Read Maru YOSHU 4 Bible Online

YOSHU 4 - Maru bible

YOSHU 4

¹Amyu" byu qe alhab' Yodan gyaung: re bin: lai: de; ye: gelao" ASANG wa Yoshu re-

²Amyu" kaung dalam: mae" dayaug yaug- byu daxe: shid' yaug re khyin: yu mung:-

³Yao: bam re- Yodan gyaung: qid gaung:- khinjaung qe ye; lai: lo ko" ra" jo, qo mae" yao: laug zang daxe: shid' zang re gaug: yu genae" qhid' mae" amyin" byid: wa,- ai: laug zang jham re vo, mung: ana" myi jamu kad' nae" jo, qo mae bam: to: genae" qhid' mae" yao: bam re ta" wa,- ga: ta" ra".

⁴Ai: thao Yoshu wa yao: khyin: to" ra" byu daxe: shid' yaug re khai: yu mung:-

⁵Naonhaung" Mao"So ASANG: Dao: Thang" Ban" qhid' au: mae Yodan gyaung: khyo ye" lo" ge,. Naonhaung" yaug khao: ngo"- Israel amyu" kaung dalam" qhid' mae" laug zang dazang naonhaung" lo, sin mae yegaug: vo; lo: ge,.

⁶Ai: laug zang jham wa ASANG pe" kad' lai: lo: ra" khyo amyu" byu qere beim: nhao: li" nae". Joe" lo nae" ayo, mae naonhaung" myid:zo: qe ai: laug zang jham: lajheim: re myid: gelao"-

⁷Naonhaung" wa yao: bam re- ASANG: Dao: Thang" Ban" qid gyaung: re gau" de; ye" lo" au:- Yodan qid wa yug: ru thang: lo" byaug: ra" khyo re ta" kyo" li" genae". Ce: laug zang jham wa cetau mae pe" boe" lo: ra" khyo re Israel byu qere peim: byid' li" nae"- ga: ta" ra".

⁸Aibam re: Yoshu nho: amyin" re phug' cao" ako". ASANG: yang Yoshu re amyin" byid' to" ru we' dakhyo:- yao: bam wa amyu" kaung dakaung qhid' mae" dazang zang Yodan gyaung: qid gaung: mae" laug zang daxe: shid' zang re gaug: yu mung: aijham re jamu kad' na: ra" jo, qo khyo vo; lo mung: aimae lokhyo" to" ako".

⁹Yoshu wa khinjaung qe Dao: Thang" Ban" re vo, yang: ye; lai: lo ko" ra" Yodan gyaung: qid gaung: mae re: laug zang daxe: shid' zang re zao: ra". (Ai: laug zang jham wa ana" ba joe" sho' aimae jo; bam: ashi".)

¹⁰Khinjaung qe wa amyu" byu qe kad' genae" qhid' mae" ASANG: yang Yoshu re amyin" byid' ra" gu: ja: khao: ngo" bin: kad' sho' Yodan gyaung: qid gaung: mae ye; jo; ako". Ceru wa Moshe byid' ra" amyin" ngad: ra". Amyu" byu qe wa qid gyaung: re hin hin gau" de; ako".

¹¹Yao: bam alhab' mo, thoete' khyo bin: gau" de, gelao"- ASANG: Dao: Thang" Ban" wa khinjaung qe we' daga" amyu" byu qe: qhid' au: mae ye" lo" ra".

¹²Rubin amyu" kaung- Gad we' Manashe kaung agaung: daqi" gu: wa Moshe yang yao: bam kad' nae" ta" to" ru we' dakhyo: gyekhe' poe qhid' mae" jin" jin" kad' ci yang: dang: ra" amyu" byu qe: qhid' au: mae de; ye" ako".

¹³ASANG: qhid' kheim: mae gyekhe' poe qhid' mae" jin" jin" ngad ko" va" byu byid tug ko wa Yerikho nhae mae" pa:din" ang ang de; ye" ako".

¹⁴Aiba mae ASANG kad' ra" mau" wa Israel byu qere Yoshu re byuqi: dayaug khyo" myid: jho: yu nhao: ra". Yao: bam wa Moshe re nga: yhe' byid: ko" ru we' dakhyo: yao" apyad geim" yao: re nga: yhe' byid' ako".

¹⁵Ai: thao ASANG wa Yoshu re- Dao: Thang" Ban" vo; ra" khinjaung qe Yodan gyaung: mae" thug' lo genae" qhid' mae" amyin" byid: nae" ta" ra".

¹⁷Yoshu wa airu: kad' ra".

¹⁸Amung: khinjaung qe qid yae khyo joe" lo gelao"- qid gyaung: wa dam: yug: li" mung: qid yae byang" sho' do, li" ra".

¹⁹Amyu" byu qe wa Yodan gyaung: re lho" sao qhid' khye' daxe ba ein: ba mae gau" de, mung: Yerikho ba thug' shad' Gigala mae jamu kad' na: ako".

²⁰Aitau mae Yoshu wa Yodan gyaung: mae" gaug: to" ra" laug zang daxe: shid' zang re zao: ra".

²¹Yao: wa Israel byu qere- joe" lo nae" ayo, mae naonhaung" myid:zo: qe ce: laug zang daxe: shid' zang: nho: lajheim: re myid: gelao"-

²²Naonhaung" wa yao: bam re Israel byu qe Yodan gyaung: re myid ho yo mae gau" de; ra" au: mae" khyo re ta" kyo" li" genae".

²³Tham: Ne re ngonhaung" qhid' mae" kin" ho: lo" nhao byid' ru we' dakhyo:- naonhaung" bin: gau" de, sho' Yodan gyaung: re naonhaung" qhid' mae" naonhaung" Mao"So ASANG: yang kyaug' ho: lo" nhao: ra" khyo yao: bam re ta" kyo: ge,.

²⁴Ce: mathao mae myidgaung dao mae" yaug khao: ngo" wa ASANG: qam: so' khoqhi" qi" qhang: rure ba: li" genae". Aimung: naonhaung" wa naonhaung" Mao"So ASANG re apyad ato mae nga: yhe' byid' li" genae"- ga: ta" ra".