Read Maru YOSHU 7 Bible Online

YOSHU 7 - Maru bible

YOSHU 7

¹Phyo' qheim" pye' nae" ngad: ra" zai pe" daja: rere: Yerikho vogaung: mae" dayu ge,- ga: Israel byu qere byid' ra" ASANG: amyin" re mho dao: magyo: ngad: ako". Akhan ga: mang yaug wa aire mho dao: magyo: ngad: ra". Airumung: ASANG wa Israel byu qere nhag' yo" ra". (Akhan wa Yuda amyu" Zera kaung mae" Kami nho: yauggai zo:- Zabdi nho: yao: myid: ngad: ra".)

²Yoshu wa Yerikho mae" byu daqhae: re Bethela ba thug' shad' Bedaven vogaung: nhae mae" Ai: vogaung: khyo ai: mug: myid re yejo" qu" nae" amyin" byid: yang: nhao: ke' ra".

³Yao: bam ai: mau" bin gelao"- yao: bam wa Yoshu re- Ai: vogaung: re yaug khao: ngo" yang yezin: maca" ngad: ra". Shid' we' sam taung yaug ko za: nhao: ke' wa,- gyetab geim" re aikhyo gye zin: nae" danhao: ke' wa,- Ai: vogaung: wa vogaung: qi: mangad: ngad: ra" ga: lota" kyo" ako".

⁴Airumung: Israel byu qe wa byu sam taung ko yang gye yezin" ako". Ngadqere: yao: bam wa lham: zin" tao" ke' ru qhug' ako".

⁵Ai: vogaung: mae" yauggai qe wa vogaung: kham: mae" laug kho' jao: jham joe" sho' cao" khe' gemung: ai: to' gyo" cao" yang: sam xe: khyaug' yaug re se' pye' ako". Alao" Israel byu qe wa byolae" sho' gyaug: pye' ako".

⁶Yoshu we' Israel byu qe: au: jhaung qe wa kaug' mung: yao: bam: mai bau: jham re lao" cad' yang:- ASANG: Dao: Thang" Ban" qhid' kheim: myidgaung khyo yao: bam yao: gyang: lang" lo" gemung: yao: bam kaug' qhui: rure qhu" byid: nae" qhid' mae" yao: bam: au: dao mae bodan gag: sheim: yang: myi" thao joe" sho' aimae lang" jo; ako".

⁷Ailao" Yoshu wa- myhao: thao" ra" ASANG we" Yodan gyaung: cete' khyo ngonhaung" re pe"mung: jhui" de; lo: i? Amori byu qe: lo, khyo ab byid' pye' nae" ein i? Ngonhaung" re se' tam" pye' nae" ein: i? Yodan gyaung: thoete' mae pe"mung: mana nhao i?

⁸O" ASANG we"- ana" Israel byu qe wa gyevo qemae" naung zad: zad' phao: lo vako" ruyang ngo pe" qo" ta" lo" i?

⁹Khanan byu qe we' mung"dan: mae" gatau yaug khao: ngo" ai: khyo re the' gyo" li" genae". Yao: bam wa ngonhaung" re li" vang: gemung:- ngonhaung" yaug khao: ngo" re li" se' pye' li" genae". Ailao" ni" nga: re gug: gam nae" qhid' mae" nao pe" kad' nae" i? ga: ta" ra".

¹⁰ASANG wa Yoshu re to" wa,- nao myidgaung mae ceru: pe"mung: lang" jo; i?

¹¹Israel byu qe wa qobo shad' lhoe" avako". Ngoyang yao: bam re phug' cao" nae" amyin" byid' to" ra" myid: vang" khyo re phyo' lhaui" pye' ako". Yao: bam wa phyo' qheim" pye' nae" dao: phyid' to" ra" zai jham mae" daqhae: re yu: pye' avako". Yao: bam ai: zai jham re khug' yu mung: ai: khyo re mhug' ta" ako". Aijham re yao: bam: zai jham we' daga" ke' to" ako".

¹²Ce: mathao mae Israel byu qe wa yao: bam: gyevo qere gye maqo" kad' ngad: ako". Yao: bam wa yao: bam: gyevo qemae" zad: phao: ako". Pe"mung:ga"re ana" yao: bam yao: byo; qeim: lo" nae" dao: phyid' ru qhug' avako". Naonhaung" mayu genae" qhid' mae" ngo amyin" byid' to" ra" zai jham re naonhaung" maphyo' qheim" pye' pye' wa ngo wa naonhaung" we' daga" khonhae" re: mana lo nae".

¹³To" wa,- amyu" byu qere san sin" pye' nhao mung: nga" qhid' kheim: khyo li" genae" qhid' mae" yao: bam re seim" nyhang" nhao wa, ne, kao jin" jin" kad' to: genae" qhid' mae" yao: bam re ta" wa,- Israel byu qenho: Mao"So ASANG ngo wa ce: dao: ta" ca" ra". Aiwa Israel byu qe we"- ngo phyo' qheim" pye' nae" qhid' mae" amyin" byid' to" ra" zai jham daqhae: naonhaung" jo,nho" mae boke' to" ako". Naonhaung" aijham re mayu: pye' gere wa naonhaung" wa naonhaung" gyevo qere gye maqo" kad' ngad: ako".

