Read Maru YOSHU 11 Bible Online

YOSHU 11 - Maru bible

YOSHU 11

¹Israel qenho: aung doe; ra" lau dao: Hazora Kho:kham Yabin the' gyo: lao" wa Madon Kho:kham Yobab- Shimron kho:kham- Aksha kho:kham we'

²Mug: am: shad' bam mug: khaung:- Galile tham: mug: thao shad' Yodan lao:khaung:- bam khyid khaung:- Do nhae mae" qid yae cao" yang: na ko" ra" kho:kham qere dao: pyang: ke' ra".

³Yao: wa Yodan gyaung: shid' shad' mae na ko" ra" Khanan byu qe ngad ko" ra" Amori byu- Hiti byu- Perizi byu- bam mug: mae" Yebusi byu- Mizpa mug: mae" Hermon bam khyid mae na ko" ra" Hivi byu qere re: dao: pyang: ke' ra".

⁴Yao: bam wa panglai: qid yae ma dam: mae" ma coe nho" myo" ra" gyezo: qe alhab' we' joe" li" ako". Yao: bam wa myao: jham we' gyekhe' myao: lhin" jham myo: sho' re: qo" ako".

⁵Ai: kho:kham alhab' wa gyetab qhan: mung: daga" zang" ham mung: Israel byu qere gyekhe' nae" Merom gyaug: zo: mae jamu kad' yang: na: jo; ako".

⁶ASANG wa Yoshu re- aibam re dagyaug wa,- ne, mo" ba ce: ayo, mae- ngo wa Israel qhid' mae" aibam alhab' mo, re se' pye' byid: nae". Nao wa yao: bam: myao: jham re khyid qam" khyug' mung: yao: bam: gyekhe' myao: lhin" jham re ngha" pye' li" nae".

⁷Airumung: Yoshu we' yao" byu qe alhab' wa Merom gyaung: zo: mae nyag din taung" yao: bam re gye yezin" ako".

⁸ASANG wa Israel byu qere ai bam re aung: pye' nhao: ra". Israel byu qe wa aibam re gyekhe' zin: mung: mug: am: shad' Misrephod Maim we' Sidon vha" joe" sho'- amung: ba thug' shad' Mizpa lao:khaung: joe" sho'- cao" khe' zin" ako". Gye khe' ru wa gyevo qe khag' re: madang losho' xo' khe' ako".

⁹Yoshu wa ASANG: yang amyin" byid' to" rure kad' ra". Yao: wa yao: bam: myao: jham re khyid qam" khyug' mung: yao: bam: gyekhe' myao: lhin" jham re ngha" pye' ra".

¹⁰Ai: thao Yoshu wa tug' phao mung: Hazora re losang: pye' mung: ai: kho:kham re se' pye' ra". (Ai: pyad mae Hazora wa ai: kho:kham mung"dan: jham alhab mae- qam bo: thao" ru ngad: ra".)

¹¹Yao: bam wa aimae yaug khao: ngo" re se' pye' ako". Dayaug re: madang ngad: ra" vogaung: re wa ngha" pye' ako".

¹²Yoshu wa ai: vogaung: alhab' we' kho:kham qere aung: pye' mung: ASANG: daui daui yaug- Moshe amyin" byid' to" ru we' dakhyo: yaug khao: ngo" re se' pye' ra".

¹³Ngadqere: Israel byu qe wa Yoshu ngha" pye ra" Hazora vogaung: mae" je yang: myid bam" dao mae zao: to" ra" vogaung: dalam: rere: mangha" pye' ngad: ako".

¹⁴Israel byu qe wa phug' de; ja: alhab'- ai: vogaung: mae" gug'nyhug' alhab' re yao: bam yao" qhid' mae" sang: yu: ako". Ngadqere: byu yaug khao: ngo" re wa se' pye' ako"- dayaug re: madang ngad: ra".

¹⁵ASANG wa Yao" amyin" dao: jham re yao" daui daui yaug Moshe re byid' to: mung:- Moshe wa Yoshu re byid' ra". Yoshu wa aijham re phug' cao" ra". Yao: wa ASANG: yang Moshe re amyin" byid' to" ru ja: khao: ngo" re cao" kad' ra".

¹⁶Yoshu wa bam mug:- bam khyid jao: dae- mug: am:- mug: thao shad'- Goshen mug:myid alhab' we' ainho: mug: thao shad' mug: kyaug'- Yodan lao: khaung: joe" sho' mug:myid alhab' re khe' aung: pye' ra".

¹⁷Mug: thao shad' Edom nhae mae jo, ra" Halag bam mae"- mug: am: shad' Bala- Gad joe" sho'- Hermon bam: mug: thao shad' Lebanon lao:khaung: joe" sho' lu: ra". Yoshu wa ce: mug:myid mae" kho:kham qe we' ayo, myao" sho' gye jho" khe' ako". Ngadqere: yao: wa ai bam alhab' mo, re khe' aung: pye' mung: ai bam re se' pye' ra".

¹⁹Israel byu qe we' mang: dae khyo kad' ra" vogaung: wa Hivi byu qe daqhae: na ko" ra" Gibeon vogaung: dalam: za: ngad: ra". Gatau alhab' re wa gye poe mae aung: yu: ru ngad: ra".

²⁰ASANG wa yao: bam re Israel byu qere gyekhe' nae" nhag' lam: qam: ke' byid' ra". Airumung: yao: bam bin sho' phyo' qheim" pye' mung: nhag' khyag' myid mabo lo: alhab' se' pye' qhug' nae" dao: phyid' ru qhug' ako". Ceru wa ASANG: yang Moshe re amyin" byid' to" ru ngad: ra".

²¹Ai: yo, mae Yoshu wa ye: mung: bam mug: khaung: ngad: ra" Hebron- Debi- Anab- we' Yuda we' Israel mae" bam mug: khaung: geim" mae na ko" ra" Anakim ga: mhang" ra" byuqi: myu" rere: se' tam" pye' ra". Yoshu wa ai bam re bin sho' se' tam" pye' mung: yao: bam: vogaung: jham re phyo' pye' byid' ra".

²²Israel mung" mae Anakim qe dayaug re: mana loko" ngad: ra". Ngadqere: Gaza- Gat we' Ashdod mae dajhid' zo: na: dang: jo, ashiko".

²³ASANG: yang Moshe re amyin" byid' to" ru we' dakhyo: Yoshu wa mung"dan: geim" re sang: yu: pye' ra". Yoshu wa ai: mung" re damyu" re damung" mung" yao: bam: mug:myid khyo" byid: mung: byu re cao" yang: kho' byid' ra". Aimung: amyu" byu qe wa gyekhe' rure thang: na: ako".