Read Maru YOSHU 20 Bible Online

YOSHU 20 - Maru bible

YOSHU 20

¹Ai: thao ASANG wa Israel byu qere- naonhaung" re ta" kyo: nae" Moshe re ngo amyin" byid' ra" phao: khug vomo" jham re khyin ge,.

³Thaug makad' lo: byu dayaug yaug re se' ra" yaug wa ai: khyo ye: mung: lage, phaug' nae" qho: qin" ra" yaug: lo, mae" phao: loe, nae" ngad: ra".

⁴Yao: wa ai: vogaung: jham mae" davo khyo tao" phao: ye: mung: vogaung: kham: mae" dao: kho' ra" jo, qo khyo ye: yang: boe" ra" khyo ai: au: jhaung re yesho' kyo: nae" ngad: ra". Ailao" yao: bam wa yao: re vogaung: khug khyo vao nhao mung:- yao: aimae qo" na nae" qhid' mae" yao: re jo, qo byid' li" genae".

⁵Lage, phaug' ra" yaug aikhyo yao: cao" li" yang: ngad: re- ai: vobyu qe wa yao: re aiyaug: lo, khyo magai: ab byid: ngad: ra". Yao: bam wa yao: re gug: gam byid: ca" ako". Pe"mung:ga"re aiyaug wa thaug kad' yang: re:- nhag' yo: yang: se' ru mangad: ngad: ra".

⁶Yao: wa ai: vogaung: mae" mo, phaung mae myid' ca: qu" ru qhug' yo, joe" sho' re:- ai ayo, mae Khinjaung kad' ra" yo, joe" sho' re: ai: vogaung: mae gai: na: jo; ra". Ai: thao byu aiyaug wa yao: phao: li" ra" yao" vogaung: khyo gai: dam: tug' lo" ra"- ga: ta" nae" qhid' mae" Yoshu re ta" ra".

⁷Airumung: yao: bam wa Yodan ba vao shad' Nabhtali bam mug: mae" Galile mae" Kade- Ephrim bam mug: mae jo, ra" Shekhem we' Yuda bam mug: mae jo, ra" Hebron vo jham re gatau khyin: to" ako".

⁸Yodan gyaung: ba thug' shad'- Yerikho ba thug' shad' bug gaung jao: dae din"pyad' yo mae"- Rubin amyu" nho: mug:myid mae jo, ra" Beze vogaung:- Gad mug:myid mae Gilead mung" mae" Ramod- Manashe nho: mug:myid Bashan mung" mae" Golan vogaung: jham re khyin: yu: ako".

⁹Ce: vogaung: jham wa Israel byu qe alhab' we' yao: bam: phaung mae na: ra" taung bug byu khag' qhid' mae" re: phao: khug vogaung: khyin: to" ru ngad: ra". Byu dayaug re thaug makad' lo: se' ra" yaug khag' ngadqere: lage, phaug' nae" qho: lhau: ra" yaug: lo, mae" ai: vogaung: mae gug: gam: ru gai: qo" yu: ra". Yao: wa mo, phaung mae myid' ca: qu" ru shi" sao qhid' maqhug' lo: magai: se' pye' ngad: ra".