¹⁴Airumung: ne, kao re amyu" dakaung thao dakaung qhid' au: khyo li" genae" qhid' mae" yao: bam re ta" wa,- ailao" ngo khyin: yu: ra" amyu" qe wa amyu" kaung cao" yang: qhid' au: khyo li" genae" ngad: ako". Ngo khyin: yu: ra" amyu" kaung qe wa yham khaung cao" yang: qhid' au: khyo li" genae" ngad: ra".

¹⁵Airu: dao: phyid' qhug' ra" zai jham we' daga" khyin: yu: ra" yaug wa yao" yham byu yao: sang: ra" zai ja: khao: ngo" we' dalhang: dae ngha" pye' ru qhug' li" nae". Pe"mung:ga"re yao: wa Israel byumyu" qe: dao mae xo sho' qho' phau: nhao mung: nga" dao: thang" re phyo' pye' ava"- ga" ru ngad: ra".

¹⁶Thao: ba ne, seim no'- Yoshu wa Israel byu qere amyu" re cao" yang: qhid' au: khyo jhui" lo: ra". Yuda amyu" qere khyin: yu: ra".

¹⁷Yao: wa Yuda amyu" qere amyu" kaung re cao" yang: qhid' au: khyo jhui" lo: ra". Ai: thao yao: wa yham khaung cao" yang: Zera amyu" kaung re qhid' au: khyo jhui" lo mung: Zabdi yham khaung qe khyin: yu qhug' ako".

¹⁸Ailao" yao: wa Zabdi nho: yham khaung re yauggai re cao" yang: qhid' au: khyo jhui" lo mung: Zabdi nho: yao: myid:- Kami nho: yauggai zo: Akhan re khyin: yu: ra".

¹⁹Yoshu wa yao: re nga" zo: we"- Israel byu qenho: Mao"So ASANG: qhid' kheim: cetau mae dang: ra" khyo re ta" thug' mung: lhang: yu wa,- nao pe" kad' va" rure ana" ngore ta" kyo: la,- ngore aikhyo dazug' to: la,- ga: ta" ra".

²⁰Akhan wa dang va"- ngo wa Israel byu qenho: Mao"So ASANG re qobo shad' va". Ngo ceru: kad' lai: lo va".

²¹Ngonhaung" qo" sham" yu: ra" zai jham mae yaung" ra" Babelon bau: qhang dakhye'- ngaui shekela shid' yo we' shekela ngo" xe bo: ra" qhang thaung: dathaung: re myao: ra". Aijham re ngo saung" qu" o mung: yu: pye' va". Ngaui re athai: mae ke' yang: aijham re nga" zaung khug mae nyhab' to" rure naonhaung" qho: myao genae"- ga: ta" ra".

²²Airumung: Yoshu wa byu daqhae: re nhao: ke' mung: aibam wa zaung khyo tao" ye" lo" ako". Ngaui re athai: mae ke' yang: nyham" to" ra" ai: dao: phyid' ra" zai jham gaigai: yao: aimae nyhab' to" rure myao: ako".

²³Yao: bam wa aijham re zaung khug mae" phoe' thug' yu mung: Yoshu we' Israel byu alhab' mo, jhao" cilo yang: ASANG: qhid' kheim: mae aijham re lavo; to" ako".

²⁴Yoshu we' Israel byu qe alhab' mo, wa Akhan re taung" yu mung:- ngaui- bau: qhang- qhang thaung: we' daga" Akhan nho: yauggai- myiqe: zo: qe- yao" nung:- loze- yao- yao" zaung- yao: sang: ra" gu: ja: khao: ngo" sham" yu: ako". Aimung: yao: bam wa aibam re qug: khai: lao: khaung: khyo jhui" ye" ako".

²⁵Ailao" Yoshu wa- nao pe"mung: yang: airu" ra" qug: khai: ngonhaung" dao mae joe" nhao va" i? Ana" ASANG wa ni" dao mae qug: khai: joe" nhao: li" nae"- ga: ta" ra". Amyu" byu qe alhab' mo, Akhan re laugbaui: yang: pye' se' ako". Yao: bam wa yao" yham byu qere pye' se' gemung: yao" jo,nho" jham rere: ngha" pye' ako".

²⁶Yao: bam wa yao" dao mae laugbaui bam mo" zang pye' bam" ako". Aiwa ana" ba joe" sho' jo; jo; ra". Ce: mathao mae ai: jo, qo re ana" ba joe" sho' Qug: Khai: Lao:khaung: ga: mhang" ako". Ailao" ASANG wa nhag' yo: gyo" byaug: ra".