid: ge,.