Read Maru YOSHU 22 Bible Online

YOSHU 22 - Maru bible

YOSHU 22

¹Ai: thao Yoshu wa Rubin- Gad- ba thug' shad' mae Manashe amyu" qere khai: zhang" yu: ra".

²Yao: wa aibam re- naonhaung" wa ASANG: daui daui yaug Moshe yang naonhaung" re amyin" byid' ra" gu: ja: khao: ngo" re bin kad' avako". Amung: nga" amyin" dao: alhab' rere: naonhaung" phug' cao" avako".

³Naonhaung" wa cemyhao" joe" sho'- naonhaung" Israel mao:nhaung: qere qo: ra" au: khao: ngo" bao" thaug' byid' lo: avako". Naonhaung" Mao"So ASANG: amyin" dao: jham rere: gelho: za: naonhaung" phug' cao" avako".

⁴Ana"- yao: dao:so: to" ru we' dakhyo:- naonhaung" Mao"So ASANG wa naonhaung" Israel mao:nhaung: qere ngaui pyo: yaug yo: ru byid' to" ava". Airumung: ASANG: daui daui yaug Moshe yang naonhaung" re byid' ra" Yodan gyaung: ba thug' shad' mae" naonhaung: yao" mug:myid ga: ta" sang: yu: ra" yham mug: khyo phao: lo" ge,.

⁵Moshe yang naonhaung" re byid' to" ra" tarha" re phug' cao" nae" beim: ge,- naonhaung" Mao"So ASANG re jhid'de; mung:- yao" myid o: rure cao" ge,- yao: re jhaug' zhaug mung: naonhaung" aung khug nhag' lam: alhab' we' kao so' alhab' yang yao: re caung da" ge,- ga: ta" ra".

⁶Yoshu wa yao" shaman" dao: we' ceru: ga: pyang yang aibam re yham phao nhao: ke' ra". Yao: bam re naonhaung" wa lanyab gug'nyhug' myo: sho' we'- ngaui- qhang- gyid:- jo, to' we' mai bau: jham jo,nho" gyai qo" yang: yham phao: lo" ako". Naonhaung" nho: gyevo qemae" sham" yu: ra" zai re naonhaung" amyu" mao:nhaung: qere gae byid: ge,- ga: ta" ke' ra". Ai: thao yao: bam wa yham khyo phao: lo" ako". Moshe wa Yodan gyaung: ba thug' shad' mae" mug:myid re Manashe amyu" agaung: daqi" re byid' to" ra". Ngadqere: gatau agaung: daqi" gu: re wa Yoshu yang gatau: amyu" qe we' daga" Yodan gyaung: ba vao shad' mug:myid re byid' ra".

⁷

⁸

⁹Ailao"- Rubin- Gad ba thug' shad' mae" Manashe amyu" kaung qe wa yham phao: lo" ako". Dang: ra" Israel byu qere Khanan mung" Shilo mae to: co' mung:- Moshe nhad' khyo" yao: bam re ASANG: yang amyin" byid' to" ru we' dakhyo: yao: bam yu: to" ra" Gilead mung" yao: bam yao" mug: khyo to" lo" ako".

¹⁰Rubin- Gad we' ba thug' shad' Manashe amyu" byu qe wa Yodan gyaung: nhae mae jo; ra" Gelilod khyo joe" lo gelao"- yao: bam wa qid yae mae qi" ru we' nhag' taui: tho' ra" phan dalam: zao: ako".

¹¹Dang: ra" Israel amyu" byu qere- Rubin- Gad- ba thug' shad' Manashe amyu" byu qe Yodan gyaung: cete' yao: bam: shad' mae" mug:myid mae" Gililot mae phan dalam: zao: avako"- ga" rure the' gyo" ako".

¹²Israel byu qe cere the' gyo: gelao"- ba thug' shad' mae" amyu" byu qere gyekhe' nae" qhid' mae" mo, phung: geim" Shilo khyo zang" ye" ako".

¹³Ai: thao Israel byu qe wa khinjaung Eleaza nho: yauggai zo: Phineha re Gilead mung" mae na ko" ra" Rubin- Gad- ba thug' shad' Manashe amyu" byu qejhao" nhao: ke' ako".

