Read Maru YOSHU 1 Bible Online

YOSHU 1 - Maru bible

YOSHU 1

¹ASANG: daui daui yaug Moshe shid: byaug thao re Moshe nho: bao" thaug' yaug ngad: ra" Nun nho: yauggai zo: Yoshu re ASANG dao: jhau: ra".

²ASANG wa- Nga" daui daui yaug Moshe wa shid: byaug va". Ana" nao we' Israel byu qe alhab' seim" jin" mung: ngo yao: bam re byid' na: ra" mung"dan: khyo Yodan gyaung: gau" de, yang: vao ye: ge,.

³Ngo Moshe re ta" ru we' dakhyo:- naonhaung" su" lai: ye: genae" ngad: ra" mung"dan: alhab' re ngo wa nao we' nga" byumyu" alhab' re byid: nae".

⁴Naonhaung" mug: kyo: jham wa mug: thao shad' din"pyad' yo mae" mug: am: shad' Lebanon bam jham joe" sho'- ba thug' shad' Uphrad gyaung: mo" mae"- Hiti mug: lai: phyid' lo" yang: ba vao shad' Mug:gaung: panglai: joe" sho' ngad: li" nae".

⁵Yoshu we"- nao kao so' adaui: na na wa khag' yang re: nao re maqo" aung: pye' genae". Ngo wa Moshe we' daga" na: lo: ru we' dakhyo: nao we' re: ngo daga" na nae". Ngo wa khonhae" re: nao we' daga" na nae". Khonhae" re: ngo nao re mashapye' nae".

⁶Myid: phyid' mung: vae" myid bo wa,- pe"mung:ga"re yao: bam: phug' pho" qere ngo dao:so: byid' to" ra" ai: mung"dan: re yao: bam yesang: yu: au:- nao wa ai: byumyu" qenho: au: jhaung ngad: li" nae".

⁷Za: myid: phyid' wa,- vae" myid bo wa,- nga" daui daui yaug Moshe nao re byid' ra" tarha" alhab' re nao phug' cao" wa,. Aimae" dadau rere: dalhai" pye'- nao khai: joe" joe" aung myaug nae".

⁸Nao caung:pa" rumae ai tarha" mugsug' re khonhae" re: nghe' wa,- airu re myi" re: na" re: nghe' zhao wa,- aimae tung" to" ru ja: khao: ngo" re gaigai yao: nao phug' cao" wa,. Ailao" nao wa na: dai mung: aung myaug nae".

⁹Nao myid: phyid' mung: vae" myid bo nae" qhid' mae" ngo nao re amyin" byid' to: va" rure myid: beim: wa,. Dagyaug wa nhag' dangai wa,. Pe"mung:ga"re ni" Mao"So ASANG ngo wa nao khai: ye: khai: nao we' daga" ngad: ra"- ga: ta" ra".

¹⁰Ailao" Yoshu wa au: jhaung qere jamu gam: sho' khyo ye: mung: amyu" byu qere- zo:ve seim" jin" ge,. Pe"mung:ga"re sam ba re naonhaung" wa naonhaung" Mao"So ASANG: yang byid' ra" mung"dan: re yesang: yu nae" qhid' mae" Yodan gyaung: re gau" de; ye: genae" ngad: ako"- ga: yeta" genae" qhid' mae" amyin" byid' ra".

¹²Yoshu wa Rubin amyu" kaung- Gad amyu" kaung we' Manashe amyu" kaung agaung: daqi" re-

¹³Naonhaung" yham mug: khyo" ce: mung"dan: mae Yodan gyaung: ba thug' shad' mug:myid re naonhaung" Mao"So ASANG naonhaung" re byid: nae" ga: ASANG: daui daui yaug Moshe khoru: ta" rure myid: beim: ge,.

¹⁴Naonhaung" yham sang myhi" qe- naonhaung" zo: dau qe- naonhaung" gug'nyhug' jham wa cemae thang: na genae" ngad: ra". Ngadqere: naonhaung" shae lhae cira" gyezo: qe wa- yao: bam: Israel mao:nhaung: qere bao" thaug' byid' nae" qhid' mae" yao: bam wa qhid' au: mae gau" de; ye: genae" ngad: ako".

¹⁵Ce: rure naonhaung" Mao"So ASANG: yang yao: bam re byid' to" ra" Yodan gyaung: ba vao shad' mug:myid re yao: qo" sang: yu yo, joe" sho' kad' genae" ngad: ra". Israel byumyu" kaung alhab' re gug: gam: rure ASANG yao: bam re byid: lao"- naonhaung" wa dam: tug' lo mung:- ASANG: daui daui yaug Moshe naonhaung" re byid' ra" Yodan gyaung: ba thug' shad' mae" ce: naonhaung" yao" mug:myid mae lote" na geri:- ga: ta" ra".

¹⁶Yao: bam wa Yoshu re- nao ngonhaung" re ta" va" gu: ja: khao: ngo" ngonhaung" kad' mung: nao ngonhaung" re khai: ye: nhao nhao ngonhaung" ye: nae".

¹⁷Moshe mho dao: re khonhae" re: ngonhaung" tae" gyo" lo: ru we' dakhyo:- ni" mho dao: re ngonhaung" tae" gyo: nae". Ni" Mao"So ASANG wa Moshe we' daga" na: lo: ru we' dakhyo: nao we' re: daga" na vashao: wo".

¹⁸Ni" kheim: so' re dao: myid: myid: yaug ni" amyin" dao: daja: ja: re maphug' cao" yaug khag' ngadqere: se' pye' ru qhug' li" nae" myid: phyid' mung: vae" myid bo wa,- ga: tau" ako".