Read Maru YOSHU 6 Bible Online

YOSHU 6 - Maru bible

YOSHU 6

¹Yerikho vogaung: kham: dung: jham wa pyid' to: mung: Israel byu qe maphao: thug' lo" sho' zaung" to" ako". Vomo" re vao vao thug' thug' khag' magai: kad' ngad: ra".

²ASANG wa Yoshu re ngo wa Yerikho vogaung: re yao" kho:kham we' yao" sulhe: gyezo: qe alhab' we' daga" ni" lo, mae ke' byid' ra".

³Nao we' ni" gyezo: qe wa ai: vomo" re daba re dalhang lhang su" lhang" mung: airu: khyaug' ba kad' genae" ngad: ako".

⁴Labo" dayaug dalam: ci: ra" khinjaung nhad' yaug wa Dao: Thang" Ban" qhid' au: mae ye: ca" genae" ngad: ako". Nhad' ba ein: ba re nao we' ni" gyezo: qe wa khinjaung qe labo" jham re mad: na ko" au: ai: vomo" re nhad' lhang su" lhang" qin" genae"- ngad: ra".

⁵Ai: thao re yao: bam wa dathoe za: qhang sho' mad genae" ngad: ako". Naonhaung" ai: thoe re the' gyo: we' yauggai alhab' mo, wa thoe qi we' hug' mung: vomo" vang jham wa gyang: gyoe; lo" li" genae". Ai: thao re gyetab geim" wa din: za: vomo" khug khyo khe' vao ye" lo" li" genae".

⁶Yoshu wa khinjaung qere khai: yu mung: yao: bam re ai: Dao: Thang" Ban" re yu: vo, ge, aimung: naonhaung" mae" nhad' yaug wa ai nho: qhid' au: mae labo" jham ci yang: ye" lo" ge,- ga: ta" ra".

⁷Ai: thao yao: wa yao" byu qere ASANG: Dao: Thang" Ban" qhid' au: mae qhid' mae su" ra" gug: gam qe bobo mung: ai: vomo" re su" lhang" qhid: lo" genae" qhid' mae" amyin" byid' ra".

⁸Aimung: Yoshu amyin" byid' ru we' dakhyo: qhid' mae su" ra" gug: gam qe wa labo" mad: na ko" ra" khinjaung qe: qhid' au: mae to" lo" ako". Aibam: thao re Dao: Thang" Ban" vo, ko" ra" khinjaung qe cao" ye: mung: thao mae nhaung thao" mae su" ra" gug: gam qe cao" ye" lo" ako". Ceru: lhang: na: ra" ayo, geim" mae labo" mad: myhang" nae" ngad: ako".

¹⁰Ngadqere: Yoshu wa yao" byu qere yao: amyin" mabyid: byid: wa mahug' genae" we' thoe dathoe re: mathug' genae" qhid' mae" amyin" byid' to" ra".

¹¹Aimung: yao: wa ce: byuphung: re ASANG: Dao: Thang" Ban" re vo, yang: vomo" re dalhang su" gam: genae" qhid' mae" ta" ra". Ai: thao re yao: bam wa jamu khyo tug' phao: lo mung: damyi lona: ako".

¹²Yoshu wa thao: ba ne, seim no' to" ra". Amung: khinjaung qe we' gyezo: qe wa qhid' ba we' dakhyo: sao qhid' mae- qhid' mae su" ra" gug: gam qe- ai:thao labo" nhad' lam: mad: na: ko" ra" khinjaung nhad' yaug- ai:thao ASANG: Dao: Thang" Ban" vo, ko" ra" khinjaung qe- lo" thao" mae nhaung thao" mae su" ra" gug: gam qe jo, qo yu mung: shid' lhang ein: lhang ai: vomo" re su" lhang" ako". Ceru: lhang: na: ra" ayo, geim" mae labo" mad: myhang" nae" ngad: ako".

¹⁴Ce: shid' ba ein: ba mae re: yao: bam wa vomo" re dalhang dam: su" lhang" mung: jamu khyo phao lo: ako". Airu: khyaug' ba joe" sho' kad' ako".

¹⁵Nhad' ba ein: ba mae yao: bam wa mug: bo" lao" to" mung: ganhae" we' dakhyo: za:- vomo" re nhad' lhang su" lhang" ako". Ceba mae za: nhad' lhang su" lhang" ako".