¹⁴Au: jhaung alhab' daxe: byid yaug cao: ye" ako". Phineha we' daga" ba vao shad' amyu" damyu" mae" dayaug we' amyu" kaung qe: phaung mae" au: jhaung dayaug yaug- au: jhaung daxe yaug bocao: ye" ako".

¹⁵Yao: bam Gilead mung" khyo Rubin- Gad- ba thug' shad' mae" Manashe amyu" byu qejhao" joe" lo gemung:-

¹⁶Yao: bam wa ASANG: mo,byu phung: geim" qhid' mae" (gaung tha") aibam re- naonhaung" pe"mung: Israel nho: Mao"So re gye kad' ra" ce: makhyang" ra" mau" re kad' vako" i? Naonhaung" yao" qhid' mae" ce: phan re zao ko" ra" khyo" yang ASANG re gye kad' geim lau to" avako". Naonhaung" wa yao" thao macao" loko" ngad: ra".

¹⁷ASANG wa yao" amyu" byu qere qam" no gyo" nhao yang: qobo dae byid' au: mae" Peora mae ngonhaung" shad' ra" qobo re myid: beim: ge,- ngonhaung" ana" ba joe" sho' ai: mathao mae qug: khai: dayin dayo: kham zo" na shi"- ai: qobo maga" shi ge, i?

¹⁸Ana" naonhaung" wa yao" thao cao" nae" ha: pye' nae" ein: ko" i? Ana" ba naonhaung" ASANG re tau: lhan: gye kad' yang: ngad: re wa yao: wa ne, mo" ba Israel byu yaug khao: ngo" re nhag' yo" li" nae".

¹⁹Aimung:- ana" naonhaung" mug:myid wa caung:pa" nae" madau ma- ang yang: ngad re yao" Zaung jo; ra" ASANG: mug:myid khyo li" lo geri:- ngonhaung" phaung mae mug:myid daqhae: lomho' gela,- ngadqere: ngonhaung" Mao"So ASANG: phan mae- phan dalam: kad' laung" ra" khyo" ASANG re tau: lhan: gye dakad' ge,- mangad: lao"- ngonhaung" re tau: lhan: gye dakad' ge,.

²⁰Phyo' qheim" pye' nae" dao: phyid' to" ra" zai: jham: khyo we' sin: yang: amyin" byid' ra" dao: re matae" gyo: ha: pye' ra" Zera nho: yauggai zo: Akhan khoru: boe" rure myid: beim: ge,. Ai: mathao mae Israel byu phung: geim" qobo dae byid' ru qhug' ako". Akhan wa yao" qobo mathao mae yao: dayaug za: mashid ngad: ra"- ga: ta" ako".

²¹Ailao"- Rubin- Gad- ba thug' shad' mae" Manashe amyu" byu qe wa ba vao shad' mae" amyu" yham khaung qenho: au: jhaung qere-

²²Qam: bo: thao" ra" yaug wa Mao"So ngad: ra". Yao: wa ASANG ngad: ra". Qam: bo: thao" ra" yaug wa Mao"So ngad: ra". Yao: wa ASANG ngad: ra". Yao: ceru: pe"mung: kad' lai: lo: rure yao: ba: ra". Aimung: naonhaung" rere: ngonhaung" ba nhao nug: ra". Ngonhaung" yao: tau: lhan: mung: ASANG re lam: khug: ra" lam khug: myid re macao" yang: ngad: re ngonhaung" re dadaui: na nhao lo: gela,-

²³ASANG re ngonhaung" mho dao: magyo: mung:- ai: dao mae ngaui" xeim: phad' ngaui" nae"- mangad: lao" gaug zo ngaui" xeim: ngaui" byid: nae"- zam" khug: ra" ngaui xeim: jham re phad' ngaui" byid nae" qhid' mae" ngonhaung" yao" phan re kad' yang: ngad: re wa- ASANG yao: yao: ngonhaung" re qobo dae byid: vashao:-

²⁴Airu: mangad: lhe"- naonhaung" myid:zo: qe wa ngonhaung" myid:zo: qere Israel nho: Mao"So ASANG we' naonhaung" pe" sin: ko" i?

