Read Maru 1THESALONI 5 Bible Online

1THESALONI 5 - Maru bible

1THESALONI 5

¹Mao:nhaung: qe we"- Asang joe" li" nae" ba na yo, khyin: khyo we' sin: yang: naonhaung" re tung" ke' maqo ngad: ra".

²Pe"mung:ga"re Asang: Ba Na wa myi" re khug' hab' li" ru we' dakhyo: joe" li" nae" ngad: rure naonhaung" yao: jhaug' za: ba: ako".

³Ja: khao: ngo" yaug yo cae: tae" ru we' gug: gug: za: ngad: ga: byu qe ta" au: qug: khai: gyaug ci" ru wa nyag din taung"- yao: bam: dao mae joe" li" nae". Aiwa gaung la" ra" myiqe: nyag din taung" zo:khau no no: li" ru we' dakhyo: joe" lo: li" nae". Byu jham wa qo" phao: loe, genae" mangad:.

⁴Ngadqere: mao:nhaung: qe we"- naonhaung" wa mug: cad' khug mae na mo, mangad: ko" ngad: ra". Amung: ai: ba na wa khug' hab' we' dakhyo: nyag din taung" naonhaung" jhao" joe" li" nae" mangad:.

⁵Naonhaung" alhab' mo, wa mug: bo" yao: zo: qe- na" nho: yao: zo: qe ngad: ako". Ngonhaung" wa myi" we' sin" ra" mo, re:- mug: cad' we' sin" ra" mo, re: mangad:.

⁶Airu: mung: ngonhaung" wa su gaje qe we' dakhyo: magyang: maso: yab: jo, nae" maang ngad: ra". Ngonhaung" wa gyang: gyang: za: so" na yang: lha" na qo: ra".

⁷Byu qe wa myi" re yab: myhid' ako". Yao: bam wa myi" re yhid yid: ako".

⁸Ngadqere: ngonhaung" wa na" we' sin" ra" mo, ngad: ra". Amung: ngonhaung" wa gyang: gyang: za: ngad qo: ra"- ngonhaung" wa lam khug: ru we' jhid'de; myid re qao nghoe' khyo" ve; ci mung: ngonhaung" nho: khyad' yu: ru qhug' nae" myid: lao" rure jo, to' maug we' dakhyo: zhaung" ci gelang:.

⁹Mao"So wa yao: nhag' yo" rure kham zo: geshao: ga:- ngonhaung" re khyin: san: yu: ru mangad:- ngonhaung" Asang Yesu Khristu khyo" yang khyad' yu: rure qo" sang: yu geshao: ga: khyin: san: to" ru ngad: ra".

¹⁰Yao: joe" li" ra" au: ngonhaung" wa daui: na ngadqere:- shid: jo, ngadqere: yao: we' daga" kao so' daui: na nae" qhid' mae" shid kham: byid' ra".

¹¹Airu: mung: naonhaung" ana" kad' na vako" ru we' dakhyo: naonhaung" yao: cao: qam: jho" byid:- jho" bao" thaug' byid: ge,.

¹²Ngonhaung" mao:nhaung: qe we"- naonhaung" phaung mae mau" zaui: mung: naonhaung" re khyoqhid' au: she: ra" mo, we' Khristan kao so' daui khyo re mho" shid' byid: ko" ra" mo, re naonhaung" phug' myao: genae" qhid' mae" ngonhaung" mho' ke' ra".

¹³Yao: bam zaui: so" ra" mathao mae yao: bam re myo: sho' phug' myao: byid: mung: jhid'de; na ge,. Naonhaung" yao: cao: jho" vang" yang: yaug yo za: na ge,.

¹⁴Mao:nhaung: qe we"- Mau" zaui: noe" mo, re ta" peim: ta" kyang: byid: ge,- gyaug hab' qere qam: byid: ge,- qam: nang: mo, re qam: byid: ge,- yaug khao: ngo" dao mae nhag' lam: qhang ge,.

¹⁵Khag' re: magai: rure magai: ruyang madam: phaug' byid: nae" qhid' mae" lha" ge,- yao: cao: we' byu alhab' mo; qhid' mae" gai: ra" lo, mau" zaui: so: nae" qhid' mae" khonhae" re: myid: qang: to: ge,.

¹⁶Khonhae" re: ngaui bau" na ge,.

¹⁷Mathang mano: akyu" mho' ge,

¹⁸boe" ra" ayaug: khao: ngo" mae jeju caung:khin" byid: ge,. Ceru wa Yesu Khristu we' dadang: dalam: za: doe, mung: naonhaung" kao so' daui: rumae" Mao"So o: ra" ru ngad: ra".

¹⁹Gyang" Lho" Byo myi: de; ru dase' pye' ge,.

²⁰Gyang" Lho" Byo vao: jaung" yang: ta" ra" mungdao: re maphug' makhyad' dakad' ge,.

²¹Ja: khao: ngo" re ca: qu" ge,

²²gai: ra" ja: re kham: yu phug' cao" mung: makhyang" ra" ja: alhab' re jao" pye' ge,.

²³Naonhaung" re ngaui pyo: yaug yo: ru byid' ra" Mao"So wa jab byang" sho' naonhaung" re gyang" lho" nhao vashao:- ngonhaung" Asang Yesu Khristu joe" li" ra" au: re naonhaung" byo alo zo: gaung khyao geim" re qobo vhin nae" mabo losho' lhaug' zam: byid: vashao:-

²⁴Naonhaung" re khai: yu: ra" yaug wa ai: mau" re kad' byid' li" nae". Pe"mung:ga"re yao: wa lam ga" kyid yaug ngad: ra".

²⁵Mao:nhaung: qe we"- ngonhaung" qhid' mae" re: akyu" bao" mho' byid: gela,.

²⁶Lam khug: ra" mao:nhaung: alhab' mo, re mao:nhaung: jhid'de; myid we' au" byid: gela,.

²⁷Ngo wa vhin tung" ce:rure lam khug: ra" mo, alhab' re nghe' kyo: genae" qhid' mae" Asang: yang byid' to" ra" kheim: so' khyo" yang naonhaung" re tung" jhan" ke' ra".

²⁸Ngonhaung" Asang Yesu Khristu nho: nhag' myan" ra" jeju wa naonhaung" we' daga" ngad: jo, vashao: wo".