¹⁶Nhad' lhang: lhang khinjaung qe labo" mad nae" seim" gelao" Yoshu wa yao" byu qere hug' genae" amyin" byid: mung:- yao: wa ASANG wa vomo" re naonhaung" re byid' to" ava"- ga: ta" ra".

¹⁷Vomo" we' aimae" ja: khao: ngo" re ASANG re qhaug' byid' ra" xeim: khyo" alhab' bin sho' phyo' qheim" pye' ca". Shava myhi" Rahab we' yao" yham byu qere za: tang" to: nae" ngad: ra". Pe"mung:ga"re yao: wa ngonhaung" nho: jin" byu qere nyham: byid' ra".

¹⁸Naonhaung" kam" wa ai: phyo' qheim" pye' ca" ra" ja: pe" ja: rere: magai: yu genae". Naonhaung" yu gelao" qug: khai: we' byo; qeim: ru Israel byu qenho: jamu khyo cilo: li" genae".

¹⁹Ngaui: yang- qhang: yang- gyid: bo" we' jo, to' yang kad' ra" ja:- ja: khao: ngo" wa ASANG: qhid' mae" gatau kho' to: nae" ngad: ra". Aire ASANG: jo,nho" ban" mae ke' to: nae" ngad: ra"- ga: ta" ra".

²⁰Ailao"- khinjaung qe wa labo" jham re mad: ke' ako". Byu jham aire the' gyo: ge we'- yao: bam wa thoe mo" we' zag: hug' mung: vang jham wa byo; gyoe; lo" ako". Ai: thao gyezo: alhab' mo, bug gaung vomo" khug khyo din: za: do; vao ye" lo" gemung: yesang: yu: pye' ako".

²¹Yao: bam: shae: yang vomo" mae" yauggai- myiqe:- aqi: angai yaug khao: ngo" re yao: bam se' pye' ako". Yao: bam wa nung:- yao- loze jham rere: se' pye' ako".

²²Ailao"- Yoshu wa jin" byu khyo" mau" vin: lo ko" ra" byu shid' yaug re- Ni" shid' yaug yao: re dao:so: byid' to: ko" ru we' dakhyo: ai: shava myhi" yham khyo vao ye: mung: yao: re we' yao" yham byu qere yejhui" thug' lo geri:- ga: ta" ra".

²³Airumung: yao: shid' yaug wa Rahab re- yao: pho" yao: myhi"- yao: mao: yao: maung bam dang: ra" yao" yham byu qe we' daga" yejhui" thug' lo: ako". Yao: shid' yaug wa yao: bam alhab' yham byu- jeim alhab' re jhui" yu mung: gug' ra" jo, qo Israel jamu nhae khyo lojhui" nha: to" ako".

²⁴Ai: thao yao: bam wa vomo" re myi: ngha" ke' gemung: qhang- ngaui- gyid: bo"- jo, to' yang kad' ra" ja: mae" je yang: vomo" mae" ja: khao: ngo" myimhab bam kad' pye' ako". Aijham re wa yao: bam yu: yu mung: ASANG: jo,nho" ban" mae ke' to" ako".

²⁵Ngadqere: shava myhi" Rahab we' yao" amyu" ba nam qere wa tang" to" ra". Pe"mung:ga"re Rahab wa yao" yang nhao: ke' ra" jin" byu shid' yaug re nyham: byid: yang: ngad: ra". (Rahab nho: myid:zo: qe wa Israel mung" mae ana" ba joe" sho' na: jo; ako".)

²⁶Ai: ayo, mae Yoshu wa nhang: kheim: ke' mung: ta" peim: khyo daja: re ta" thug' ke' ra". Aiwa- Yerikho vomo" re dam: te: nae" seim" yaug- khag' ngadqere: ASANG: nhang: kheim: zao" li" nae". Apan aqao: zao yaug khag' ngadqere: yao" zoqhid' yauggai zo: shid: li" nae". Kham: jham re zao: ra" yaug khag' ngadqere: yao" yauggai zo: zothao" shid: li" nae"- ga: ta" thug' ra".

²⁷Aimung: ASANG wa Yoshu we' daga" na mung: yao" lahau: wa mung" geim" khyo jao: sho' hau" nhao" lo" ra".