²⁵ASANG wa ngonhaung" we' naonhaung" Rubin- Gad byu qere agyo: mae Yodan gyaung: re mug: kyo: kad' to" ra". ASANG we' naonhaung" pe" masin: ko" i? ga: ta" li" genae" rure ngonhaung" gyaug yang: kad' ru ngad: ra". Amung: naonhaung" myid:zo: qe wa ngonhaung" nho: myid:zo: qe ASANG re caung:pa" rure gai: tam" pye' ako".

²⁶Airumung: ngonhaung" phan dalam: kad' va" ai wa ngaui" xeim: phad' ngaui" nae" we'- xeim: ngaui" byid: nae" qhid' mae" mangad:-

²⁷Ai: atha"- ngonhaung" amyu" we' naonhaung" amyu" qe: qhid' mae" re: sagse: khyo" ngad mung:- ngonhaung" thao mae" qae: qe: qhid' mae" re: ngonhaung" xeim: jham ngaui" xeim: phad' ngaui" ru jham- zam" khug: ra" xeim: jham re ngaui" byid: mung: dang za: yao" gyang" lho" Zaung qhid' kheim: mae ASANG re caung:pa" nae" ga" ra" sagse ngad: ra". Ceru wa ASANG we' ngonhaung" myid:zo: qe pe" masin: ga: naonhaung" myid:zo: qe mata" genae" qhid' mae" kad' ru ngad:.

²⁸Ceru: boe" yang: ngad: re ngonhaung" myid:zo: qe wa- qu" ge,- ngonhaung" phug' pho" qe wa ASANG: phan we' dau: ru phan dalam: kad' to" ako"- ga: qo" ta" genae" qhid' mae" ngonhaung" myid: thug' yang: kad' ru ngad:- aiwa xeim: phad" ngaui" nae" we' xeim: ngaui byid: nae" qhid' mae" kad' ru mangad:- ngonhaung" amyu" we' naonhaung" amyu" qe: qhid' mae" aso: khyo" kad' ru ngad.

²⁹Ngonhaung" wa ai: dao mae xeim: phad' ngaui" nae"- gaug zo xeim:- ngaui xeim: ngaui" byid: nae" phan re kad' ra" khyo" yang dang yao: ASANG re tau: lhan: gye kad' ru- ana" yao" thao cao" rure thang: pye' ru mangad:- ngonhaung" wa yao" qhid' kheim: Zaung qhid' au: mae ye; jo; ra" ngonhaung" Mao"So ASANG: phan mae" je yang: phan pe" gatau dalam: rere: makad' nug- ga: tau" ako".

³⁰Khinjaung Phineha we' yao: we' daga" bocao ko" ra" byu phung" nho: au: jhaung daxe yaug- ba vao shad' amyu" qenho: yham khaung qe: au: jhaung qe wa Rubin- Gad- ba thug' shad' mae" Manashe amyu" qe ta" ko" ra" dao: re gyo: gemung: yao: bam nhag' gyo" dag: ako".

³¹Khinjaung Eleaza nho: yauggai zo: Phineha wa yao: bam re- ana" ASANG ngonhaung" we' daga" na: rure ngonhaung" ba va". Naonhaung" yao: re tau: lhan: gye kad' ru mangad: genhaung- aimung: naonhaung" wa Israel byu qere ASANG: qobo dae mae" khyad' yu vagenhaung -ga: ta" ra".

³²Ailao" Phineha wa au: jhaung qe wa Rubin- Gad amyu" qere Gilead mung" mae nha: to: co' mung: Khanan mung" khyo Israel byu qejhao" tug' phao: lo mung: yao: bam re lau lokyo" ako".

³³Israel byu qe wa nhag' gyo" dag gemung: Mao"So re caung:khin" ako". Rubin we' Gad amyu" qe: te" na ko" ra" mug:myid re phyo' qheim" pye' nae" gyekhe' nae" khyo we' sin: yang: yao: bam mata" loko" ngad: ra".

³⁴Rubin we' Gad amyu" qe wa- ce: phan wa Mao"So wa ASANG ngad: ra" khyo ngonhaung" alhab' qhid' mae" sagse: ngad: ra"- ga: ta" ako". Airumung: yao: bam wa aire sagse: ga: mhang" ako".