Read Maru YOSHU 5 Bible Online

YOSHU 5 - Maru bible

YOSHU 5

¹Yodan gyaung: ba vao shad' mae" Amori kho:kham alhab' we' Mug:gaung: panglai: cao" mae" Khanan kho:kham alhab' wa Israel byu qe bin: de, ye: sho' Yodan gyaung: re ASANG: yang kin" ho: lo" byaug nhao: ra" ga" rure the' gyo" ako". Yao: bam gyaug mung: Israel byu qe: mathao mae yao: bam: lhe: myid baui" byaug: ako".

²Ai: thao ASANG wa Yoshu re- be, laug mae" shae tho: kad' yu mung: Israel byu qere au: qid lhai: khyo kad' byid: wa,- ga: ta" ra".

³Airumung: Yoshu wa ASANG amyin" byid' to" ru we' dakhyo: kad' ra". Yao: wa au: qid lhai: bug gaung ga: mhang" ra" jo, qo mae Israel byu qere au: qid lhai: khyo kad' byid' ra".

⁴Israel byu qe Egutu mung" mae" to" lo" ko" au: yauggai alhab' mo, au: qid lhai: gau ngad: ako". Ngadqere: amyu" byu qe din"pyad' yo mae su" lai: lo ko" ra" byid xe zin gyo: gu: mae yauggai nau" dayaug re: au: qid lhai: khyo makad' ko" ngad: ra". Ai: ayo, gan: lo" au:- yao: bam Egutu mung" mae" to" lo ko" ra" yo, mae gyekhe' qae: ngad mo, yauggai alhab' re: yao: bam ASANG re mho dao: magyo: ko" ruyang shid: byaug: ako". Yao: jham tang" to" ru we' dakhyo: yao: bam: phug' pho" qere byid: nae" dao:so: byid" to' ra" mug: gai myid gai re the' myao nae" akhang" yao: bam re mabyid: ngad: ra".

⁷Cebam: nho: yauggai zo: qere wa khonhae" re: au: qid lhai: khyo makad' ngad: ako". Ce: byuqae: asag' re Yoshu au: qid lhai: khyo kad' byid' ru ngad: ra".

⁸Au: qid lhai: khyo re jab sho' bin: kad' gethao- dae jham gai sho' byumyu" geim" jamu mae thang: na: jo; ako".

⁹ASANG wa Yoshu re ana" ba ngo wa Egutu mung" mae jeim doe, ra" aqho' aqhid re naonhaung" mae" yu: pye' va"- ga: ta" ra". Ai: mathao mae ai: jo, qo re Gilgala ga: mhang" ako". Ai: mang wa ana" joe" sho' jo; jo; ashi".

¹⁰Israel byu qe Yerikho nhae mae" pa:din" mae" Gilgala jo, qo mae jamu kad' na ko" ra" ayo, gyo: mae yao: bam wa ai: lho" khye'- daxe: byid ba: ba myi" thao re Lai co' Poe kad' ako".

¹¹Thao: ba mae Khanan mung" mae qho" ra" gaug shin: we' man" mabo: ra" mug re yao: bam sao qhid' lhang zo" ako".

¹²Ailao" Manna gyo" ru thang: lo" byaug mung: Israel byu qe mathe' zo: loko" ngad: ra". Ai: ayo, mae" yao: bam wa Khanan mung" mae yaug: ra" zo:ve re zo" ako".

¹³Yoshu Yerikho nhae mae na: jo; au: yao: wa nyag din taung" yao" qhid' kheim: mae shae pyang: ci yang: byu dayaug ye; jo; rure myao: ra". Yoshu wa yao: jhao" te' ye: mung:- nao wa ngonhaung" gyezo: qemae" dayaug ngad: i? Gyevo ngad: i? ga: myid' ra".

¹⁴Byu aiyaug wa shid' ja" geim" mangad:- ngo wa cemae ASANG: gyetab mae" gyezug: dayaug khyo" na: jo; ru ngad: ga: tau" ra". Yoshu wa yao: yao" gaung re myidgaung khyo goe; gyo" caung:pa" mung: ASANG we"- ngo wa ni" daui daui yaug ngad:- nao ngore pe" kad' nhao nug: i? ga: ta" ra".

¹⁵ASANG: gyetab mae" zug: pho" wa yao: re- ni" khyid zhaung: khyad' pye' wa,- nao wa gyang" lho" ra" myidgaung mae ye; jo; ra"- ga: ta" ra". Yoshu wa yao: re ta" ru we' dakhyo: kad' ra".